ചെറിയ മുടക്ക് മുതൽ, രുചിയുടെ കാര്യത്തിലോ മുൻപന്തിയിൽ കൂടാതെ പോഷക ഗുണങ്ങളും ഔഷധ ഗുണങ്ങളും, ഇങ്ങനെ വാ തോരാതെ സംസാരിക്കാനുണ്ട് കൂൺ കൃഷിയെ കുറിച്ച്. മികച്ച വരുമാനദാതാവ് കൂടെയാണ് കൂൺകൃഷി. ഗുണങ്ങളും നേട്ടങ്ങളും കൊണ്ട് സമ്പന്നമായ കൂണിന്റെ ലഭ്യത സംസ്ഥാനത്തുടനീളം ഉറപ്പാക്കുന്നതിനും കൂണിന്റെ വിതരണ ശൃംഖല ശക്തിപ്പെടുത്തുന്നതിനുമായി കൂൺ ഗ്രാമം എന്ന ബൃഹത് പദ്ധതിയുമായി രംഗത്തെത്തിയിരിക്കുകയാണ് കൃഷി വകുപ്പ്. പദ്ധതിയിലൂടെ 30 കോടിയിലധികം രൂപ ധനസഹായം നൽകിക്കൊണ്ട് സംസ്ഥാനത്തുടനീളം 100 കൂൺ ഗ്രാമങ്ങൾ സ്ഥാപിക്കാനൊരുങ്ങുകയാണ് കൃഷി വകുപ്പും സംസ്ഥാന ഹോർട്ടികൾച്ചർ മിഷനും. 

കൂൺ ഗ്രാമം പദ്ധതിയിൽ ജില്ലയിലെ ആദ്യത്തെ സംരംഭം വട്ടിയൂർക്കാവ് മണികണ്ഠേശ്വരത്ത് കൃഷി മന്ത്രി പി. പ്രസാദിന്റെ നേതൃത്വത്തിൽ ഉദ്‌ഘാടനവും ചെയ്തു. പോഷക ഔഷധ ഗുണങ്ങളുടെ കലവറയായ കൂൺ നമ്മുടെ ദൈനം ദിന ജീവിതത്തിലെ ഭക്ഷണക്രമത്തിന്റെ ഭാഗമാക്കുന്നതിലൂടെ ജീവിത ശൈലി രോഗങ്ങളോടൊപ്പം കാൻസർ പോലുള്ള മാരക രോഗങ്ങൾക്കെതിരെ പ്രതിരോധം തീർക്കാൻ നമ്മെ സഹായിക്കുമെന്നും കൃഷി മന്ത്രി പറഞ്ഞു. 

എന്താണ് കൂൺ ഗ്രാമം ?

100 ചെറുകിട കൂൺ ഉത്പാദന യൂണിറ്റുകളും, 2 വൻകിട കൂൺ ഉൽപ്പാദന യൂണിറ്റും, 1 കൂൺ വിത്തുത്പാദന യൂണിറ്റ്, 3 കൂൺ സംസ്കരണ യൂണിറ്റ്, 2 പാക്ക് ഹൗസ്, 10 കമ്പോസ്റ്റിങ് യൂണിറ്റ് എന്നിവയെല്ലാം ചേരുന്ന ഒരു ബ്രിഹത്തായ ശൃംഖലയാണ് കൂൺ ഗ്രാമം. കൂൺ ഗ്രാമത്തിന്റെ ഭാഗമായി ഫാം വേഗൻ മഷ്‌റൂം എന്ന പേരിൽ മണികണ്ഠേശ്വരത്ത് സർക്കാർ സഹായത്തോടെ കൂൺ ഉല്പാദന യൂണിറ്റിന് ആദ്യമായി തുടക്കം കുറിച്ചു അരുന്ധതി എന്ന യുവ വനിതാ കർഷകയും ശ്രദ്ധേയമായി. 

കൂടാതെ കാൻസറിനെ പ്രതിരോധിക്കുന്ന കൂൺ ഇനങ്ങളെ കുറിച്ച് പഠിക്കാനും ഗവേഷണം നടത്താനും അതിലൂടെ കൃഷി വ്യാപിപ്പിക്കുന്നതിനുമായി ഒരു സംഘത്തെ ഈ വർഷം തന്നെ ഹിമാചൽ പ്രദേശ് സോളനിലെ ഡയറക്ടറേറ്റ് ഓഫ് മഷ്‌റൂം റിസർച്ചിൽ ഒരു പരിശീലന പരിപാടിക്കായി അയക്കുന്നുണ്ടെന്ന വിവരവും മന്ത്രി പരിപാടിയിൽ വ്യക്തമാക്കി.സംഘത്തിൽ റീജിയണൽ കാൻസർ സെന്ററിലെ ഡോക്ടർമാരും കൃഷി വകുപ്പിലെ ഉദ്യോഗസ്ഥരും കൂൺ കൃഷി മേഖലയിലെ കർഷകരുമുണ്ടാകും.