തൃശൂര്‍: വഞ്ചിയൂര്‍ സി.പി.എം ഏരിയാ സമ്മേളനത്തിന് റോഡില്‍ സ്‌റ്റേജ് കെട്ടിയതിനെ ന്യായീകരിച്ച് പൊളിറ്റ്ബ്യൂറോ അംഗം എ.വിജയരാഘവന്‍. അല്ലെങ്കില്‍ ട്രാഫിക് ജാം ഇല്ലേ? എല്ലാവരും കാറില്‍ പോകേണ്ട ആവശ്യമുണ്ടോ നടന്നു പോയാല്‍ പോരെ എന്ന് അദ്ദേഹം ചോദിച്ചു. കാര്‍ ഉള്ളവര്‍ കാറില്‍ പോകുന്നതുപോലെ പാവപ്പെട്ടവര്‍ക്ക് ജാഥ നടത്താനും അവകാശം അനുവദിച്ച് നല്‍കണമെന്ന് എ വിജയരാഘവന്‍ പറഞ്ഞു.

വിഷയത്തില്‍ കോടതിയുടെ ഇടപെടലിന് പിന്നാലെ പൊലിസ് കേസെടുത്തിരുന്നു. ഇതിനെ വിമര്‍ശിച്ചാണ് എ വിജയരാഘവന്റെ പരാമര്‍ശം. തൃശൂര്‍ കേച്ചേരിയില്‍ കുന്നംകുളം ഏരിയാ സമ്മേളനത്തിലായിരുന്നു വിചിത്രവാദം. 

ഗ്രൗണ്ട് കിട്ടാത്തതുകൊണ്ട് റോഡ് വക്കത്ത് ഒരു സ്റ്റേജ് കെട്ടി. അതിന്റെ പേരില്‍ കേസെടുക്കാന്‍ സുപ്രീംകോടതിയില്‍ പോയി. അല്ലെങ്കില്‍ നാട്ടില്‍ ട്രാഫിക് ജാമില്ലേ? 10 കാര്‍ പോകാന്‍ എത്ര സ്ഥലം വേണം? ഇവരെല്ലാരും കൂടി കാറില്‍ പോകേണ്ട കാര്യണ്ടോ, നടന്ന് പോയാല്‍ പോരേ? പണ്ടൊക്കെ നമ്മള്‍ നടന്നുപോകാറില്ലേ? ഇത്ര വല്യ കാറ് വേണോ? ചെറിയ കാറില്‍ പോയാ പോരേ?. വിജയരാഘവന്‍ ചോദിച്ചു.

മെല്ലെ ഇങ്ങനെ ഉരുട്ടി പോണുണ്ടാകും. ഞായറാഴ്ച തിരക്ക് കുറവാണ്. അമ്മായിയമ്മയുടെ വീട്ടിലും മറ്റും പോവുകയാണ്. കാര്യം പറഞ്ഞും സല്ലപിച്ചും പതിയെ പോകും. അത്യാവശ്യത്തിന് പോകുന്നവര്‍ വളരെ കുറവാണ്. ഞാനതിന് എതിരൊന്നുമല്ല. കാറുള്ളവന്‍ കാറില്‍ പോകും. കാറുള്ളവന്‍ കാറില്‍ പോകുന്നതുപോലെ തന്നെ പാവങ്ങള്‍ക്ക് ഒരു ജാഥ നടത്താനുള്ള സ്വാതന്ത്ര്യം അനുവദിച്ചുതരണമെന്ന് വളരെ വിനയപൂര്‍വം ഞാന്‍ അഭ്യര്‍ഥിക്കുകയാണ്.- വിജയരാഘവന്‍ പറഞ്ഞു.