അടിസ്ഥാന സൗകര്യമില്ല; കര്ണാടകയിലെ 72 നഴ്സിങ് കോളജുകളുടെ അംഗീകാരം ആരോഗ്യ സര്വകലാശാല റദ്ദാക്കി
കര്ണാടകയിലെ അടിസ്ഥാന സൗകര്യമില്ലാത്ത 72 നഴ്സിങ് കോളജുകളുടെ അംഗീകാരം രാജീവ് ഗാന്ധി ആരോഗ്യ സര്വകലാശാല റദ്ദാക്കി. മംഗളൂരുവില് ചേര്ന്ന ആരോഗ്യ സര്വകലാശാല സിന്ഡിക്കേറ്റ് യോഗത്തിലാണ് തീരുമാനം. 2024-25 വര്ഷം ഈ കോളജുകളില് വിദ്യാര്ഥികളെ പ്രവേശിപ്പിക്കാനാവില്ല.
ഒരു കെട്ടിടത്തില് തന്നെ ഒന്നിലധികം കോളജുകള് പ്രവര്ത്തിക്കുക, യോഗ്യതയില്ലാത്ത അധ്യാപകര്, പല കോളജുകളുടെയും പരിശീലന കേന്ദ്രമായി ഒരേ ആശുപത്രി, സ്റ്റാഫ് റൂമോ ഓഫീസോ ഇല്ലാതെ ക്ലാസ് മുറികള് മാത്രമായി പ്രവര്ത്തിക്കുക തുടങ്ങിയ ക്രമക്കേടുകളാണ് സര്വകലാശാല കണ്ടെത്തിയത്.
അംഗീകാരം റദ്ദാക്കിയ പട്ടികയില് ബെംഗലുരുവില് മാത്രം 23 കോളജുകളുണ്ട്. സര്വകലാശാല നിയോഗിച്ച പ്രാദേശിക അന്വേഷണ സമിതിയുടെ ശിപാര്ശകളും, മലിനീകരണ നിയന്ത്രണ ബോര്ഡിന്റെ അനുമതി, കര്ണാടക പ്രൈവറ്റ് മെഡിക്കല് എസ്റ്റാബ്ലിഷ്മെന്റ് സര്ട്ടിഫിക്കറ്റ് തുടങ്ങിയ അനുബന്ധ വിവരങ്ങളും അംഗീകരിച്ചാണ് നടപടി.
പല കോളജുകള്ക്കും, സര്വകലാശാല നിഷ്കര്ഷിക്കുന്ന സ്വന്തം ആശുപത്രികളില്ല. 100 കിടക്കകളുള്ള ആശുപത്രി ഉണ്ടായിരിക്കണമെന്നാണ് വ്യവസ്ഥ. ഇതില്ലാത്തതിനാല് വിദ്യാര്ഥികള്ക്ക് കൃത്യമായ പരിശീലനം ലഭിക്കുന്നില്ല. കോളജില് നിന്ന് 50 കിലോമീറ്റര് അകലെ വരെ പരിശീലന ആശുപത്രിയുള്ള നഴ്സിങ് കോളജുകള് വരെ അന്വേഷണത്തില് കണ്ടെത്തിയിട്ടുണ്ട്.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."