മസ്‌കത്ത്: ഗസ്സയില്‍ കുഞ്ഞുങ്ങളെയും സ്ത്രീകളെയും അടക്കം കൂട്ടക്കൊല ചെയ്യുന്ന സയണിസ്റ്റ് രാജ്യത്തിന് സാമ്പത്തിക സഹായം നല്‍കിയ ഫ്രഞ്ച് റീട്ടെയില്‍ ഭീമന്‍മാരായ കാരിഫോര്‍ ശൃംഖലയുടെ (Carrefour) ഒമാനിലെ എല്ലാ ശാഖകളും അടച്ചുപൂട്ടി. നവംബറില്‍ ജോര്‍ദാനിലെ പ്രവര്‍ത്തനങ്ങള്‍ അവസാനിപ്പിച്ചതിന് ശേഷമാണ് ഇസ്‌റാഈല്‍ അനുകൂല നിലപാടിന്റെ പേരില്‍ കാരിഫോറിന് ഇപ്പോള്‍ ഒമാനിലെ എല്ലാ ശാഖകളും അടച്ചുപൂട്ടേണ്ടിവന്നത്. യു.എ.ഇയിലെ വമ്പന്‍ ഗ്രൂപ്പായ അല്‍ഫുതൈം ആണ് കാരിഫോറിന്റെ ഷോപ്പുകള്‍ ഒമാനില്‍ നടത്തിയിരുന്നത്. 

കഴിഞ്ഞദിവസമാണ് ഒമാനിലെ എല്ലാ പ്രവര്‍ത്തനങ്ങളും അവസാനിപ്പിച്ചതായും ഉപഭോക്താക്കള്‍ക്ക് നന്ദി പറയുന്നതായും അറിയിച്ച് കാരിഫോര്‍ പ്രസ്താവന ഇറക്കിയത്. ഗള്‍ഫ് മേഖലയിലെ ഏറ്റവും പ്രമുഖ സൂപ്പര്‍മാര്‍ക്കറ്റ് ശൃംഖലകളില്‍ ഒന്നാണ് കാരിഫോര്‍. പതിറ്റാണ്ടുകളിലുടനീളം തുടരുന്ന പിന്തുണയ്ക്ക് കമ്പനി സോഷ്യല്‍മീഡിയയിലൂടെ നന്ദി പറയുകയും ചെയ്തു. ഇസ്‌റാഈല്‍ ഗസ്സയില്‍ നടത്തിവരുന്ന വംശഹത്യക്ക് സഹായം നല്‍കിയതിനെ തുടര്‍ന്ന് നടത്തിയ ബഹിഷ്‌കരണ കാംപയിന്‍ ആണ് ഇതോടെ വിജയം കണ്ടതെന്ന് ബഹിഷ്‌കരണാഹ്വാനം നടത്തിയ ബി.ഡി.എസ് മൂവ്‌മെന്റ് (Boycott, Divestment and Sanctions (BDS) അറിയിച്ചു. ഇസ്‌റാഈല്‍ ഭരണകൂടത്തിന് പിന്തുണ നല്‍കുന്ന കമ്പനികളെ അന്താരാഷ്ട്ര നിയമം പാലിക്കാന്‍ നിര്‍ബന്ധിക്കുന്ന പ്രസ്ഥാനമാണ് ബി.ഡി.എസ്. അതേസമയം, ഗള്‍ഫ് രാഷ്ട്രത്തിലെ പ്രവര്‍ത്തനങ്ങള്‍ നിര്‍ത്തലാക്കാനുള്ള തീരുമാനത്തെക്കുറിച്ച് കാരിഫോര്‍ പ്രത്യേകിച്ചൊരു കാരണവും പറഞ്ഞിട്ടില്ല. 

 

 

ഫലസ്തീനില്‍ ഇസ്‌റാഈല്‍ തുടരുന്നത് നിയമവിരുദ്ധമാണെന്നും അതിന് പിന്തുണ നല്‍കുന്നത് തടയണമെന്നും ഹേഗ് ആസ്ഥാനമായ രാജ്യാന്തര കോടതി (ICJ) 2024 ജൂലൈയില്‍ ഉത്തരവിറക്കിയിരുന്നു. ഈ സാഹചര്യത്തില്‍ അധിനിവേശ സൈന്യത്തിന് നല്‍കുന്ന ഓരോ സഹായവും അന്താരാഷ്ട്ര നിയമങ്ങളുടെ ലംഘനമാണെന്ന് ചൂണ്ടിക്കാട്ടിയാണ് BDS കാരിഫോറിനെ ബഹിഷ്‌കരിക്കേണ്ട കമ്പനികളുടെ പട്ടികയില്‍ ഉള്‍പ്പെടുത്തിയത്. ബഹിഷ്‌കാരണാഹ്വാനം ഉണ്ടായതോടെ വിവിധ രാജ്യങ്ങളിലെ കാരിഫോര്‍ ഔട്ട്‌ലെറ്റുകള്‍ക്ക് മുന്നില്‍ ഫലസ്തീന്‍ അനുകൂലികള്‍ പ്രതിഷേധിച്ചിരുന്നു. ഇതോടെ കാരിഫോറിന്റെ പ്രതിദിന ബിസിനസ് ഗണ്യമായി കുറയുകയുംചെയ്തു. അറബ് ലോകത്തുള്‍പ്പെടെയുള്ള ഔട്ട്‌ലെറ്റുകളില്‍ ആളുകള്‍ കയറാതെയുമായതോടെയാണ് അടച്ചുപൂട്ടേണ്ടിവന്നത്. ലോകമെമ്പാടും 3400 ഷോപ്പുകളാണ് ഈ കമ്പനിക്കുള്ളത്.

boycott divestment and sanctions (bds) movement

 

ഗസ്സയില്‍ കൂട്ടക്കൊല നടത്തിവരുന്ന സയണിസ്റ്റ് സൈനികര്‍ക്ക് കാരിഫോര്‍ സമ്മാനപൊതികള്‍ കൊടുത്തയച്ചത് വലിയ വിവാദമായിരുന്നു. കമ്പനി സൈനികര്‍ക്കായി സംഭാവന പിരിക്കാനും തുടങ്ങിയതോടെയാണ് ബഹിഷ്‌കരണം ശക്തിപ്പെട്ടത്.

അമേരിക്കന്‍ കമ്പനിയായ എച്ച്.പി, ഷെവ്‌റോണ്‍, പിസ്സ ഹട്ട്, കാള്‍ട്ടെക്‌സ്, ജര്‍മന്‍ കമ്പനിയായ സീമെന്‍സ്, പുമ, ഇന്‍ഷുറന്‍സ് കമ്പനിയായ എഎക്‌സ്എ, ഇന്റല്‍, ഹുണ്ടായ്, വോള്‍വോ, കാറ്റ്, ജെസിബി, ബാര്‍ക്ലേയ്‌സ്, ഗൂഗ്ള്‍, ആമസോണ്‍, എയര്‍ബിഎന്‍ബി, എക്‌സ്പീഡിയ, ഡിസ്‌നി, മക്‌ഡൊണാള്‍ഡ്‌സ്, ബര്‍ഗര്‍ കിങ്, പാപ്പ ജോണ്‍സ് തുടങ്ങിയവയാണ് ബഹിഷ്‌കരണം നേരിടുന്ന BDS ന്റെ പട്ടികയിലുള്ള മറ്റു കമ്പനികള്‍.

Carrefour closes all branches in Jordan and Oman