സിഡ്‌നി: ഓസ്‌ട്രേലിയക്കെതിരായ അവസാന ടെസ്റ്റിലെ രണ്ടാം ഇന്നിംഗ്‌സിൽ അർദ്ധ സെഞ്ച്വറി നേടി തിളങ്ങി റിഷബ് പന്ത്. 33 പന്തിൽ 61 റൺസ് നേടിയാണ് പന്ത് മടങ്ങിയത്. 184.85 പ്രഹരശേഷിയിൽ ആറ് ഫോറുകളും നാല് സിക്സുകളുമാണ് പന്ത് നേടിയത്. ടെസ്റ്റ് ഫോർമാറ്റിൽ ടി-20 മോഡിലായിരുന്നു പന്തിന്റെ ബാറ്റിംഗ്. 29 പന്തിൽ നിന്നുമാണ് പന്ത് തന്റെ ഫിഫ്റ്റി പൂർത്തിയാക്കിയത്. 

ഇതിനു മുമ്പും പന്ത് ടെസ്റ്റിൽ ഇത്തരത്തിലുള്ള ഇന്നിംഗ്സ് കളിച്ചിട്ടുണ്ട്. 2022ൽ ബാംഗ്ലൂർ ചിന്നസ്വാമി സ്റ്റേഡിയത്തിൽ നടന്ന മത്സരത്തിൽ ശ്രീലങ്കക്കെതിരെ 28 പന്തിൽ നിന്നും അർദ്ധ സെഞ്ച്വറി നേടിയിരുന്നു. ഇതോടെ ടെസ്റ്റ് ക്രിക്കറ്റിൽ 30 പന്തുകളിൽ താഴെ നേരിട്ടുകൊണ്ട് രണ്ട് തവണ ഫിഫ്റ്റി നേടുന്ന ആദ്യ താരമായാണ് പന്ത് മാറിയത്. 

മത്സരത്തിൽ ആദ്യ ഇന്നിഗ്‌സിൽ ഓസ്‌ട്രേലിയ 181 റൺസിനാണ് പുറത്തായത്. ഇന്ത്യൻ ബൗളിങ്ങിൽ ഇന്ത്യൻ ബൗളിംഗിൽ പ്രസീദ് കൃഷ്ണ, മുഹമ്മദ് സിറാജ് എന്നിവർ മൂന്ന് വിക്കറ്റുകൾ നേടി തിളങ്ങിയപ്പോൾ ജസ്പ്രീത് ബുംറ, നിതീഷ് കുമാർ റെഡ്ഢി എന്നിവർ രണ്ട് വിക്കറ്റുകളും നേടി. ഓസ്‌ട്രേലിയക്കായി ബ്യൂ വെബ്‌സ്റ്റർ അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്. 105 പന്തിൽ 57 റൺസാണ് താരം നേടിയത്. സ്റ്റീവ് സ്മിത്ത് 57 പന്തിൽ 33 റൺസും നേടി.