റിയാദ്: ധനസമാഹരണത്തിന് വേണ്ടിയുള്ള തെറ്റായ പരസ്യങ്ങൾ പ്രചരിക്കുന്ന സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്നും ഔദ്യോഗിക മാർഗങ്ങളിലൂടെ മാത്രമേ സംഭാവനകൾ നൽകാവൂ എന്നും ഇസ്‌ലാമിക കാര്യ മന്ത്രി ഡോ. അബ്‌ദുൽ ലത്തീഫ് അൽ ഷെയ്ഖ് വ്യക്തമാക്കി.

"പള്ളികൾ നിർമിക്കുന്നതിനും പുതുക്കിപ്പണിയുന്നതിനുമായി അധികാരികളുടെ അംഗീകാരമുണ്ടെന്ന പ്രചരണത്തിലൂടെ ഒരു കമ്പനി അനധികൃതമായി പണപ്പിരിവ് നടത്തി. മക്കയിൽ പള്ളികൾ നിർമിക്കാനെന്ന പേരിൽ 90 സഊദി റിയാൽ വീതം സംഭാവന ശേഖരിക്കുന്നതിനായി ഒരു അസോസിയേഷൻ പരസ്യം നൽകി. എന്നാൽ, ഇവർക്ക് മന്ത്രാലയത്തിൽ നിന്ന് അനുമതി ലഭിച്ചിരുന്നില്ല" ഡോ. അബ്ദുൽ ലത്തീഫ് അൽ ഷെയ്ഖ് കൂട്ടിച്ചേർത്തു.

അതേസമയം, സഊദി ധനസമാഹരണ നിയമത്തിൽ ഇത്തരം നിയമലംഘകരെ ശിക്ഷിക്കുന്നതിനായി ഒട്ടറെ വ്യവസ്‌ഥകളുണ്ട്. ലൈസൻസുള്ള സ്‌ഥാപനങ്ങൾക്ക് മാത്രമേ സംഭാവനകൾ ശേഖരിക്കാൻ കഴിയൂ. കൂടാതെ, ലൈസൻസുള്ള സ്‌ഥാപനത്തിൽ സംഭാവനകൾ ശേഖരിക്കുന്നതിനും വിതരണം ചെയ്യുന്നതിനും ഉത്തരവാദികളായവർ സഊദികളായിരിക്കണമെന്നും നിയമത്തിൽ പറയുന്നു.

നിയമവിരുദ്ധമായി സംഭാവനകൾ പിരിക്കുന്ന ഒരാൾക്ക് 5 ലക്ഷം റിയാലിൽ കവിയാത്ത പിഴയോ രണ്ട് വർഷം വരെയാകാവുന്ന തടവോ അല്ലെങ്കിൽ ഇവ രണ്ടും കൂടിയോ ശിക്ഷ ലഭിക്കും, കൂടാതെ ജയിൽ ശിക്ഷ അനുഭവിച്ചതിന് ശേഷം വിദേശികളെ നാടുകടത്തും. പിന്നീട്, ഹജ്ജ്, ഉംറ ചട്ടങ്ങൾ പ്രകാരമല്ലാതെ അവർക്ക് രാജ്യത്തേക്ക് വീണ്ടും പ്രവേശിക്കാൻ സാധിക്കില്ലെന്നും നിയമം വ്യവസ്‌ഥ ചെയ്യുന്നു.

അതേസമയം, ലൈസൻസില്ലാതെ സംഭാവനകൾ ശേഖരിക്കുന്ന സ്ഥാപനങ്ങൾക്ക് വേണ്ടി പരസ്യം ചെയ്യുന്ന മാധ്യമ സ്‌ഥാപനത്തിന് 500000 റിയാലിൽ കവിയാത്ത പിഴ ചുമത്തും, ലംഘനം ആവർത്തിച്ചാൽ പിഴ ഇരട്ടിയാക്കും.

Saudi Arabia's Minister of Islamic Affairs, Dr. Abdullatif Al-Sheikh, has urged the public to be cautious of fake charity ads and to only donate through official channels