തിരുവനന്തപുരം: ഒരു മാസം പിന്നിടുമ്പോഴും ആശാ പ്രവർത്തകരുടെ സമരത്തോട് സർക്കാർ അനാസ്ഥ തുടരുകയാണ്, ഈ സാഹചര്യത്തിൽ നിയമവിരുദ്ധ സമര നടപടികളിലേക്ക് നീങ്ങുകയാണ് ആശ പ്രവർത്തകർ. മാർച്ച് 17ന് സംസ്ഥാന സെക്രട്ടേറിയേറ്റ് ഉപരോധിച്ചുകൊണ്ടുള്ള സമരത്തിന് പിന്തുണ തേടുന്നതിനായി വിവിധ സംഘടനകളുമായി ആശ പ്രവർത്തകർ സമ്പർക്കം പുലർത്തുന്നു. അതേസമയം, തങ്ങൾക്കെതിരെ അധിക്ഷേപ പരാമർശം നടത്തിയ സി.ഐ.ടി.യു സംസ്ഥാന സെക്രട്ടറി കെ.എൻ. ഗോപിനാഥിന് സമരക്കാർ അപകീർത്തി നോട്ടീസ് അയച്ചിട്ടുണ്ട്.

കേരള ആശാ ഹെൽത്ത് വർക്കേഴ്‌സ് അസോസിയേഷൻ ജനറൽ സെക്രട്ടറി എം.എ. ബിന്ദുവാണ് കെ.എൻ. ഗോപിനാഥിന് വക്കീൽ നോട്ടീസ് അയച്ചത്. കേന്ദ്രമന്ത്രി സുരേഷ് ഗോപി സമരം ചെയ്യുന്ന ആശാ പ്രവർത്തകർക്ക് "കുടക്കൊപ്പം ഉമ്മയും കൊടുത്തോ" എന്ന കെ.എൻ. ഗോപിനാഥന്റെ പരാമർശം അടിയന്തിരമായി പിൻവലിക്കുകയും, പത്രത്തിൽ പരസ്യമായി ക്ഷമാപണം പ്രസിദ്ധീകരിക്കണമെന്നുമാണ് നോട്ടീസിൽ ആവശ്യപ്പെടുന്നത്. ഈ മാസം മൂന്നിനായിരുന്നു ആശാ പ്രവർത്തകരെ അധിക്ഷേപിച്ച കെ.എൻ. ഗോപിനാഥിന്റെ വിവാദ പരാമർശം. മാപ്പ് പറയാത്ത പക്ഷം 10 കോടി രൂപ നഷ്ടപരിഹാരം ആവശ്യപ്പെട്ട് നിയമനടപടി സ്വീകരിക്കുമെന്ന് നോട്ടീസിൽ പറയുന്നു.

ആശാ വർക്കർമാരുടെ സമരത്തെ പിന്തുണച്ച് കൊണ്ട് കോൺഗ്രസ് നേതാവും വയനാട് എംപിയുമായ പ്രിയങ്ക ഗാന്ധിയും സംസ്ഥാന സർക്കാരിനെ വിമർശിച്ചിരുന്നു. അവകാശങ്ങൾക്കായി സ്ത്രീകൾ യാചിക്കേണ്ടി വരുന്നത് ദൗർഭാഗ്യകരമാണെന്നും, ആശാ വർക്കർമാർ ആത്മാഭിമാനത്തിനായാണ് പോരാടുന്നതെന്നുമാണ് പ്രിയങ്ക ​ഗാന്ധി ഡൽഹിയിൽ പ്രതികരിച്ചത്. ആശാ വർക്കർമാർ വേതനത്തിൽ 7000 രൂപയുടെ വർധനവാണ് ആവശ്യപ്പെടുന്നത്. കേരളത്തിലെ ആശാ വർക്കർക്കൾ കർണാടക, തെലുങ്കാന സംസ്ഥാനങ്ങളേക്കാൾ കുറഞ്ഞ വേതനം ലഭിക്കുന്നതായും പ്രിയങ്ക ഗാന്ധി ആരോപിച്ചു. സംസ്ഥാന സർക്കാർ സമരക്കാരെ അടിച്ചമർത്താൻ ശ്രമിക്കുകയാണെന്നും, യുഡിഎഫ് അധികാരത്തിൽ എത്തുമ്പോൾ ആശാ വർക്കർമാരുടെ വേതനം വർധിപ്പിക്കുമെന്നും അവര്‍ വ്യക്തമാക്കി.

ആശമാരുടെ സമരത്തില്‍ നിയമസഭ ഭരണ-പ്രതിപക്ഷ പോരിന് സാക്ഷ്യം വഹിച്ചിരുന്നു. ആശാ വര്‍ക്കര്‍മാര്‍ക്ക് ഏറ്റവും കൂടുതല്‍ ഓണറേറിയം നല്‍കുന്നത് കേരളത്തിലാണെന്നും, ഓണറേറിയം വര്‍ധിപ്പിക്കണം എന്ന് തന്നെയാണ് സര്‍ക്കാര്‍ നിലപാടെന്നും, കഴിഞ്ഞ വര്‍ഷം ഇന്‍സന്റീവ് ഇനത്തില്‍ 100 കോടി രൂപ കേന്ദ്രം നല്‍കാനുണ്ടെന്നും അതും സംസ്ഥാനം മുടങ്ങാതെ നല്‍കുന്നുണ്ടെന്നും ആശമാരെ ചേര്‍ത്തുപിടിക്കുന്ന സമീപനമാണ് സര്‍ക്കാരിന്റേതെന്നും ആരോഗ്യമന്ത്രി വീണാ ജോര്‍ജ് സഭയിൽ പറ‍ഞ്ഞു. 

A defamation notice has been issued to CITU State Secretary K.N. Gopinath over his derogatory remark against ASHA workers. The notice demands a public apology and retraction. Protesters plan to lay siege to the Secretariat on March 17.