ദുബൈ: രാജ്യത്തെ ഏഴു എമിറേറ്റുകളിലെയും എല്ലാത്തരം സ്‌കൂളുകളിലെയും അധ്യാപകരുടെ പ്രൊഫഷനല്‍ ലൈസന്‍സ് റദ്ദാക്കുന്നതിന് കാരണമായേക്കാവുന്ന ഏഴു പ്രധാന കാര്യങ്ങളെക്കുറിച്ച് വ്യക്തമാക്കിയിരിക്കുകയാണ് യുഎഇ വിദ്യാഭ്യാസ മന്ത്രാലയം. പ്രൊഫഷനല്‍ ലൈസന്‍സ് ചട്ടം കര്‍ശനമായി പാലിക്കുന്നുണ്ടെന്ന് ഉറപ്പാക്കുക, വിദ്യാഭ്യാസ നിലവാരം ഉയര്‍ത്തിപ്പിടിക്കുക, വിദ്യാഭ്യാ മേഖലയിലെ തെറ്റായ നയങ്ങള്‍ തടയുക എന്നതാണ് വിദ്യാഭ്യാസ മന്ത്രാലയത്തിന്റെ നീക്കം.

യുഎഇയിലെ അധ്യാപന ലൈസന്‍സുകള്‍ക്ക് അധ്യാപകരുടെ അനുഭവപരിചയവും പരീക്ഷാ ഫലങ്ങളും അനുസരിച്ച് രണ്ട് മുതല്‍ അഞ്ച് വര്‍ഷം വരെ സാധുതയുണ്ട്. അധ്യാപകര്‍ അവരുടെ ലൈസന്‍സിന്റെ  കാലാവധി കഴിയുന്നതിന് മുമ്പ് പുതുക്കലിനായി അപേക്ഷിക്കണം. പുതുക്കലിനായി അപേക്ഷിക്കുമ്പോള്‍ വീണ്ടും പരീക്ഷകള്‍ എഴുതേണ്ടി വന്നേക്കാം.

വിദ്യാഭ്യാസ മന്ത്രാലയത്തിന്റെ പ്രസ്താവന പ്രകാരം പ്രൊഫഷണല്‍ അധ്യാപന ലൈസന്‍സ് ശാശ്വതമായി റദ്ദാക്കാനുള്ള 7 കാരണങ്ങള്‍:

• യോഗ്യതാ പരീക്ഷകളില്‍ പരാജയപ്പെട്ടതു കാരണം: ലൈസന്‍സ് നേടുന്നതിനാവശ്യമായ യോഗ്യതാ പരീക്ഷകളില്‍ പരാജയപ്പെടുന്ന അധ്യാപകരുടെ ലൈസന്‍സ് റദ്ദാക്കും.
• നിയമവിരുദ്ധമായി ലൈസന്‍സ് നേടിയത് കാരണം: അധ്യാപന ലൈസന്‍സ് വഞ്ചനാപരമായോ വ്യാജമായോ സമ്പാദിച്ചാല്‍ ലൈസന്‍സ് എന്നെന്നേക്കുമായി റദ്ദാക്കും.
• നിയമലംഘനങ്ങള്‍ മൂലമുള്ള പിരിച്ചുവിടല്‍ മൂലം: ഭരണപരമായ ലംഘനങ്ങള്‍ മൂലമോ കോടതി വിധി മൂലമോ അധ്യാപക സ്ഥാനത്ത് നിന്ന് പിരിച്ചുവിടല്‍.
• മറ്റൊരു രാജ്യത്ത് നിന്ന് സസ്‌പെന്‍ഡ് ചെയ്തതോ റദ്ദാക്കിയതോ ആയ ലൈസന്‍സ്: ഏതെങ്കിലും വിദേശ സര്‍ക്കാര്‍ റദ്ദാക്കിയതോ താല്‍ക്കാലികമായി മരവിപ്പിച്ചതോ ആയ അധ്യാപന ലൈസന്‍സ് കൈവശം വയ്ക്കല്‍ മൂലം ലൈസന്‍സ് റദ്ദാക്കും.
• പരീക്ഷാ തട്ടിപ്പ്: പരീക്ഷാ ഉള്ളടക്കം ചോര്‍ത്തുന്നതിലോ വഞ്ചിക്കുന്നതിലോ പങ്കാളിത്തം മൂലവും ലൈസന്‍സ് റദ്ദാക്കും.
• വ്യാജ രേഖകള്‍ നിര്‍മ്മിക്കല്‍: അധ്യാപന ലൈസന്‍സ് നേടുന്നതിനോ പുതുക്കുന്നതിനോ വേണ്ടി വ്യാജ രേഖകള്‍ നിര്‍മ്മിക്കുന്നതും ലൈസന്‍സ് റദ്ദാക്കാനുള്ള കാരണമാണ്.
• ധാര്‍മ്മിക ലംഘനങ്ങള്‍: അധ്യാപന തൊഴിലിന്റെ ധാര്‍മ്മികത തകര്‍ക്കുന്ന പെരുമാറ്റങ്ങള്‍.
• ഒരിക്കല്‍ ഒരു അധ്യാപകന്റെ ലൈസന്‍സ് റദ്ദാക്കപ്പെട്ടാല്‍, അവര്‍ക്ക് മറ്റൊരു ലൈസന്‍സ് നേടുന്നതിനോ യുഎഇ വിദ്യാഭ്യാസ മേഖലയിലെ ഏതെങ്കിലും സ്‌കൂളിലോ ജോലി ചെയ്യുന്നതിനോ വിലക്കുണ്ടാകും. റദ്ദാക്കപ്പെട്ട ലൈസന്‍സ് നമ്പറും അതിന്റെ സ്റ്റാറ്റസും ഉള്‍പ്പെടെ റദ്ദാക്കിയ എല്ലാ ലൈസന്‍സുകളുടെയും വ്യക്തമായ ഒരു ഇലക്ട്രോണിക് രേഖ മന്ത്രാലയം സൂക്ഷിക്കാറുണ്ട്.                                                                                                                      The UAE Ministry of Education has outlined seven specific reasons that could lead to the revocation of a teacher's license.