കോഴിക്കോട്: കഴിഞ്ഞ ദിവസം കോഴിക്കോട്ട് നടന്ന മുജാഹിദ് സമ്മേളനത്തിൽ കേരള നദ് വത്തുൽ മുജാഹിദീൻ പ്രസിഡന്റ് ടി.പി അബ്ദുല്ലക്കോയ മദനിയുടെ പ്രസംഗത്തിൽ സമസ്തയെയും പാണക്കാട് തങ്ങന്മാരെയും കുറിച്ച് നടത്തിയ പരാമർശങ്ങൾ വസ്തുതകൾക്ക് നിരക്കാത്തതും കാപട്യം നിറഞ്ഞതുമാണെന്ന് സമസ്ത കേരള ജംഇയ്യതുൽ ഉലമ പോഷക സംഘടനാ നേതാക്കൾ സംയുക്ത പ്രസ്താവനയിൽ പറഞ്ഞു. സമസ്ത സമുദായത്തിൽ ഭിന്നിപ്പുണ്ടാക്കുന്ന സംഘടനയാണെന്ന അദ്ദേഹത്തിന്റെ പരാമർശം അവജ്ഞയോടെ പൊതുസമൂഹം തള്ളിക്കളയും. സമസ്തയെ കുറിച്ച് മനസ്സിലാക്കിയ ഒരാളും അങ്ങിനെ പറയില്ല. 1921 കാലഘട്ടം വരെ മുസ്‌ലിം സമുദായം നിരാക്ഷേപം അംഗീകരിച്ചു വന്ന വിശ്വാസാചാരങ്ങൾ ശിർക്കും കുഫ്‌റും ആണെന്നാരോപിച്ചു സമുദായത്തിൽ ചിദ്രതക്ക് തുടക്കം കുറിച്ച് പുതിയ പ്രസ്ഥാനം ഉണ്ടാക്കിയവരാണ് മുജാഹിദുകൾ. പിന്നീട് പല ഗ്രൂപ്പുകളായി പരിണമിച്ചെങ്കിലും ഇപ്പോഴും സമുദായത്തിൽ ചിദ്രത ഉണ്ടാക്കുന്ന പ്രവർത്തനമാണ് അവർ നടത്തിക്കൊണ്ടിരിക്കുന്നത്. ഇപ്പോൾ പാണക്കാട് തങ്ങൻമാരുടെ മഹത്വം പറയുന്നതും കാപട്യമാണ്. സയ്യിദ് മുഹമ്മദലി ശിഹാബ് തങ്ങൾ ഉറുക്കും നൂലും വെള്ളവും മന്ത്രിച്ചൂതുന്നത് വിഡിയോയിൽ പകർത്തി ഇവർ ശിർക്ക് ചെയ്യുന്നവരാണെന്ന രീതിയിൽ അറബികൾക്കിടയിൽ പ്രചരിപ്പിച്ച മുജാഹിദുകൾ ഇപ്പോൾ പാണക്കാട് സാദാത്തുക്കളെ അംഗീകരിക്കാൻ തയാറായിട്ടുണ്ടെങ്കിൽ സ്വാഗതാർഹമാണ്. സമസ്ത സ്ത്രീ വിദ്യാഭ്യാസത്തിനെതിരാണെന്ന പഴയ പല്ലവി വീണ്ടും ആവർത്തിക്കുന്നതും ജനം അവജ്ഞയോടെ തള്ളിക്കളയും. സ്ത്രീകളുടെ മത, ഭൗതിക വിദ്യാഭ്യാസത്തിന് വേണ്ടി നൂറ് കണക്കിന് കോളജുകളാണ് സമസ്ത സ്ഥാപിച്ചു നടത്തുന്നത്. ഇത്രയും അധികം വനിത വിദ്യാഭ്യാസ സ്ഥാപനങ്ങൾ നടത്തുന്നത് കേരളത്തിൽ സമസ്ത മാത്രമാണ്. സയ്യിദ് അബ്ദുറഹ്മാൻ ബാഫഖി തങ്ങളും പാണക്കാട് പൂക്കോയ തങ്ങളും ശംസുൽ ഉലമ ഇ.കെ അബൂബക്കർ മുസ്‌ലിയാരും ഉൾപ്പെടെയുള്ള നേതാക്കൾ കാണിച്ചു തന്ന മാർഗത്തിലൂടെ സംഘടന മുന്നോട്ട് പോവുമെന്നും നേതാക്കളായ സുന്നി യുവജന സംഘം സംസ്ഥാന കമ്മിറ്റി ജനറൽ സെക്രട്ടറി സയ്യിദ് മുഹമ്മദ് കോയ തങ്ങൾ ജമലുല്ലൈലി, സമസ്ത കേരള ജംഇയ്യതുൽ മുഅല്ലിമീൻ സെൻട്രൽ കൗൺസിൽ ജനറൽ സെക്രട്ടറി വാക്കോട് മൊയ്തീൻ കുട്ടി ഫൈസി, സുന്നി മഹല്ല് ഫെഡറേഷൻ ജനറൽ സെക്രട്ടറി യു. മുഹമ്മദ് ഷാഫി ഹാജി ചെമ്മാട്, എസ്.കെ.എസ്.എസ്.എഫ് ജനറൽ സെക്രട്ടറി ഒ.പി.എം അഷ്‌റഫ് മൗലവി എന്നിവർ പ്രസ്താവനയിൽ പറഞ്ഞു.