റിയാദ്‌: സഊദി അറേബ്യയുടെ വ്യോമയാന മേഖലയെ ആധുനികവല്‍ക്കരിക്കാന്‍ ലക്ഷ്യമിട്ടു കൊണ്ട് 70 ഇ-ഗേറ്റുകള്‍ അവതരിപ്പിച്ച് ജിദ്ദ കിംഗ് അബ്ദുല്‍ അസീസ് അന്താരാഷ്ട്ര വിമാനത്താവളം. വിമാനത്താവളത്തിന്റെ പുതിയ പദ്ധതിയിലൂടെ ഇതുവഴി കടന്നുപോകുന്ന യാത്രക്കാര്‍ക്ക് ഇനിമുതല്‍ വേഗതയേറിയതും കാര്യക്ഷമവുമായ യാത്ര ആസ്വദിക്കാന്‍ കഴിയും.

മക്ക മേഖലയിലെ ഡെപ്യൂട്ടി അമീര്‍ പ്രിന്‍സ് സൗദ് ബിന്‍ മിഷാല്‍ ഈ സംവിധാനം ഉദ്ഘാടനം ചെയ്തു. ചെക്ക്ഇന്‍, പുറപ്പെടല്‍ നടപടിക്രമങ്ങള്‍ ഓട്ടോമേറ്റ് ചെയ്യുന്നതിനുള്ള മറ്റൊരു സുപ്രധാന ചുവടുവയ്പ്പാണിത്.

വിമാനത്താവളത്തിന്റെ കാര്യക്ഷമത വര്‍ധിപ്പിക്കുന്നതിനും സുരക്ഷാ പരിശോധനകള്‍ മെച്ചപ്പെടുത്തുന്നതിനും യാത്രക്കാരുടെ കാത്തിരിപ്പ് സമയം കുറയ്ക്കുന്നതിനുമായി രൂപകല്‍പ്പന ചെയ്തിരിക്കുന്ന എഐയില്‍ പ്രവര്‍ത്തിക്കുന്ന ഇഗേറ്റുകളാണ് ഇവ. ഇത് പ്രതിദിനം 175,000 യാത്രക്കാര്‍ക്ക് വരെ പ്രയോജനകരമാകുമെന്നാണ് കരുതുന്നത്.

ടെര്‍മിനല്‍ 1 ലും എക്‌സിക്യൂട്ടീവ് ഓഫീസ് സൗകര്യങ്ങളിലും സ്ഥാപിച്ചിരിക്കുന്ന ഓരോ ഇഗേറ്റിനും പ്രതിദിനം 2,500 യാത്രക്കാരെ കൈകാര്യം ചെയ്യാന്‍ കഴിയും. ഇത് ലളിതവും കടലാസ് രഹിതവുമായ പ്രക്രിയയിലൂടെ യാത്രക്കാരുടെ അനുഭവം കൂടുതല്‍ മെച്ചപ്പെടുത്തും.

ബയോമെട്രിക് വെരിഫിക്കേഷനും ഫേഷ്യല്‍ റെക്കഗ്‌നിഷന്‍ സാങ്കേതികവിദ്യയും കൊണ്ട് സജ്ജീകരിച്ചിരിക്കുന്ന ഈ സംവിധാനം, യാത്രക്കാര്‍ക്ക് നേരിട്ട് രേഖകള്‍ പരിശോധിക്കാതെ തന്നെ സുരക്ഷാ ചെക്ക്‌പോസ്റ്റുകളിലൂടെ കടന്നുപോകാന്‍ അനുവദിക്കുന്നു. 

റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിലും നിയോം ബേ വിമാനത്താവളത്തിലും ഇഗേറ്റുകള്‍ വിജയകരമായി നടപ്പിലാക്കിയതിനെ തുടര്‍ന്നാണ് ഈ നീക്കം. ഇതോടെ ഈ സാങ്കേതികവിദ്യ സ്വീകരിക്കുന്ന മൂന്നാമത്തെ പ്രധാന സഊദി വിമാനത്താവളമായി ജിദ്ദ മാറി.

2024ല്‍ 278,000 വിമാനങ്ങളിലായി 49.1 ദശലക്ഷം യാത്രക്കാരെയാണ് കിംഗ് അബ്ദുല്‍ അസീസ് അന്താരാഷ്ട്ര വിമാനത്താവളം സ്വീകരിച്ചത്.

Jeddah International Airport has introduced 70 e-gates to streamline travel for 175,000 passengers daily.