രാജ്കോട്ട്: അയർലാൻഡ് വിമാനസിനെതിരായ ഏകദിന പരമ്പര 3-0ത്തിന് സർവ്വാധിപത്യത്തോടെ സ്വന്തമാക്കിയിരിക്കുകയാണ് ഇന്ത്യ. പരമ്പരയിലുടനീളം തകർപ്പൻ പ്രകടനമാണ് ഇന്ത്യൻ താരം പ്രതിക റാവൽ നടത്തിയത്. അവസാന മത്സരത്തിൽ സെഞ്ച്വറി നേടിയാണ് പ്രതിക തിളങ്ങിയത്. 129 പന്തിൽ 154 റൺസാണ് പ്രതീക നേടിയത്. 20 ഫോറുകളും ഒരു സിക്സുമാണ് താരം നേടിയത്. ഈ മിന്നും പ്രകടനങ്ങൾക്ക് പിന്നാലെ ലോകക്രിക്കറ്റിന്റെ ചരിത്രത്തിൽ തന്റെ പേര് എഴുതി ചേർക്കാനും പ്രതികക്ക് സാധിച്ചു. 

വനിതാ ഏകദിനത്തിൽ ആദ്യ ആറ് ഇന്നിങ്‌സുകളിൽ നിന്നും ഏറ്റവും കൂടുതൽ റൺസ് നേടുന്ന താരമായാണ് പ്രതിക മാറിയത്. ആറ് ഇന്നിഗ്‌സുകളിൽ നിന്നുമായി 444 റൺസാണ് പ്രതിക അടിച്ചെടുത്തത്. 434 റൺസ് നേടിയ മുൻ ഇംഗ്ലണ്ട് താരം ചാർലോട്ടെ എഡ്വേർസിന്റെ റെക്കോർഡാണ് പ്രതിക തകർത്തത്. 322 റൺസ് നേടിയ തായ്‌ലൻഡിൻ്റെ നത്തങ്കൻ ചന്തത്താണ് മൂന്നാം സ്ഥാനത്തുള്ളത്. 

അവസാന ഏകദിനത്തിൽ 304 റൺസിന്റെ വമ്പൻ വിജയമാണ് ഇന്ത്യ നേടിയത്. ആദ്യം ബാറ്റ് ചെയ്ത ഇന്ത്യ അഞ്ചു വിക്കറ്റ് നഷ്ടത്തിൽ 435 എന്ന കൂറ്റൻ ടോട്ടലാണ് നേടിയത്. വിജയലക്ഷ്യം പിന്തുടർന്ന അയർലാൻഡ് 131 റൺസിന്‌ പുറത്താവുകയായിരുന്നു.  

ഇന്ത്യക്കായി പ്രതികക്ക് പുറമെ സ്‌മൃതി മന്ദാനയും സെഞ്ച്വറി നേടി. 80 പന്തിൽ നിന്നും 135 റൺസാണ് സ്‌മൃതി നേടിയത്. 12 ഫോറുകളും രണ്ട് സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്. റിച്ച ഘോഷ് അർദ്ധ സെഞ്ച്വറിയും നേടി. 42 പന്തിൽ 59 റൺസാണ് റിച്ച നേടിയത്. 10 ഫോറുകളും ഒരു സിക്സുമാണ് താരം നേടിയത്.