കൊച്ചി: അമിതമായ വ്യായാമവും മാനസികസമ്മര്‍ദവും ജീവനെടുത്തേക്കാമെന്ന് കൊച്ചി ലൂര്‍ദ് ആശുപത്രിയിലെ ഹൃദ്രോഗ വിദഗ്ധന്‍ ഡോ.ജോര്‍ജ് തയ്യില്‍. സുപ്രാഭത്തോട് സംസാരിക്കുകയായിരുന്നു അദ്ദേഹം. ശരീരത്തിന് ആവശ്യമായതില്‍ കൂടുതല്‍ വ്യായാമം ഗുണത്തേക്കാളേറെ ദോഷം ഉണ്ടാക്കും. ഇതിന്റെ മറുപുറമാണ് മാനസികസമ്മര്‍ദവും. പുറമേ കാണാന്‍ കഴിയാത്ത സമ്മര്‍ദങ്ങള്‍ പാരമ്പര്യ ഹൃദ്രോഗസാധ്യതകള്‍ക്കൊപ്പം വില്ലനാകും. ജോലി സ്ഥലത്തും വീടിനകത്തും ഉണ്ടാകുന്ന സമ്മര്‍ദങ്ങള്‍ ഇന്ന് പ്രധാന വില്ലനാണെന്നും അദ്ദേഹം വ്യക്തമാക്കി.

സാധാരണ വ്യായാമത്തിനപ്പുറത്തേക്ക് പോകുമ്പോള്‍  ആരോഗ്യത്തെക്കുറിച്ചും ഓര്‍ക്കണം. അമിതമായ ഭാരം ഉയര്‍ത്തുന്ന വ്യായാമങ്ങള്‍ സ്ഥിരമാക്കുമ്പോള്‍ കൃത്യമായ രക്തസമ്മര്‍ദവും പ്രമേഹവും കൊളസ്‌ട്രോളും അടക്കമുള്ള കാര്യങ്ങളെക്കുറിച്ച് കൃത്യമായ പരിശോധനകള്‍ നടത്തണം. മദ്യപാനവും ലഹരിയും മയക്കുമരുന്നുകളുടെ ഉപയോഗവും ഹൃദ്രോഗത്തിന് പ്രധാനകരാണമാകുന്നു.

ലഹരിയുടെ ഉപയോഗം മാനസിക സമ്മര്‍ദമുള്‍പ്പെടെയുള്ളവയിലേക്കാണ് എത്തിക്കുക. ഇത്തരം കാര്യങ്ങള്‍ ഓരോ വ്യക്തികളേയും പിന്നീട് കുടുംബത്തെയും ബാധിക്കും. കേരളത്തില്‍ ഹൃദയാഘാതത്തിന് പ്രായം കുറഞ്ഞുവരികയാണ്.  മുന്‍പ് 60 ന് മുകളില്‍ പ്രായമായവരില്‍ കണ്ടിരുന്നു. ഇന്ന് 25 വയസ് മുതല്‍ കണ്ടുവരുന്നു. ചെറുപ്പക്കാരില്‍ ഹൃദയാഘാതം ഉണ്ടാകുന്നവരില്‍ 25 ശതമാനവും 30 വയസില്‍ താഴെയുള്ളവരാണ്.

മറ്റു സംസ്ഥാനങ്ങളെ അപേക്ഷിച്ച് ഹൃദ്രോഗസാധ്യതയും  കേരളത്തില്‍ കൂടുതലാണ്. ഇന്ത്യയില്‍ ഓരോ 33 സെക്കൻഡിലും ഒരാള്‍ ഹൃദയാഘാതം മൂലം മരണപ്പെടുമ്പോൾ കേരളത്തില്‍ ഇത് 25-30 ശതമാനമാണ്. കാര്യങ്ങള്‍ ഇങ്ങനെയാണെങ്കിലും പരിശോധനകളുടെ കാര്യത്തിൽ കേരളം മുന്നിലാണ്. പരിശോധന അത്യന്താപേക്ഷിതമാണെന്നും ഡോ. ജോര്‍ജ് തയ്യില്‍ വ്യക്തമാക്കി.