ലോക്സഭാ തെരഞ്ഞെടുപ്പ് തീയതികള് നാളെ പ്രഖ്യാപിക്കും; പ്രഖ്യാപനം വൈകീട്ട് മൂന്നു മണിക്ക് വാര്ത്താ സമ്മേളനത്തില്
ന്യൂഡല്ഹി: ലോക്സഭാ തെരഞ്ഞെടുപ്പ് തീയതികള് നാളെ പ്രഖ്യാപിക്കുമെന്ന് തെരഞ്ഞെടുപ്പ് കമ്മിഷന്. നാളെ ഉച്ചകഴിഞ്ഞ് മൂന്നു മണിക്കാണ് പ്രഖ്യാപനമെന്ന് കമ്മിഷന് അറിയിച്ചു. ഇതിനുപുറമെ ആന്ധ്രാ പ്രദേശ്, അരുണാചല് പ്രദേശ്, ഒഡിഷ, സിക്കിം എന്നീ സംസ്ഥാന നിയമസഭകളിലേക്കുള്ള തെരഞ്ഞെടുപ്പ് തീയതികളും കമ്മീഷന് അറിയിച്ചേക്കും. ഏഴോ എട്ടോ ഘട്ടങ്ങളിലായാണ് ലോക്സഭാ തെരഞ്ഞെടുപ്പ് നടക്കുകയെന്നാണ് റിപ്പോര്ട്ടുകള് സൂചിപ്പിക്കുന്നത്.
തെരഞ്ഞെടുപ്പു കമ്മിഷനിലെ പുതിയ അംഗങ്ങളായി മുന് ഐഎഎസ് ഉദ്യോഗസ്ഥരായ ഗ്യാനേഷ് കുമാര്, സുഖ്ബീര് സിങ് സന്ധു എന്നിവര് ഇന്നു ചുമതലയേറ്റിരുന്നു. പിന്നാലെ മുഖ്യ തിരഞ്ഞെടുപ്പ് കമ്മിഷണര് രാജീവ് കുമാറിന്റെ നേതൃത്വത്തില് ചര്ച്ച നടത്തിയശേഷമാണ് തീയതികള് അറിയിക്കാനായി നാളെ വാര്ത്താസമ്മേളനം നടത്തുമെന്ന് അറിയിച്ചത്. തെരഞ്ഞെടുപ്പ് സംബന്ധിച്ച തീയതികള് കമ്മിഷന് യോഗത്തില് തീരുമാനമായതായാണ് സൂചന.
ലോകത്തെ ഏറ്റവും വലിയ ജനാധിപത്യ രാജ്യത്തെ തെരഞ്ഞെടുപ്പ് നടത്തുന്നതിനായി പൂര്ണ സജ്ജമായെന്ന് കമ്മിഷന് അംഗങ്ങള് ചുമതലയേറ്റതിനു പിന്നാലെ തെരഞ്ഞെടുപ്പ് കമ്മിഷന് വക്താവ് ഔദ്യോഗിക എക്സ് പ്ലാറ്റ്ഫോമിലൂടെ അറിയിച്ചു. തെരഞ്ഞെടുപ്പുമായി ബന്ധപ്പെട്ടുള്ള ഒരുക്കങ്ങള് വിലയിരുത്തുന്നതിനു കമ്മിഷന് അംഗങ്ങള് എല്ലാ സംസ്ഥാനങ്ങളിലും പര്യടനം പൂര്ത്തിയാക്കിയിരുന്നു. ഈ ആഴ്ച ജമ്മു കശ്മീര് പര്യടനത്തോടെയാണ് ഇത് അവസാനിപ്പിച്ചത്.
543 ലോക്സഭ സീറ്റുകളിലേക്കാണ് തെരഞ്ഞെടുപ്പ് നടക്കുന്നത്. ദേശീയ പാര്ട്ടികളും പ്രാദേശിക പാര്ട്ടികളും അവരുടെ സ്ഥാനാര്ഥികളെ പ്രഖ്യാപിക്കുന്നത് പുരോഗമിക്കുകയാണ്. ബിജെപി 257 മണ്ഡലങ്ങളിലെ സ്ഥാനാര്ഥികളെ പ്രഖ്യാപിച്ചപ്പോള് കോണ്ഗ്രസ് 82 സീറ്റുകളിലെ സ്ഥാനാര്ഥികളെയാണു പ്രഖ്യാപിച്ചത്.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."