മുംബൈ: ഇന്റർനാഷണൽ മാസ്റ്റേഴ്സ് ടി-20 ലീഗിൽ ഓസ്ട്രേലിയക്കെതിരെ വെസ്റ്റ് ഇൻഡീസിന് ഏഴ് വിക്കറ്റിന്റെ തകർപ്പൻ വിജയം. നവി മുംബൈയിൽ നടന്ന മത്സരത്തിൽ ടോസ് നേടിയ വെസ്റ്റ് ഇൻഡീസ് ബൗളിംഗ് തെരഞ്ഞെടുക്കുകയായിരുന്നു. മത്സരത്തിൽ ആദ്യം ബാറ്റ് ചെയ്ത ഓസ്ട്രേലിയ 20 ഓവറിൽ എട്ട് വിക്കറ്റ് നഷ്ടത്തിൽ 216 റൺസാണ് നേടിയത്. എന്നാൽ വിജയലക്ഷ്യം പിന്തുടർന്നിറങ്ങിയ വെസ്റ്റ് ഇൻഡീസ് നാല് പന്തുകളും ഏഴ് വിക്കറ്റുകളും ബാക്കിനിൽക്കെ ലക്ഷ്യം മറികടക്കുകയായിരുന്നു. 

ലെണ്ടി സിമ്മൺസ്, ഡെയ്ൻ സ്മിത്ത് എന്നിവരുടെ തകർപ്പൻ ബാറ്റിങ്ങിന്റെ കരുത്തിലാണ് കരീബിയൻ ഇതിഹാസങ്ങൾ വിജയം സ്വന്തമാക്കിയത്. 44 പന്തിൽ പുറത്താവാതെ 94 റൺസാണ് സിമ്മൺസ് നേടിയത്. 213.64 പ്രഹര ശേഷിയിൽ ആറ് ഫോറുകളും എട്ട് സീക്സുകളും ആണ്  താരം നേടിയത്. 10 ഫോറുകളും ഒരു സിക്സും ഉൾപ്പെടെ 29 പന്തിൽ 51 റൺസും നേടി സ്മിത്തും നിർണായകമായി. ക്യാപ്റ്റൻ ബ്രയാൻ ലാറ 21 പന്തിൽ 33 റൺസും ചാഡ്വിക് വാൽടൺ 11 പന്തിൽ 23 റൺസും നേടി മികച്ച പ്രകടനം നടത്തി. 

നേരത്തെ ആദ്യം ബാറ്റ് ചെയ്ത ഓസ്ട്രേലിയ ഷെയ്ൻ വാട്സണിന്റെ സെഞ്ച്വറി മികവിലാണ് മികച്ച സ്കോർ നേടിയത്. 52 പന്തിൽ 107 റൺസ് ആണ് വാട്സൺ നേടിയത്. ഒമ്പത് വീതം ഫോറുകളും സിക്സുമാണ് താരം നേടിയത്. വിൻഡീസ് ബൗളിങ്ങിൽ എ നേഴ്സ് മൂന്ന് വിക്കറ്റുകൾ നേടി മികച്ച പ്രകടനം നടത്തിയപ്പോൾ ജെറോമി ടൈലർ, രാംപോൾ എന്നിവർ രണ്ട് വിക്കറ്റുകൾ വീതവും നേടി. സ്മിത്ത് ഒരു വിക്കറ്റും സ്വന്തമാക്കി.