ദുബായ്: ഏകദിന ക്രിക്കറ്റിൽ പുതിയ നാഴികക്കല്ല് സ്വന്തമാക്കി ഇന്ത്യൻ സൂപ്പർതാരം വിരാട് കോഹ്‌ലി. ഏകദിന ക്രിക്കറ്റിൽ 14,000 റൺസ് പൂർത്തിയാക്കാനാണ് വിരാടിന് സാധിച്ചത്. ഐസിസി ചാമ്പ്യൻസ് ട്രോഫിയിൽ പാകിസ്താനെതിരെയുള്ള മത്സരത്തിൽ 15 റൺസ് നേടിയപ്പോഴാണ് കോഹ്‌ലി ഈ നേട്ടം സ്വന്തമാക്കിയത്. ഈ നേട്ടത്തിന് മറ്റൊരു പ്രത്യേകത കൂടിയുണ്ട് ഏകദിനത്തിൽ ഏറ്റവും വേഗത്തിൽ 14,000 റൺസ് പൂർത്തിയാക്കുന്ന താരമായും കോഹ്‌ലി മാറി. 287 ഇന്നിംഗ്സുകളിൽ നിന്നുമാണ് 14,000 ഈ നേട്ടം സ്വന്തമാക്കിയത്. 

ഇന്ത്യൻ ഇതിഹാസം സച്ചിൻ ടെണ്ടുൽക്കറെ മറികടന്നുകൊണ്ടാണ് കോഹ്‌ലി ഈ റെക്കോർഡിലേക്ക് നടന്നുകയറിയത്. സച്ചിൻ 350 ഇന്നിംഗ്‌സുകളിൽ നിന്നുമാണ്‌ 14,000 റൺസ് സ്വന്തമാക്കിയത്. ഏകദിന ക്രിക്കറ്റിൽ ഈ നേട്ടം സ്വന്തമാക്കുന്ന മൂന്നാമത്തെ താരം കൂടിയാണ് കോഹ്‌ലി. സച്ചിന് പുറകിൽ 378 ഇന്നിംഗ്‌സുകളിൽ നിന്നും മുൻ ശ്രീലങ്കൻ താരം കുമാർ സംഗക്കാരെയും ഈ നാഴികക്കല്ല് സ്വന്തമാക്കിയിരുന്നു.

മത്സരത്തിൽ ആദ്യം ബാറ്റ് ചെയ്ത പാകിസ്താൻ 241 റൺസിന്‌ പുറത്താവുകയായിരുന്നു. ഇന്ത്യൻ ബൗളിങ്ങിൽ  കുൽദീപ് യാദവ് മൂന്ന് വിക്കറ്റുകൾ വീഴ്ത്തി മിന്നും പ്രകടനം നടത്തിയപ്പോൾ ഹർദിക് പാണ്ഡ്യ രണ്ട് വിക്കറ്റുകളും നേടി നിർണായകമായി. ഹർഷിത് റാണ, രവീന്ദ്ര ജഡേജ, അക്‌സർ പട്ടേൽ എന്നിവരായിരുന്നു ബാക്കിയുള്ള ഓരോ വിക്കറ്റുകളും നേടിയത്. പാക്കിസ്താന് വേണ്ടി അർദ്ധ സെഞ്ച്വറി നേടി സൗത് സക്കീൽ മികച്ച പ്രകടനം നടത്തി. 76 പന്തിൽ 62 റൺസ് ആണ് താരം നേടിയത്. 5 ഫോറുകൾ ആയിരുന്നു താരത്തിന്റെ ബാറ്റിൽ നിന്നും പിറന്നത്.

പാകിസ്താൻ പ്ലെയിങ് ഇലവൻ

ഇമാം ഉൾ ഹഖ്, ബാബർ അസം, സൗദ് ഷക്കീൽ, മുഹമ്മദ് റിസ്വാൻ(വിക്കറ്റ് കീപ്പർ/ക്യാപ്റ്റൻ), സൽമാൻ ആഘ, തയ്യബ് താഹിർ, ഖുശ്ദിൽ ഷാ, ഷഹീൻ അഫ്രീദി, നസീം ഷാ, ഹാരിസ് റൗഫ്, അബ്രാർ അഹമ്മദ്.

ഇന്ത്യ പ്ലെയിങ് ഇലവൻ

രോഹിത് ശർമ (ക്യാപ്റ്റൻ), ശുഭ്മാൻ ഗിൽ, വിരാട് കോഹ്‌ലി, ശ്രേയസ് അയ്യർ, അക്സർ പട്ടേൽ, കെഎൽ രാഹുൽ വിക്കറ്റ് കീപ്പർ), ഹർദിക് പാണ്ഡ്യ, രവീന്ദ്ര ജഡേജ, ഹർഷിത് റാണ, മുഹമ്മദ് ഷമി, കുൽദീപ് യാദവ്.