പത്തനംതിട്ട: ഹയർസെക്കൻഡറി ചോദ്യപേപ്പറുകളുടെ സ്കൂളുകളിലെ സുരക്ഷയ്ക്ക് പരിശീലനം ലഭിക്കാത്ത ജീവനക്കാരെ നിയമിച്ച പൊതുവിദ്യാഭ്യാസ വകുപ്പിന്റെ നടപടിക്കെതിരേ അനധ്യാപക സംഘടനകൾ നിയമനടപടിയിലേക്ക് നീങ്ങുന്നു. 
പൊതുവിദ്യാഭ്യാസ ഡയരക്ടർ 20ന് പുറപ്പെടുവിച്ച  ഉത്തരവ് റദ്ദാക്കണമെന്ന് ആവശ്യപ്പെട്ട്  പൊതുവിദ്യാഭ്യാസ മന്ത്രി, പൊതു വിദ്യാഭ്യാസ സെക്രട്ടറി, പൊതുവിദ്യാഭ്യാസ ഡയറക്ടർ എന്നിവർക്ക് സംഘടനകൾ  ഇ-മെയിൽ വഴി നിവേദനം നൽകിയിരുന്നു.

 അനധ്യാപക സംഘടനയായ കെ.എ.എസ്.എൻ.ടി.എ.എ അടക്കമുള്ള സംഘടനകളാണ് നിയമ നടപടിയിലേക്ക് നീങ്ങിയത്.
കഴിഞ്ഞ നാലുവർഷങ്ങളായി വിഷയത്തിൽ നീതിതേടി  കോടതിയിൽ കേസ് നൽകിയെങ്കിലും  സർക്കാരിനോട് ആലോചിച്ച് തീരുമാനമെടുക്കാൻ നിർദേശിക്കുകയായിരുന്നു. ഇക്കാര്യം സംഘടന കോടതിയെ  ബോധിപ്പിക്കും. 

മാർച്ച് മൂന്നിന് പരീക്ഷ ആരംഭിക്കാനിരിക്കെ വിഷയത്തിൽ തീരുമാനമെടുക്കണമെന്ന് സംഘടന പൊതുവിദ്യാഭ്യാസ വകുപ്പിനോട് നിരന്തരം ആവശ്യപ്പെട്ടിരുന്നെങ്കിലും അനുകൂല നടപടി ഉണ്ടാകാത്തതിലെ പ്രതിഷേധം ജീവനക്കാർക്കിടയിൽ ശക്തമാണ്. സർക്കാർ നടപടികൾക്കെതിരേ പ്രതിഷേധം സംഘടിപ്പിക്കാനും അനധ്യാപക ജീവനക്കാരുടെ സംഘടനകൾ തീരുമാനിച്ചിട്ടുണ്ട്.

ഉത്തരവ് സംബന്ധിച്ച് രാഷ്ട്രീയസംഘടനകൾ പ്രതികരിക്കാത്ത സാഹചര്യത്തിൽ രാഷ്ട്രീയ ഇടപെടലുകൾക്കും സംഘടനകൾ  ശ്രമം നടത്തുന്നുണ്ട്.  എസ്.എസ്.എൽ.സി ചോദ്യപേപ്പറുകൾ ട്രഷറികളിൽ സൂക്ഷിക്കുമ്പോഴാണ് ഹയർസെക്കൻഡറി ചോദ്യപേപ്പറിന്റെ സുരക്ഷയ്ക്ക് ഒരു ജീവനക്കാരനെ സ്കൂൾ കോംപൗണ്ടിൽ നിയോഗിക്കുന്നത്.