തിരുവനന്തപുരം: നിയമസഭയില്‍ പ്രകോപിതനായി പ്രതിപക്ഷ നേതാവ് വിഡി സതീശന്‍. പ്രതിപക്ഷനേതാവിന്റെ പ്രസംഗത്തിനിടെ ഭരണപക്ഷം വലിയതോതില്‍ ബഹളം വച്ചതാണ് അദ്ദേഹത്തെ ചൊടിപ്പിച്ചത്. എന്തു തെമ്മാടിത്തമാണ്  കാട്ടുന്നതെന്ന് ചോദിച്ച് രോഷാകുലനായ പ്രതിപക്ഷനേതാവ് കയ്യിലുണ്ടായിരുന്ന  പേപ്പര്‍ മേശപ്പുറത്ത് വലിച്ചെറിഞ്ഞു. 

കലാ രാജുവുമായി ബന്ധപ്പെട്ട വിഷയത്തില്‍ അടിയന്തര പ്രമേയത്തിന് അനുമതി നിഷേധിച്ചതിന് പിന്നാലെ നടത്തിയ പ്രസംഗത്തിനിടെയാണ് നാടകീയ സംഭവങ്ങള്‍. 

പ്രതിപക്ഷം നടുത്തളത്തിലിറങ്ങി പ്രതിഷേധിച്ചു. പ്രതിപക്ഷനേതാവ് പ്രകോപിതനാവരുതെന്ന് പറഞ്ഞ സ്പീക്കര്‍ ഭരണപക്ഷത്തെ നിയന്ത്രിക്കാനാവാതെ നിസ്സഹായനായി. ബഹളംവച്ച കാനത്തില്‍ ജമീലയുടെ പേരെടുത്ത് പറഞ്ഞ സ്പീക്കര്‍, അങ്ങ് സീനിയറല്ലേ, പ്രകോപിതനാകരുതെന്ന് വി.ഡി.സതീശനോട് പറഞ്ഞു. സ്പീക്കര്‍ സഭയില്‍ ബഹളത്തിന് കൂട്ടുനില്‍ക്കുന്നുവെന്നായിരുന്നു ഇതിനോടുള്ള  പ്രതിപക്ഷനേതാവിന്റെ പ്രതികരണം. പക്വതയോടെ പെരുമാറണമെന്ന് സ്പീക്കര്‍ തിരിച്ചടിച്ചു.  അത് പഠിപ്പിക്കേണ്ടെന്നായിരുന്നു സതീശന്റെ മറുപടി. 

സ്പീക്കര്‍ക്ക് എതിരായ സതീശന്റെ പ്രസ്താവന ശരിയായില്ലെന്ന് മുഖ്യമന്ത്രിയും പറഞ്ഞു. ഭരണപക്ഷം താന്‍ പറഞ്ഞിട്ടും കേള്‍ക്കുന്നില്ലെന്ന് സ്പീക്കര്‍ പറയുന്നത് വല്ലാത്ത അവസ്ഥയെന്ന് പി.കെ.കുഞ്ഞാലിക്കുട്ടി പറഞ്ഞു. കാലുമാറിയവരെ കൂറുമാറ്റനിയമം വഴി നേരിടണം, അല്ലാതെ ചുമന്നുകൊണ്ടുപോകണോ എന്നും കുഞ്ഞാലിക്കുട്ടി ചോദിച്ചു.