വേനല്‍ അവധിക്കാലം അടുത്തെത്താറായി, അവധിക്ക് വിദേശത്തേക്ക് ഒരു വിനോദയാത്ര പോകാന്‍ പദ്ധതിയിട്ടവരാണോ? എങ്കില്‍ നിങ്ങളുടെ യാത്ര ചെലവിൽ കഴിഞ്ഞവര്‍ഷത്തെ അപേക്ഷിച്ച് 15 ശതമാനം മുതല്‍ 20 ശതമാനം വരെ വര്‍ധന ഉണ്ടാകും. വിദേശയാത്ര ചെലവേറിയതാക്കി മാറ്റുന്നത് പ്രധാനമായും രൂപയുടെ മൂല്യത്തിലുണ്ടായ ഇടിവാണ്. മാത്രമല്ല ഹോട്ടല്‍ മുറികളുടെ നിരക്ക് വർധിച്ചതും യാത്രക്കാർക്ക് തിരിച്ചടിയാണ്. യൂറോപ്യന്‍ രാജ്യങ്ങളിലേക്കുള്ള യാത്രകൾ, ദക്ഷിണേഷ്യന്‍ രാജ്യങ്ങളിലേക്കുള്ള യാത്രകൾ തുടങ്ങിയവയെ ആയിരിക്കും ചെലവിലെ വര്‍ധന കൂടുതല്‍ തോതിൽ ബാധിക്കുക. കോവിഡാനന്തരം ചൈനയില്‍ നിന്നുള്ള യാത്രക്കാര്‍ ധാരാളമായി വിദേശരാജ്യങ്ങള്‍ സന്ദര്‍ശിക്കാന്‍ എത്തുന്നുണ്ട്. ഇത് മിക്ക ആഗോള വിനോദസഞ്ചാര കേന്ദ്രങ്ങളിലെയും ഹോട്ടല്‍ മുറികളുടെ നിരക്ക് ഉയരുന്നതിന് ഇടയാക്കി.

2017-18, 2018-19 കാലയളവിലും വിദേശയാത്ര ചെലവില്‍ നിലവിലേതിനു സമാനമായ വര്‍ദ്ധനയുണ്ടായിരുന്നതായി ഇന്ത്യന്‍ അസോസിയേഷന്‍ ഓഫ് ടൂര്‍ ഓപ്പറേറ്റേഴ്സ് വ്യക്തമാക്കുന്നു. ആ രണ്ടു വര്‍ഷങ്ങളിലും വിദേശയാത്ര ചെലവേറിയതാക്കി മാറ്റിയത് ഡോളറിനെതിരെ രൂപയുടെ മൂല്യത്തിലുണ്ടായ ഇടിവ് തന്നെയാണ്. കഴിഞ്ഞ വര്‍ഷം ഇതേ കാലയളവില്‍ ഡോളറിനെതിരെ രൂപയുടെ മൂല്യം 82.00 ആയിരുന്നു, എന്നാൽ നിലവിലിത് 87 രൂപക്ക് മുകളിലാണ്. രൂപയുടെ മൂല്യം കുറഞ്ഞതോടെ ടൂര്‍ കമ്പനികള്‍ അധികമായി ഉണ്ടാകുന്ന ചെലവ് വിനോദസഞ്ചാരികളില്‍ നിന്നും ഈടാക്കുകയാണ്.

രാജ്യത്തെ പ്രധാനപ്പെട്ട ആഭ്യന്തര വിനോദ സഞ്ചാരകേന്ദ്രങ്ങളില്‍ നിലവില്‍ വലിയ തിരക്ക് അനുഭവപ്പെടുന്നുണ്ട്. ഹില്‍ സ്റ്റേഷനുകളിലാണ് പ്രധാനമായും കൂടുതല്‍ വിനോദ സഞ്ചാരികള്‍ എത്തുന്നത്. തിരക്ക് വർധിച്ചതാണ് വിദേശരാജ്യങ്ങള്‍ തെരഞ്ഞെടുക്കാന്‍ മിക്ക വിനോദസഞ്ചാരികളെയും പ്രേരിപ്പിച്ചത്. നിരവധി രാജ്യങ്ങള്‍ ഇന്ത്യന്‍ യാത്രികര്‍ക്ക് ഇ-വിസ ഏര്‍പ്പെടുത്തിയതും നടപടിക്രമങ്ങള്‍ ലഘൂകരിച്ചതും വിദേശയാത്രയെ കൂടുതല്‍ ആകര്‍ഷകമാക്കി മാറ്റി. കൂടാതെ, പല രാജ്യങ്ങളും നിലവിൽ ഇന്ത്യന്‍ യാത്രക്കാര്‍ക്ക് വിസ രഹിത യാത്രയും വാഗ്ദാനം ചെയ്യുന്നുണ്ട്.

Get ready for a significant increase in foreign travel expenses! Costs are expected to rise by up to 20% compared to last year, leaving a big dent in your pocket.