ബംഗളൂരു: ബം​ഗളൂരുവിൽ കോൺഗ്രസ് നേതാവ് കൊല്ലപ്പെട്ടു. കോൺഗ്രസ് എം.എൽ.എ എൻ ഹാരിസിന്റെ അടുത്ത അനുയായി ഹൈദർ അലിയാണ് കൊല്ലപ്പെട്ടത്. ഞായറാഴ്ച പുലർച്ചെ ഒരു മണിയോടെയായിരുന്നു സംഭവം. അജ്ഞാത സംഘം അദ്ദേഹത്തെ അക്രമിക്കുകയായിരുന്നു. ബൈക്കിൽ വീട്ടിലേക്ക് തിരിച്ച് വരികയായിരുന്നു അദ്ദേഹം. ആ​ക്രമണത്തിന് ശേഷം അക്രമിസംഘം സംഭവസ്ഥലത്ത് നിന്ന് രക്ഷപ്പെട്ടു.

ആക്രമണത്തെ കുറിച്ചു വിവരം ലഭിച്ചതിന് പിന്നാലെ പൊലിസ്  പൊലിസ് സ്ഥലത്തെത്തി അലിയെ ആശുപത്രിയി​ലെത്തിച്ചിരുന്നു. എന്നാൽ  ജീവൻ രക്ഷിക്കാനായില്ല. കോൺഗ്രസ് എം.എൽ.എ എൻ ഹാരിസിന്റെ അടുത്ത അനുയായി ആയ അലി അദ്ദേഹത്തിന്റെ തെരഞ്ഞടുപ്പ് പ്രചാരണങ്ങളിൽ സജീവമായിരുന്നു. 

സംഭവം പ്രദേശത്ത് സംഘർഷാവസ്ഥ സൃഷ്ടിച്ചു. അലിക്കെതിരായ ആക്രമണമറിഞ്ഞ അനുയായികൾ ആശുപത്രിക്ക് പുറത്ത് തടിച്ചു കൂടുകയും മരണത്തിന് പിന്നാലെ ആയുധങ്ങളുമായി ആശുപത്രിയിലേക്ക് എത്തുകയും ഗേറ്റ് തകർക്കുകയും ചെയ്തതായും റിപ്പോർട്ടുകൾ പറയുന്നു. അശോക് നഗർ പൊലീസെത്തിയാണ് സ്ഥിതി ശാന്തമാക്കിയത്.

ഞായറാഴ്ച പുലർച്ചെ ഒരു മണിയോടെയായിരുന്നു സംഭവമുണ്ടായതെന്ന് സെൻട്രൽ ഡിവിഷൻ ഡി.സി.പി എച്ച്.ടി ശേഖർ വ്യക്തമാക്കി.  അലിയുടെ വാഹനം കാർ ഉപയോഗിച്ച് അക്രമികൾ തടയുകയായിരുന്നുവെന്നും തുടർന്നാണ് ക്രൂരമായ കൊലപാതകം ഉണ്ടായതെന്നും അദ്ദേഹം കൂട്ടിച്ചേർത്തു. 

അലിയുടെ മരണത്തിൽ പൊലിസ് കേസെടുത്ത് അന്വേഷണം ആരംഭിച്ചു.   പ്രതികൾക്ക് ​വേണ്ടിയുള്ള തെരച്ചിൽ ഊർജിതമാക്കിയിരിക്കുകയാണ്. പ്രത്യേക സംഘത്തേയും ഇതിനായി പൊലിസ് നിയോഗിച്ചിട്ടുണ്ട്.