പൂച്ചാക്കല്‍: മാക്കേക്കടവ്-നേരേകടവ് പാലം നിര്‍മാണത്തിന്റെ ബീമുകള്‍ വാര്‍ക്കുന്നതിനായി എന്‍ട്രസ്റ്റുകള്‍ സ്ഥാപിച്ചു തുടങ്ങി. സ്പാനുകള്‍ക്കിടെ ബീമുകള്‍ വാര്‍ക്കുന്നതിന് ഉപയോഗിക്കുന്ന ഇരുമ്പു പ്ലേറ്റുകളുടെ വലയമാണ് എന്‍ട്രസ്റ്റ്.
പാലം നിര്‍മാണത്തിനായി കായലില്‍ സ്ഥാപിച്ചിരിക്കുന്ന പ്രധാന തൂണുകള്‍ തമ്മിലുള്ള അകലത്തെയാണ് സ്പാന്‍ എന്നു പറയുന്നത്. രണ്ടു എന്‍ട്രസ്റ്റില്‍ ഒരെണ്ണം നിര്‍മിച്ചു സ്ഥാപിച്ചു. മറ്റൊന്നിന്റെ നിര്‍മാണം നടക്കുകയാണ്. കായല്‍ മധ്യത്തിലെ രണ്ടു സ്പാനുകള്‍ക്കിടെ മാത്രമാണ് എന്‍ട്രസ്റ്റ് ഉപയോഗിച്ചു ബീം വാര്‍ക്കുന്നത്. ഇവിടുത്തെ ബീമിന് മറ്റുള്ളവയെക്കാള്‍ കൂടുതല്‍ നീളവും ഉയരവും ഭാരവുമുള്ളതിനാലാണ് എന്‍ട്രസ്റ്റ് ഉപയോഗിക്കുന്നത്. കൂടാതെ ഇവിടം ദേശീയ ജലപാത ആയതിനാല്‍ നാവിഗേഷന്‍ ബീം ആയാണ് വാര്‍ക്കുന്നത്. കപ്പലുകള്‍ക്ക് ഉള്‍പ്പെടെ കടന്നു പോകാവുന്ന ഉയര ഇവിടെയുണ്ടാകും.
പാലത്തിന്റെ ഒരു സ്പാനിനിടെ നാലു ബീമുകള്‍ വീതമാണ് സ്ഥാപിക്കേണ്ടത്. ആകെ 22 സ്പാനുകളാണ് ഉള്ളത്. മറ്റുള്ള 20 സ്പാനുകള്‍ക്കുള്ള 80 ബീമുകള്‍ കരയില്‍ വാര്‍ത്ത ശേഷം യന്ത്രസഹായത്തോടെ കായലിലെത്തിച്ച് സ്പാനുകളില്‍ സ്ഥാപിക്കുന്നതിനാണ് ലക്ഷ്യമിടുന്നത്.
ഇവ വാര്‍ക്കുന്നതിനും പാലം നിര്‍മാണത്തിന്റെ മറ്റ് ആവശ്യങ്ങള്‍ക്കും സമീപന റോഡിനുമായി സ്ഥലം ഏറ്റെടുക്കണം. ഇതിന്റെ ചര്‍ച്ചകളും മറ്റു നടപടികളും എ.എം.ആരിഫ് എംഎല്‍എയും ഉദ്യോഗസ്ഥരും പ്രതിനിധികളും ഉള്‍പ്പെടുന്ന പ്രത്യേക സമിതിയുടെ നേതൃത്വത്തില്‍ നടക്കുകയാണ്.
സ്ഥലം ലഭിക്കുന്നത് വൈകുന്നതിനാല്‍ പാലം നിര്‍മാണം മന്ദഗതിയിലാണ് നടക്കുന്നത്. ബീമുകള്‍ സ്ഥാപിച്ചു കഴിഞ്ഞാല്‍ പാലത്തിന്റെ പ്രധാന ഭാഗം പൂര്‍ത്തിയാകും.
പിന്നീട് കൈവരികളും റോഡും സമീപന റോഡും നിര്‍മിക്കുന്നതോടെ നിര്‍മാണം പൂര്‍ത്തിയാകും. 900 മീറ്റര്‍ നീളത്തിലും ഇരുവശങ്ങളിലും ഒന്നര മീറ്റര്‍ നടപ്പാത ഉള്‍പ്പെടെ 11 മീറ്റര്‍ വീതിയിലുമാണ് പാലം നിര്‍മിക്കുന്നത്. തുറവൂര്‍-പമ്പ സംസ്ഥാന പാത പദ്ധതിയില്‍ 100 കോടി രൂപയാണ് പാലത്തിനായി ചെലവിടുന്നത്.