കൊൽക്കത്ത: 2024-25 ഇന്ത്യൻ വനിത ലീഗിലെ ആദ്യ വിജയം സ്വന്തമാക്കി ഗോകുലം കേരള എഫ്സി. ശ്രീഭൂമി എഫ്‌സിയെ ഒന്നിനെതിരെ അഞ്ചു ഗോളുകൾക്കാണ് ഗോകുലം പരാജയപ്പെടുത്തിയത്. ഉഗാണ്ടൻ സ്‌ട്രൈക്കർ ഫാസില നാല് ഗോളുകൾ എതിരാളികളുടെ വലയിൽ എത്തിച്ചുകൊണ്ട് മിന്നും പ്രകടനമാണ് നടത്തിയത്. 

മത്സരം തുടങ്ങി 17ാം സെക്കൻഡിൽ തന്നെ ഫാസില തന്റെ ഗോളടി മേളം തുടങ്ങി. ടൂർണമെന്റ് ചരിത്രത്തിലെ ഏറ്റവും വേഗതയേറിയ ഗോളാണിത്. മത്സരത്തിന്റെ 23ാം മിനിറ്റിൽ റിമ്പ ഹൽദാർ ശ്രീഭൂമിക്കായി ഗോൾ നേടി. എന്നാൽ 41ാം മിനിറ്റിൽ ഫാസിലയിലൂടെ ഗോകുലം വീണ്ടും മുന്നിൽ എത്തുകയായിരുന്നു.

ആദ്യ പകുതി അവസാനിക്കുന്നതിനു മുന്നോടിയായി ശുഭാംഗിയുടെ ഗോളിലൂടെ ഗോകുലം മൂന്നാം ഗോളും സ്വന്തമാക്കി. ഒടുവിൽ ആദ്യ പകുതി 3-1ന് ഗോകുലം മുന്നിൽ എത്തുകയായിരുന്നു. മത്സരത്തിന്റെ രണ്ടാം പകുതിയിൽ 56, 72 എന്നീ മിനിറ്റുകളിൽ ഫാസില ഇരട്ടഗോൾ നേടിക്കൊണ്ട് ടീമിനെ വിജയത്തിലെത്തിക്കുകയായിരുന്നു. 

ജയത്തോടെ മൂന്ന് മത്സരങ്ങളിൽ നിന്നും അഞ്ചു പോയിന്റുമായി രണ്ടാം സ്ഥാനത്തെത്താനും ഗോകുലത്തിനു സാധിച്ചു. ജനുവരി 26ന് ഹോപ്സ് ക്ലബ്ബിനെതിരെയാണ് ഗോകുലത്തിന്റെ അടുത്ത മത്സരം. ഗോകുലത്തിന്റെ തട്ടകമായ കോഴിക്കോട് കോർപ്പറേഷൻ സ്റ്റേഡിയത്തിലാണ് മത്സരം നടക്കുക.