കുവൈത്ത് സിറ്റി: അഹമ്മദി ഗവര്‍ണറേറ്റിലെ ഒരു മാളില്‍ ചേരിതിരിഞ്ഞ് അടിപിടി. ഒരു പ്രാദേശിക ഷോപ്പിംഗ് മാളില്‍ അക്രമാസക്തമായ സംഘര്‍ഷത്തില്‍ ഉള്‍പ്പെട്ട എട്ടു പേരെ പൊലിസ് കസ്റ്റഡിയില്‍ എടുത്തു. സംഭവത്തിന്റെ വീഡിയോ സമൂഹമാധ്യമങ്ങളില്‍ വൈറലായതിനെത്തുടര്‍ന്നാണ് പൊലിസ് നടപടി.

അഹമ്മദി സുരക്ഷാ ഡയറക്ടറേറ്റിന്റെ കണക്കനുസരിച്ച്, ഉദ്യോഗസ്ഥര്‍ നാല് യുവാക്കളെയും ഒരു പെണ്‍കുട്ടിയെയും അറസ്റ്റ് ചെയ്തു. അതേസമയം അഹമ്മദി ഇന്‍വെസ്റ്റിഗേഷന്‍സ് ഉദ്യോഗസ്ഥര്‍ എതിര്‍ ഗ്രൂപ്പിലെ മൂന്ന് പ്രതികളെ കൂടി കസ്റ്റഡിയിലെടുത്തു. സംഘര്‍ഷത്തില്‍ ഉള്‍പ്പെട്ടവരില്‍ ഒരു പ്രായപൂര്‍ത്തിയാകാത്തയാളുമുണ്ട്. പബ്ലിക് പ്രോസിക്യൂഷന് കൈമാറുന്നതിന് മുമ്പ് കൂടുതല്‍ നിയമനടപടികള്‍ക്കായി ഇയാളെ ജുവനൈല്‍ പോലീസിന് റഫര്‍ ചെയ്തു.

സോഷ്യല്‍ മീഡിയയില്‍ വ്യാപകമായ ശ്രദ്ധ നേടിയ ഈ വീഡിയോയില്‍ മാളിനുള്ളില്‍ ഒരു കൂട്ടം യുവാക്കള്‍ ശാരീരികമായി ഏറ്റുമുട്ടുന്നത് വ്യക്തമായിരുന്നു. പൊലിസ് എത്തുന്നതിനുമുമ്പ് ഇവര്‍ ഓടി രക്ഷപ്പെട്ടു. ആര്‍ക്കും പരുക്കുകള്‍ ഒന്നും തന്നെയും റിപ്പോര്‍ട്ട് ചെയ്തിട്ടില്ലെന്നും ഔദ്യോഗിക പരാതികളൊന്നും നല്‍കിയിട്ടില്ലെന്നും അധികൃതര്‍ സ്ഥിരീകരിച്ചു. പൊതു സുരക്ഷ ഉറപ്പാക്കുന്നതിനും സമാനമായ സംഭവങ്ങള്‍ തടയുന്നതിനും സുരക്ഷാ ഉദ്യോഗസ്ഥര്‍ സിസിടിവി ദൃശ്യങ്ങള്‍ സമഗ്രമായി പരിശോധിക്കുകയും കൂടുതല്‍ അന്വേഷണങ്ങള്‍ നടത്തുകയും ചെയ്യുന്നുണ്ട്. ക്രമസമാധാനം നിലനിര്‍ത്തുന്നതിനും പൊതുജന സുരക്ഷയ്ക്ക് ഭീഷണിയാകുന്ന ഏതൊരു സംഘര്‍ഷങ്ങള്‍ക്കെതിരെയും വേഗത്തില്‍ നടപടിയെടുക്കുന്നതിനുമുള്ള പ്രതിബദ്ധത ഉദ്യോഗസ്ഥര്‍ ആവര്‍ത്തിച്ചു.