പത്തനംതിട്ട: തിരുവല്ലയിൽ മകനെ ഉപയോഗപ്പെടുത്തി എംഡിഎംഎ വിൽപ്പന നടത്തിയ ആൾ പിടിയിൽ. ചുമന്ത്ര സ്വദേശി മുഹമ്മദ് ഷമീറാണ് അറസ്റ്റിലായത്. ഇന്ന് പുലർച്ചെയോടെ തിരുവല്ല പൊലിസ് നടത്തിയ പരിശോധനയിലാണ് ഇയാൾ പിടിയിലായത്. 10 വയസ്സായ മകന്റെ ദേഹത്ത് സെല്ലോ ടാപ്പ് ഒട്ടിച്ചുവെച്ചാണ് ഷമീർ ലഹരിവസ്തുക്കൾ വിൽപ്പന ചെയ്തിരുന്നതെന്നാണ് തിരുവല്ല പൊലിസ് പറഞ്ഞത്.

ഇത്തരത്തിൽ നിരവധി തവണ ലഹരിവസ്തുക്കൾ വിൽപ്പന നടത്തിയതായി പ്രതി സമ്മതിച്ചെന്നും പൊലിസ് പറഞ്ഞു. മറ്റ് ജോലികൾക്ക് ഒന്നും പോകാതിരുന്ന ഷമീറിന്റെ ഉപജീവനമാർഗ്ഗം ലഹരി വിൽപ്പനയായിരുന്നുവെന്നും പൊലിസ് വ്യക്തമാക്കി. എവിടെ നിന്നുമാണ് ഇയാൾക്ക് ലഹരി വസ്തുക്കൾ കിട്ടിയതെന്ന് അന്വേഷിച്ച് വരിക്കുകയാണെന്നും ലഹരിയുടെ ഉറവിടം കണ്ടെത്തിയാൽ കൂടുതൽ നടപടികളിലേക്ക് പോവുമെന്നും പൊലിസ് പറഞ്ഞു.

മെഡിക്കൽ വിദ്യാർഥികൾക്കും  സ്കൂൾ വിദ്യാർത്ഥികൾക്കുമാണ് ഇയാൾ ലഹരിവസ്തുക്കൾ വിൽപ്പന നടത്തിയിരുന്നത്. മകനെ പരിശോധിക്കില്ലെന്ന ഉറപ്പിലായിരുന്നു പിതാവ് ഷമീർ ഇത്തരത്തിൽ എംഡിഎംഎ വിൽപ്പന നടത്തിയത്. പ്രതിയെ ഇന്ന് കോടതിയിൽ ഹാജരാക്കും.