വികസന മേഖലയില്‍ വന്‍ കുതിപ്പാണ് കിഫ്ബി നടത്തിയതെന്ന് ഗതാഗത മന്ത്രി കെ.ബി ഗണേഷ് കുമാര്‍. വികസന മേഖലയില്‍ വലിയ കുതിപ്പാണ് കിഫ്ബിയുടെ സഹായത്താല്‍ കഴിഞ്ഞ ഒമ്പത് വര്‍ഷം സൃഷ്ടിക്കപ്പെട്ടത്. കേരളത്തിന്റെ സകലമേഖലയിലും കിഫ്ബിയുടെ സഹായത്തോടെയുള്ള വികസനങ്ങള്‍ ഉടലെടുക്കുന്നുണ്ട്. പിണറായി സര്‍ക്കാര്‍ അധികാരത്തില്‍ വന്നതിന് പിന്നാലെ റോക്കറ്റ് വേഗതയിലുള്ള കുതിപ്പാണ് വികസനമേഖലയിലുണ്ടായതെന്നും മന്ത്രി ചൂണ്ടിക്കാട്ടി. 

കിഫ്ബി വഴി തന്റെ മണ്ഡലമായ പത്തനാപുരത്തും നിരവധി വികസനങ്ങള്‍ നടപ്പാക്കാനായെന്ന് മന്ത്രി കൂട്ടിച്ചേര്‍ത്തു. വികസനരംഗത്തെ വിപ്ലവത്തിനാണ് പത്തനാപുരത്തു കാര്‍ ഇക്കഴിഞ്ഞ വര്‍ഷങ്ങളില്‍ സാക്ഷ്യം വഹിച്ചത്. 250കോടി രൂപയുടെ വികസന പദ്ധതികളാണ് കിഫ്ബിയിലൂടെ മണ്ഡലത്തില്‍ നടപ്പാക്കുന്നതെന്നും ഗണേഷ് കുമാര്‍ പറയുന്നു.

പുലിക്കാട്ടൂര്‍ പാലം, ആയുര്‍വേദ ആശുപത്രി, പട്ടാഴി വടക്കേക്കര പ്രാഥമിക ആരോഗ്യ കേന്ദ്രം തുടങ്ങിയവയെല്ലാം നൂറുകണക്കിന്ന് സാധാരണകര്‍ക്കാണ് ആശ്വാസം നല്‍കുന്നത്. എം.എല്‍.എ ഫണ്ടിനൊപ്പം കിഫ്ബി ഫണ്ടിലൂടെയുള്ള വികസന പ്രവര്‍ത്തനങ്ങള്‍ കൂടിയായപ്പോള്‍ മണ്ഡലത്തിന്റെ മുഖഛായ മാറി- മന്ത്രി പറഞ്ഞു. 

68 കോടി രൂപയുടെ കിഫ്ബി ഫണ്ടിലൂടെ നിര്‍മ്മിച്ച പട്ടാഴി കുടിവെള്ള പദ്ധതി നിരവധി പഞ്ചായത്തുകള്‍ക്ക് ആശ്വാസമായെന്ന് മന്ത്രി ചൂണ്ടിക്കാട്ടി. പട്ടാഴി വടക്കേക്കര കലഞ്ഞൂര്‍ കുടിവെള്ള പദ്ധതിക്കായി 60.13 കോടി രൂപയാണ് കിഫ്ബി വഴി നല്‍കിയതെന്നും മന്ത്രി പറഞ്ഞു.

എട്ട് പഞ്ചായത്തുകള്‍ ഉള്ള മണ്ഡലത്തിലെ ഏഴ് പഞ്ചായത്തുകളിലും കിഫ്ബി പദ്ധതിയിലൂടെ കുടിവെള്ളം ഉറപ്പാക്കാനായി. മെതുകുംമേല്‍, പട്ടാഴി, തലവൂര്‍, കുന്നികോട്, പൊലികോട് റോഡിന് 42.5 രൂപയും ഏനാത്ത് പത്തനാപുരം റോഡിന് 66.16 കോടിയും പള്ളിമുക്ക് - മുക്കടവ് റോഡിന് 34 കോടിയും, പള്ളിമുക്ക് ചാവിപുന്ന കറവൂര്‍ ആലിമുക്ക് റോഡിന് 5150 കോടിയും കിഫ്ബി വഴി അനുവദിച്ചു.

കേരളത്തിന്റെ വികസന ചരിത്രത്തിലെ രേഖപ്പെടുത്തപ്പെടുന്ന അധ്യായമാണ് കിഫ്ബിയുടെ പ്രവര്‍ത്തനമെന്ന് മന്ത്രി കെ ബി ഗണേഷ് കുമാര്‍ പറഞ്ഞു. നാട് കൊവിഡിന്റെ പിടിയില്‍ അമര്‍ന്നപ്പോള്‍ സംസ്ഥാനത്തെ വികസന പ്രവര്‍ത്തനത്തെ പിടിച്ചു നിര്‍ത്തിയത് കിഫ്ബി ആണെന്നും അദ്ദേഹം കൂട്ടിച്ചേര്‍ത്തു.