ഷിരൂര്‍:  ഷിരൂര്‍ മണ്ണിടിച്ചില്‍ കാണാതായ ലോറി ഡ്രൈവര്‍ അര്‍ജുനായുള്ള തിരച്ചില്‍ 12ാം ദിവസവും ഫലം കണ്ടില്ല. ഇന്നത്തെ തെരച്ചില്‍ അവസാനിപ്പിച്ചു. രക്ഷാ ദൗത്യത്തിന് ഇരുട്ട് പ്രതിസന്ധി. അര്‍ജുന്റേതെന്ന് കരുതുന്ന ട്രക്ക് ഉണ്ടെന്ന് ഉറപ്പിച്ച പോയിന്റ് നമ്പര്‍ ഫോറിലാണ് പരിശോധനകള്‍ ഇന്ന് നടന്നത്. ഈശ്വര്‍ മാല്‍പെയുടെ നേതൃത്വത്തിലുള്ള മുങ്ങല്‍ വിദഗ്ധരാണ് ഇന്ന് പരിശോധന നടത്തിയിരുന്നത്.

ഇന്നത്തെ തെരച്ചില്‍ വിഫലമെന്ന് കാര്‍വാര്‍ കാര്‍വാര്‍ എംഎല്‍എ സതീഷ് കൃഷ്ണ സെയില്‍ പറഞ്ഞു. ഈശ്വര്‍ മാല്‍പെ നാളെയും തുടരുമോയെന്ന് കൂടിയാലോചിച്ച് തീരുമാനിക്കും. ചെളിയും മണ്ണും മരവും പ്രശ്‌നമാകുന്നുണ്ടെന്ന് എംഎല്‍എ പറഞ്ഞു. ബുദ്ധിമുട്ടേറിയ സാഹചര്യത്തിലാണ് തെരച്ചില്‍ നടത്തിയതെന്നും ഒഴുക്ക് ശക്തമാണെന്നും എംഎല്‍എ പറഞ്ഞു.മാര്‍ക്ക് ചെയ്ത മുഴുവന്‍ സ്ഥലവും ഇന്ന് പരിശോധിച്ചെന്ന് സതീഷ് കൃഷ്ണ സെയില്‍ വ്യക്തമാക്കി.