കൊച്ചി: എംഡിഎംഎയുമായി യുവാവ് പിടിയില്‍. പോത്താനിക്കോട് ഞാറക്കാട് കണ്ണന്തറയില്‍ അഭിരാജ് (29)നെയാണ് എറണാകുളം റൂറല്‍ ജില്ല ഡാന്‍സാഫ് സംഘവും, കാലടി പൊലിസും ചേര്‍ന്ന് പിടികൂടിയത്. ഇയാളുടെ പക്കല്‍ നിന്നും 300 ഗ്രാം എം.ഡി.എം.എ പിടിച്ചെടുത്തു. 

ജില്ല പൊലിസ് മേധാവി ഡോ. വൈഭവ് സക്‌സേനയ്ക്ക് ലഭിച്ച രഹസ്യവിവരത്തിന്റെ അടിസ്ഥാനത്തില്‍ ചന്ദ്രപ്പുര ഭാഗത്ത് നിന്നുമാണ് പൊലിസ് ഇയാളെ പിടികൂടിയത്. ബെംഗളൂരുവില്‍ നിന്ന് കാറില്‍ വരികയായിരുന്ന യുവാവ് പൊലിസ് കൈ കാണിച്ചെങ്കിലും വാഹനം നിര്‍ത്താതെ അമിത വേഗത്തില്‍ ഓടിച്ചുപോവുകയായിരുന്നു. പൊലിസ് സംഘം പിന്തുടര്‍ന്നതോടെ ഇയാള്‍ വാനം ഉപേക്ഷിച്ച് ഓടി രക്ഷപ്പെടാന്‍ ശ്രമിച്ചു. 

പ്രതി ധരിച്ചിരുന്ന ജാക്കറ്റിനുള്ളിലെ പ്രത്യേക അറയിലാണ് രാസലഹരി സൂക്ഷിച്ചിരുന്നത്. ഇതിന് 20 ലക്ഷത്തോളം രൂപവില വരും. 2023ല്‍ പോത്താനിക്കാട് നിന്ന് 20 കിലോ കഞ്ചാവ് പിടികൂടിയ കേസിലെ പ്രതിയാണ് അഭിരാജ്. നാര്‍ക്കോട്ടിക് സെല്‍ ഡി.വൈ.എസ്.പി പി.പി ഷംസ്, എസ്.ഐമാരായ ജോസി എം ജോണ്‍സണ്‍, ടിവി സുധീര്‍, സീനിയര്‍ സിപിഒമാരായ എം.പി ജിന്‍സന്‍, ഷിജോ പോള്‍, ഷിബു അയ്യപ്പന്‍ എന്നിവരാണ് അന്വേഷണ സംഘത്തിലുള്ളത്.  

Youth arrested with MDMA in Kochi