കണ്ണൂര്‍: ആറളംഫാമില്‍ ആദിവാസി ദമ്പതികളെ കാട്ടാന കൊന്നതില്‍ പ്രതിഷേധം ശക്തം. സ്ഥലത്തെത്തിയ സി.പി.എം നേതാവ് എം.വി ജയരാജന്‍ ഉള്‍പ്പെടെയുള്ള നേതാക്കളെ നാട്ടുകാര്‍ തടഞ്ഞു. വനംമന്ത്രി എത്താതെ പ്രതിഷേധം അവസാനിപ്പിക്കില്ലെന്നാണ് നാട്ടുകാര്‍ പറയുന്നത്. ഇതിനിടെ ഇന്നലെ മരിച്ച ദമ്പതികളുടെ മൃതദേഹവുമായെത്തിയ ആംബുലന്‍സും നാട്ടുകാര്‍ തടഞ്ഞു. ആരെയും ഉള്ളിലേക്ക് കടത്തിവിടില്ലെന്ന നിലപാടിലാണ് നാട്ടുകാര്‍. 

കശുവണ്ടി ശേഖരിക്കാന്‍ പോയ ആറളം വില്ലേജ് അമ്പലക്കണ്ടി കോളനിയിലെ താമസക്കാരായ വെള്ളി (80), ഭാര്യ ലീല (70) എന്നിവരാണ് കാട്ടാനയുടെ ആക്രമണത്തില്‍ അതിദാരുണമായി കൊല്ലപ്പെട്ടത്. ഇന്നലെ രാവിലെയാണ് ദമ്പതികള്‍ കശുവണ്ടി ശേഖരിക്കാനായി 13ാം ബ്ലോക്കിലെ ഇവര്‍ക്ക് പതിച്ചു നല്‍കിയ സ്ഥലത്ത് കശുവണ്ടി ശേഖരിക്കാനായി പോയത്. ഏറെവൈകിയും ഇവരെ കാണാതായതിനെ തുടര്‍ന്ന് നടത്തിയ തിരച്ചിലിലാണ് കാട്ടാന ചവിട്ടിക്കൊന്ന നിലയില്‍ ഇരുവരുടെയും മ്യതദേഹങ്ങള്‍ കണ്ടെത്തിയത്. ആനകൊല്ലപ്പെട്ട ദമ്പതികളുടെ മൃതദേഹത്തിനരികില്‍ നിലയുറപ്പിച്ചിരിക്കുന്നതിനാല്‍ വനപാലകരെത്തി പടക്കം പൊട്ടിച്ചും വാഹനത്തില്‍ സൈറണ്‍ പ്രവര്‍ത്തിപ്പിച്ചും ബഹളമുണ്ടാക്കി കാട്ടാനകളെ തുരത്തിയ ശേഷമാണ് മ്യതദേഹം സംഭവസ്ഥലത്തുനിന്നും മാറ്റിയത്. 

സ്ഥിരമായി ആനകളിറങ്ങുന്ന സ്ഥലം കൂടിയാണ് ഇവിടം. പലതവണ തുരത്തിയിട്ടും ആനകള്‍ ഇവിടെ തിരികെയെത്തുകയാണ്. സംഭവത്തില്‍ രൂക്ഷപ്രതിഷേധമാണ് പ്രദേശത്തുള്ളത്. ഒരു ദുരന്തമുണ്ടാകുമ്പോള്‍ മാത്രം അധികാരികളുടെ കണ്ണു പതിയുന്ന ഇടമായി കണ്ണൂര്‍ ആറളം ഫാം മാറിയിട്ട് പതിറ്റാണ്ടുകളായി. 

കാട്ടാനകളെ ഭയന്ന് വീടിനു വെളിയിലിറങ്ങാന്‍ പോലും കഴിയാതെ ജീവിക്കുന്ന മനുഷ്യരുടെ നാടായി മാറി ആറളം. ജീവനും കൈയില്‍ പിടിച്ചു ജീവിക്കുന്നവരാണ് ഇവിടുത്തെ നാട്ടുകാര്‍. കാട്ടാന ആക്രമണത്തില്‍ ഒരോരുത്തര്‍ കൊല്ലപ്പെടുമ്പോള്‍ ആദിവാസി സമൂഹത്തിന്റെ പ്രതിഷേധം തണുപ്പിക്കാന്‍ വനം വകുപ്പും റവന്യൂ വിഭാഗവും ആനമതില്‍ നിര്‍മിക്കുമെന്ന് പറയും, എന്നാല്‍ അതെല്ലാം വെറും വാഗ്ദാനമായി മാറുകയാണ് പതിവ്.

 ഭീതിയോടെയാണ് രണ്ടായിരത്തോളം കുടുംബങ്ങള്‍ ഫാമിലെ തങ്ങളുടെ കൂരകളില്‍ കഴിയുന്നത്. രാപകല്‍ ഭേദമെന്യേ കാട്ടാനകള്‍ ഇവിടങ്ങളില്‍ വിഹരിക്കുകയാണ്. ആനമതില്‍ നിര്‍മിക്കുക മാത്രമാണ് ആറളത്ത് പോംവഴി. എന്നാല്‍ ചുവപ്പുനാടയുടെ കുരുക്കഴിച്ച് ആനമതില്‍ പ്രാവര്‍ത്തികമാവുമ്പോഴേക്കും ഇവിടെയുള്ള പല ജീവനുകളും നഷ്ടപ്പെട്ടിരിക്കുമെന്നാണ് നാട്ടുകാര്‍ പറയുന്നത്.