ലോക്സഭാ തെരഞ്ഞെടുപ്പ്: സമ്മതിദാനം വിനിയോഗിക്കാന് ശമ്പളത്തോടെ അവധി
തിരുവനന്തപുരം: സംസ്ഥാനത്തെ വിവിധ തൊഴില് മേഖലകളില് ജോലി നോക്കുന്ന എല്ലാ തൊഴിലാളികള്ക്കും അവരവരുടെ നിയോജക മണ്ഡലങ്ങളില് സമ്മതിദാനം വിനിയോഗിക്കുന്നതിന് കേരള ഷോപ്സ് ആന്റ് കൊമേഴ്ഷ്യല് എസ്റ്റാബ്ലിഷ്മെന്റ് ആക്ടിന് കീഴില് വരുന്ന എല്ലാ സ്വകാര്യ സ്ഥാപനങ്ങളിലെ ജീവനക്കാര്ക്കും ലേബര് കമ്മിഷണര് ശമ്പളത്തോടെയുള്ള അവധി പ്രഖ്യാപിച്ചു.
ജനപ്രാതിനിധ്യ നിയമം 1951ലെ വകുപ്പ് 135(ബി) ഉത്തരവു പ്രകാരം ലോക്സഭാ തെരഞ്ഞെടുപ്പ് ദിനമായ 23ന് സര്ക്കാര് പൊതു അവധി പ്രഖ്യാപിച്ചതിന്റെ അടിസ്ഥാനത്തിലാണ് കമ്മിഷണറുടെ ഉത്തരവ്.
സ്വകാര്യമേഖലയില് പണിയെടുക്കുന്ന ദിവസവേതനക്കാര്ക്കും കാഷ്വല് തൊഴിലാളികള്ക്കും ഈ ഉത്തരവ് ബാധകമാണെന്ന് ലേബര് കമ്മിഷണര് സി.വി സജന് അറിയിച്ചു.
സമ്മതിദാനം വിനിയോഗിക്കുന്നതിനുവേണ്ടി അവരവരുടെ നിയോജക മണ്ഡലങ്ങളില് പോകുന്ന തൊഴിലാളികള്ക്കും ജീവനക്കാര്ക്കും അന്നേ ദിനത്തിലെ ശമ്പളം, വേതനം തൊഴിലുടമകള് നിഷേധിക്കാന് പാടില്ലെന്നും ഉത്തരവില് ലേബര് കമ്മിഷണര് വ്യക്തമാക്കിയിട്ടുണ്ട്.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."