തൊടുപുഴ: സംസ്ഥാനത്തെ പ്രതിദിന വൈദ്യുതി ഉപഭോഗം ഈ വർഷം ആദ്യമായി 10 കോടി യൂനിറ്റ് പിന്നിട്ടു. ഇന്നലെ രാവിലെ ഏഴിന് അവസാനിച്ച 24 മണിക്കൂറിൽ 10.084 കോടി യൂനിറ്റായിരുന്നു ഉപഭോഗം. പീക്ക് ലോഡ് ഡിമാന്റ് 5122 മെഗാവാട്ടിലെത്തി. താപനിലയിൽ കാര്യമായ കുറവില്ലാത്തതിനാൽ ഉപഭോഗം ഇനിയും ഉയരും. ഇന്നലെ ഉപയോഗിച്ച 10.084 കോടി യൂനിറ്റ് വൈദ്യുതിയിൽ 8.076 കോടി യൂനിറ്റും പുറം വൈദ്യുതിയാണ്.

2.008 കോടി യൂനിറ്റ് മാത്രമായിരുന്നു ആഭ്യന്തര ഉൽപാദനം. പീക്ക് ലോഡ് ഡിമാന്റ് ഏപ്രിൽ, മെയ് മാസങ്ങളിൽ യഥാക്രമം 5700, 6000 മെഗാവാട്ട് ആയിരിക്കുമെന്ന് പ്രതീക്ഷിച്ചുള്ള ആസൂത്രണമാണ് വൈദ്യുതി ബോർഡ് ലോഡ് ഡെസ്പാച്ച് സെന്റർ നടത്തുന്നത്. മാർച്ച് മാസം ആദ്യം തന്നെ 5000 മെഗാവാട്ട് കടന്നത് നല്ല സൂചനയല്ലെന്നാണ് വിലയിരുത്തൽ. 

പീക്ക് സമയങ്ങളിൽ ജലവൈദ്യുതി പദ്ധതികളിൽ നിന്നും പരമാവധി ലഭ്യമാകുന്നത് 1500 മെഗാവാട്ട് വരെയാണ്. കേന്ദ്ര ഗ്രിഡിൽ നിന്നും സംസ്ഥാനത്തേക്ക് 4000 മെഗാവാട്ട് വരെ വൈദ്യുതി എത്തിക്കാനുള്ള ശേഷിയാണുള്ളത്. ഇതാണ് പ്രശ്‌നം ഗൗരവമാക്കുന്നത്. 2024 മെയ് 3 ലെ 11.59 കോടി യൂനിറ്റ് വൈദ്യുതി ഉപഭോഗമാണ് റെക്കോഡ്. പീക്ക് ലോഡ് ഡിമാന്റിലെ റെക്കോഡ് 2024 മെയ് 2 ലെ 5797 മെഗാവാട്ടും. 

ദിവസം തോറം വൈദ്യുതി ആവശ്യകത ഉയരുകയാണ്. പുറത്തു നിന്ന് ഉയർന്ന വിലയ്ക്ക് വൈദ്യുതി എത്തിച്ച് ഇടതടവില്ലാതെ ലഭ്യമാക്കാനുള്ള അശ്രാന്ത പരിശ്രമത്തിലാണ് കെ.എസ്.ഇ.ബി. 15 മുതൽ 20 കോടി രൂപവരെ മുടക്കിയാണ് ഇപ്പോൾ പവർ എക്‌സ്‌ചേഞ്ചിൽ നിന്ന് വൈദ്യുതി ലഭ്യമാക്കുന്നത്. വൈദ്യുതി ആവശ്യകത പരിധിക്കപ്പുറം ഉയർന്നാൽ പ്രസരണ വിതരണ ശൃംഖലയും സമ്മർദത്തിലാകും. 

ഇക്കാരണത്താൽ പലയിടങ്ങളിലും വോൾട്ടേജ് കുറവ് അനുഭവപ്പെടാൻ സാധ്യതയുണ്ട്. വൈകുന്നേരം ആറിനും 11നുമിടയിൽ വൈദ്യുതി ഉപയോഗം പരമാവധി കുറയ്ക്കാനായി പമ്പ് സെറ്റ്, ഇൻഡക്ഷൻ സ്റ്റൗ, വാട്ടർ ഹീറ്റർ, ഇസ്തിരിപ്പെട്ടി തുടങ്ങി വൈദ്യുതി അധികമായി ഉപയോഗിക്കുന്ന ഉപകരണങ്ങൾ പരമാവധി മറ്റുസമയങ്ങളിൽ ഉപയോഗിക്കാൻ ശ്രമിച്ചും ഇലക്ട്രിക് വാഹനങ്ങളുടെ ചാർജിങ് പകൽ സമയം നടത്തിയും എ സിയുടെ താപനില 25 ഡിഗ്രി സെൽഷ്യസിൽ ക്രമീകരിച്ചും ഉപഭോക്താക്കൾ സഹകരിക്കണമെന്ന് കെ.എസ്.ഇ.ബി. അഭ്യർഥിച്ചു. വേനൽ മഴ ശക്തിപ്പെട്ടാൽ വൈദ്യുതി ഉപഭോഗം കുറയും.