ജിദ്ദ: സ്പാനിഷ് സൂപ്പർകപ്പ് ഫൈനലിൽ റയൽ മാഡ്രിഡും ബാഴ്‌സലോണയും നേർക്കുനേർ എത്തും. ജനുവരി 13ന് കിംഗ് അബ്ദുള്ള സ്പോർട്സ് സിറ്റി സ്റ്റേഡിയത്തിലാണ് ആവേശകരമായ മത്സരം നടക്കുക. സെമി ഫൈനലിൽ മല്ലോർക്കയെ എതിരില്ലാത്ത മൂന്ന് ഗോളുകൾക്ക് വീഴ്ത്തിയാണ് റയൽ മാഡ്രിഡ് കലശപോരാട്ടത്തിന് ടിക്കറ്റ് എടുത്തത്. 

മത്സരത്തിൽ ആദ്യപകുതിയിൽ ഇരുടീമുകൾക്കും ഗോളുകൾ നേടാൻ സാധിച്ചിരുന്നില്ല. 63ാം മിനിറ്റിൽ ജൂഡ് ബെല്ലിങ്ഹാമാണ് റയലിന്റെ ഗോളടി മേളക്ക് തുടക്കം കുറിച്ചത്. പിന്നീട് ഇഞ്ചുറി ടൈമിൽ ആയിരുന്നു റയലിന്റെ ശേഷിക്കുന്ന രണ്ട് ഗോളുകൾ പിറന്നത്. മാർട്ടിൻ വാൽജെന്റിന്റെ ഓൺ ഗോളിലൂടെ റയൽ രണ്ടാം ഗോൾ നേടി. റോഡ്രിഗോയുടെ ഗോളിലൂടെ റയൽ മത്സരം പൂർണമായും സ്വന്തമാക്കുകയായിരുന്നു.

സെമിയിൽ അത്ലറ്റിക് ക്ലബ്ബിനെ എതിരില്ലാത്ത രണ്ട് ഗോളിന് വീഴ്ത്തിയാണ് ബാഴ്‌സലോണ ഫൈനൽ യോഗ്യത ഉറപ്പിച്ചത്. മത്സരത്തിൽ ഗാവിയും ലാമിനെ യമാലുമാണ് ബാഴ്‌സക്കായി ഗോളുകൾ നേടിയത്. ആദ്യപകുതിയിൽ ഗാവിയുടെ ഗോളിലൂടെ ബാഴ്സ മുന്നിലെത്തുകയായിരുന്നു. ഒടുവിൽ രണ്ടാം പകുതിയിൽ യമാലും ഗോൾ നേടിയതോടെ കറ്റാലന്മാർ ഫൈനലിലേക്ക് മുന്നേറുകയായിരുന്നു.