മലപ്പുറം: സംസ്ഥാനത്ത് എട്ട് വർഷത്തിനിടെ എംപ്ലോയ്‌മെന്റ് എക്‌സ്ചേഞ്ചിൽ പേര് രജിസ്റ്റർ ചെയ്ത 26.55 ലക്ഷം അപേക്ഷകരിൽ തൊഴിൽ ലഭിച്ചത് 90,959 പേർക്ക് മാത്രം. കഴിഞ്ഞ മെയ് 31വരെ 26,55,736 പേരാണ് എംപ്ലോയ്‌മെന്റ് എക്‌സ്‌ചേഞ്ചുകളിൽ അപേക്ഷകരായുള്ളത്. ഇതിൽ കഴിഞ്ഞ 2016 മെയ് മുതൽ കഴിഞ്ഞ മെയ് 31 വരെ വിവിധ ജില്ലകളിൽനിന്ന് 90,959 പേർക്ക് മാത്രമെ ജോലി ലഭിച്ചിട്ടുള്ളൂ.

പി.എസ്.സിയുടെ പരിധിയിൽ വരാത്ത ഉദ്യോഗങ്ങളിലാണ് എംപ്ലോയ്‌മെന്റ് എക്‌സ്‌ചേഞ്ചുകൾ വഴി തൊഴിൽ നൽകുന്നത്. ഇത്തരത്തിലുള്ള താൽക്കാലിക ഒഴിവുകൾ ബന്ധപ്പെട്ട ജില്ല, സ്‌പെഷൽ, പ്രൊഫഷനൽ എംപ്ലോയ്‌മെന്റ് എക്‌സ്ചേഞ്ചിലാണ് അറിയിക്കുന്നത്. ഇവ പിന്നീട് സംവരണതത്വം പാലിച്ച് ടൗൺ എംപ്ലോയ്‌മെന്റ് ഓഫിസുകളിൽ അറിയിക്കും. ഇവിടെ നിന്നാണ് ജില്ലാ തലത്തിലേക്ക് കൈമാറുന്നത്. ഇതിനാൽ ഓരോ ജില്ലകളിലും വ്യത്യസ്ത രീതിയിലാണ് ഓരോ വിഭാഗത്തിലും സീനിയോറിറ്റി ലിസ്റ്റുണ്ടാവുക.

തിരുവനന്തപുരം ജില്ലയിലാണ് എംപ്ലോയ്‌മെന്റ് എക്‌സ്ചേഞ്ചിൽ കൂടുതൽ പേർ രജിസ്റ്റർ ചെയ്തത്. 4,28,621 പേർ. തിരുവനന്തപുരത്ത് തൊഴിൽ ലഭിച്ചത് 11,653 പേർക്കാണ്. ഏറ്റവും കൂടുതൽ ജനസംഖ്യയുള്ള മലപ്പുറം ജില്ലയിൽ 1,98,573 പേരാണ് അപേക്ഷകരായുള്ളത്. ജോലി ലഭിച്ചത് 3,135 പേർക്ക് മാത്രം. കൊല്ലം ജില്ലയിൽ 2,99,212 പേരിൽ 5,342 പേർക്കാണ് ഇതുവരെ തൊഴിൽ ലഭിച്ചത്.

മറ്റു ജില്ലകളിൽ തൊഴിലിന് അപേക്ഷ നൽകിയവർ, ബ്രാക്കറ്റിൽ അവസരം ലഭിച്ചവരുടെ എണ്ണം. ആലപ്പുഴ 2,13,48 (13,600), പത്തനംതിട്ട 96,744 (37,05), കോട്ടയം 1,54,891 (4,270), ഇടുക്കി 82,749( 2,152), എറണാകുളം 2,42,279 (13,655), തൃശൂർ 1,94,759 (7,277), പാലക്കാട് 1,82,419 (6,310), കോഴിക്കോട് 2,74,877 (7,655), വയനാട് 70,807 (2,642), കണ്ണൂർ 1,39,225 (5471), കാസർകോട് 71,232 (4,092).

Employment Exchange Applications