തിരൂർ: സംസ്ഥാനത്തെ പൊതുവിദ്യാലയങ്ങളിൽ പഠിക്കുന്ന വിദ്യാർഥികൾക്ക് 2024-25 അധ്യയന വർഷം മുതൽ നാഷനൽ സ്കോളർഷിപ്പ് പാേർട്ടൽ (എൻ.എസ്.പി) മുഖേന സ്കോളർഷിപ്പ് അപേക്ഷ സമർപ്പിക്കാൻ ഒറ്റത്തവണ രജിസ്ട്രേഷൻ നമ്പർ നിർബന്ധമാക്കി. കഴിഞ്ഞ ദിവസമാണ് പൊതുവിദ്യാഭ്യാസ ഡയരക്ടർ ഇതുമായി ബന്ധപ്പെട്ട് സർക്കുലർ ഇറക്കിയത്.

കേന്ദ്ര വിദ്യാഭ്യാസ മന്ത്രാലയത്തിൻ്റെ തീരുമാനപ്രകാരമാണിത് നടപ്പിലാക്കുന്നത്. ഒറ്റത്തവണ രജിസ്ട്രേഷൻ ചെയ്യുന്നതിലൂടെ ലഭിക്കുന്ന നമ്പർ ഉപയോഗിച്ച് ഒരു കുട്ടിക്ക് പഠനകാലയളവിലുടനീളം നാഷനൽ സ്കോളർഷിപ്പ് പോർട്ടലിലെ സ്കോളർഷിപ്പ് സംബന്ധമായ എല്ലാ സേവനങ്ങളും ലഭ്യമാക്കാനാകും. ഇതിനായി സ്കോളർഷിപ്പ് പോർട്ടലിൻ്റെ സോഫ്റ്റ് വെയർ അപ്ഡേറ്റ് ചെയ്തിട്ടുണ്ട്.

 കഴിഞ്ഞ വർഷം പോർട്ടൽ മുഖേന സ്കോളർഷിപ്പ് അപേക്ഷ സമർപ്പിച്ചവർക്ക് ഒറ്റത്തവണ രജിസ്ട്രേഷൻ നമ്പർ ജനറേറ്റ് ചെയ്യാനായി NSPOTR എന്ന മൊബൈൽ ആപ്പ് ഡൗൺലോഡ് ചെയ്യാനും ഫെയ്സ് ഓതൻ്റിക്കേഷൻ ചെയ്യാനും ആവശ്യപ്പെട്ട് മൊബൈൽ വഴി സന്ദേശം ലഭ്യമാക്കിയിട്ടുണ്ട്. എന്നാൽ 2024-25 വർഷം മുതൽ പുതുതായി സ്കോളർഷിപ്പിന് അർഹത നേടുന്നവർ ഒറ്റത്തവണ രജിസ്ട്രേഷൻ ചെയ്യണമെന്നും സർക്കുലറിൽ വ്യക്തമാക്കിയിട്ടുണ്ട്.

One-time registration is now mandatory for school students