മെറ്റയുടെ പുതിയ വീഡിയോ എഡിറ്റിംഗ് ആപ്പായ ‘എഡിറ്റ്സ്’ ആൻഡ്രോയിഡിലും ഐഒഎസിലും ലഭ്യമാകും. ടിക്‌ടോക്കിന്റെ ജനപ്രിയ എഡിറ്റിംഗ് ടൂളായ ക്യാപ്കട്ടിനെ ലക്ഷ്യമിട്ട് ഇൻസ്റ്റാഗ്രാം പുറത്തിറക്കിയ ഈ സൗജന്യ ആപ്പ്, കണ്ടന്റ് ക്രീയേറ്റേഴ്സിന് പ്രൊഫഷണൽ നിലവാരത്തിലുള്ള വീഡിയോകൾ നിർമിക്കാൻ സഹായിക്കുന്നതിനായി രൂപകൽപ്പന ചെയ്തിട്ടുണ്ട്. ഫെബ്രുവരിയിൽ റിലീസ് ചെയ്യാനിരുന്ന എഡിറ്റ്സ്, ഇപ്പോൾ ആപ്പ് സ്റ്റോറിലും ഗൂഗിൾ പ്ലേയിലും നിന്നും ഡൗൺലോഡ് ചെയ്യാം.

വർഷങ്ങളായി, വീഡിയോ ഉള്ളടക്കം സൃഷ്ടിക്കാൻ മറ്റ് ആപ്പുകളെ കണ്ടന്റ് ക്രീയേറ്റേഴ്സ് ആശ്രയിച്ചിരുന്നു. എന്നാൽ, ബൈറ്റ്ഡാൻസിന്റെ ക്യാപ്കട്ട് ടിക്‌ടോക്കിനൊപ്പം ജനപ്രിയമായതോടെ ഈ രംഗത്ത് മാറ്റങ്ങൾ സംഭവിച്ചു. ഇപ്പോൾ, മെറ്റ സ്വന്തം പ്ലാറ്റ്‌ഫോമിനുള്ളിൽ എഡിറ്റിം​ഗ് പരിപോഷിപ്പിക്കാൻ ‘എഡിറ്റ്സ്’ അവതരിപ്പിച്ചിരിക്കുകയാണ്.

 

 

എഡിറ്റ്സിന്റെ പ്രത്യേകതകൾ

എഡിറ്റ്സ് വിപുലമായ എഡിറ്റിംഗ് ഫീച്ചറുകളുമായാണ് എത്തുന്നത്. AI-പവർഡ് ആനിമേഷനുകൾ, പച്ച സ്‌ക്രീൻ പശ്ചാത്തലം മാറ്റാനുള്ള സംവിധാനം, കൃത്യമായ സബ്ജക്റ്റ് കട്ടൗട്ടുകൾ എന്നിവ ഇതിൽ ഉൾപ്പെടുന്നു. വീഡിയോ ഷൂട്ട് ചെയ്യാനും, ക്ലിപ്പുകൾ ട്രിം ചെയ്യാനും, അടിക്കുറിപ്പുകളും ട്രെൻഡിംഗ് ഓഡിയോയും ചേർക്കാനും, മെറ്റയുടെ പ്ലാറ്റ്‌ഫോമുകളിലേക്ക് നേരിട്ട് പോസ്റ്റ് ചെയ്യാനും ഈ ആപ്പ് അനുവദിക്കുന്നു. വാട്ടർമാർക്ക് ഇല്ലാതെ അപ് ലോഡ് ചെയ്യാനും മറ്റ് പ്ലാറ്റ്‌ഫോമുകളിലേക്ക് പങ്കിടാലും സൗകര്യമൊരുക്കുന്നു.

 

 

AI-അധിഷ്ഠിത ഫീച്ചറുകളാണ് എഡിറ്റ്സിന്റെ മുഖമുദ്ര. സ്റ്റാറ്റിക് ഇമേജുകൾ ആനിമേറ്റ് ചെയ്യാനും, വസ്തുക്കളെയോ ആളുകളെയോ കൃത്യമായി വേർത്തിരിക്കാനും പശ്ചാത്തലങ്ങൾ മാറ്റാനും ഇത് സഹായിക്കുന്നു. സങ്കീർണ്ണമായ സോഫ്റ്റ്‌വെയർ ആവശ്യമില്ലാതെ, മൊബൈലിൽ മാത്രം പ്രവർത്തിക്കുന്ന ഈ ആപ്പ് അനായാസം ഉപയോ​ഗിക്കാൻ സാധിക്കും.

 

 

ട്രെൻഡിംഗ് റീലുകളും ശബ്ദങ്ങളും ഉൾപ്പെടുന്ന ‘ഇൻസ്പിരേഷൻ ടാബ്’, ഉള്ളടക്ക ആശയങ്ങൾ സേവ് ചെയ്യാനുള്ള ‘ഐഡിയാസ് ടാബ്’, പ്രേക്ഷകരുടെ പ്രതികരണങ്ങൾ ട്രാക്ക് ചെയ്യാനുള്ള സ്ഥിതിവിവരക്കണക്കുകൾ എന്നിവ എഡിറ്റ്സ് വാഗ്ദാനം ചെയ്യുന്നു. വരും മാസങ്ങളിൽ കീഫ്രെയിം ആനിമേഷനുകൾ, AI-അധിഷ്ഠിത ‘മോഡിഫൈ’ ടൂൾ, കൂടുതൽ ഫോണ്ടുകൾ, സംക്രമണങ്ങൾ, വോയ്‌സ് ഇഫക്റ്റുകൾ, സഹകരണ ഉപകരണങ്ങൾ എന്നിവ കൂട്ടിച്ചേർക്കാനും മെറ്റ പദ്ധതിയിടുന്നു.

ക്യാപ്കട്ടിനെതിരെ മെറ്റ

2023-ൽ ഒരു ബില്യൺ ഡൗൺലോഡുകൾ നേടിയ ക്യാപ്കട്ട്, ടിക്‌ടോക്കിന്റെ ഒരു ബില്യൺ ഉപയോക്താക്കളിൽ 25% പേർ ഉപയോഗിക്കുന്ന ശക്തമായ എതിരാളിയാണ്. കഴിഞ്ഞ വർഷം 100 മില്യൺ ഡോളർ വരുമാനം നേടിയ ഈ ആപ്പിനെ മറികടക്കുക മെറ്റയ്ക്ക് വെല്ലുവിളിയാണ്. എന്നാൽ, ടിക്‌ടോക്കിന്റെ നിയന്ത്രണ വിവാദങ്ങൾക്കിടെ, ഇൻസ്റ്റാഗ്രാമിലേക്ക് സ്രഷ്ടാക്കളെ ആകർഷിക്കാൻ എഡിറ്റ്സിന് കഴിയുമെന്നാണ് മെറ്റയുടെ പ്രതീക്ഷ. സൗജന്യമായ എഡിറ്റ്സ് ഇപ്പോൾ ആപ്പ് സ്റ്റോറിലും ഗൂഗിൾ പ്ലേയിലും ലഭ്യമാണ്.

Meta's new video editing app, 'Edits,' launched on Android and iOS, targets TikTok's CapCut. Aimed at content creators, the free app offers AI-powered features like animations, green screen background swaps, and precise subject cutouts. With a clean mobile interface, Edits allows video shooting, trimming, adding captions, and direct publishing to Meta platforms. It also includes watermark-free exports, an inspiration tab, and performance analytics. Future updates will bring keyframes, AI tools, and more. Available now on App Store and Google Play, Edits challenges CapCut's dominance in the creator space.