ന്യൂ ഡല്‍ഹി: പുതുക്കിയ വഖഫ് ബില്ലിന് കേന്ദ്ര മന്ത്രിസഭയുടെ അംഗീകാരം. ഫെബ്രുവരി 13 ന് പാര്‍ലമെന്റില്‍ സമര്‍പ്പിച്ച സംയുക്ത പാര്‍ലമെന്ററി കമ്മിറ്റി (ജെപിസി) റിപ്പോര്‍ട്ടിന്റെ അടിസ്ഥാനത്തിലാണ് വഖഫ് ഭേദഗതി ബില്ലിന് മന്ത്രിസഭാ അംഗീകാരം നല്‍കിയത്. ഈ മാസം ഫെബ്രുവരി 19 ന് നടന്ന യോഗത്തിലാണ് ബില്ലിലെ ഭേദഗതികള്‍ക്ക് മന്ത്രിസഭ അംഗീകാരം നല്‍കിയതെന്നും ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.

2025 ലെ ബജറ്റ് സമ്മേളനത്തിന്റെ ആദ്യ പകുതിയില്‍ പാര്‍ലമെന്റില്‍ നടന്ന പ്രതിപക്ഷ ബഹളത്തിനിടയിലാണ് റിപ്പോര്‍ട്ട് ലോക്‌സഭയിലും രാജ്യസഭയിലും ബില്‍ ആദ്യം മേശപ്പുറത്ത് വെക്കുന്നത്.  ഇരുസഭകളിലും നടപടികള്‍ താല്‍ക്കാലികമായി നിര്‍ത്തിവച്ചിരുന്നു.  പ്രതിഷേധങ്ങള്‍ക്കിടെ വഖഫ് ജെ.പി.സി റിപ്പോര്‍ട്ട് രാജ്യസഭ അംഗീകരിക്കുകയും ചെയ്തിരുന്നു.  ഭേദഗതി ചെയ്ത ബില്‍ ഇനി മാര്‍ച്ച് 10ന് വീണ്ടും സഭ സമ്മേളിക്കുമ്പോള്‍ അവതരിപ്പിക്കും. 

അതേസമം, ലോക്‌സഭാ നടപടികള്‍ താത്കാലികമായി നിര്‍ത്തിവെച്ചിരിക്കുകയാണ്. ജെ.പി.സി റിപ്പോര്‍ട്ടില്‍ നിന്ന് തങ്ങളുടെ വിയോജിപ്പ് കുറിപ്പുകള്‍ ഒഴിവാക്കിയെന്ന് പ്രതിപക്ഷം ആരോപിച്ചിരുന്നു. എന്നാല്‍  ഈ ആരോപണം കേന്ദ്രം നിഷേധിച്ചു. അതേസമയം, ഭരണകക്ഷിയായ ബി.ജെ.പി നേതൃത്വത്തിലുള്ള എന്‍.ഡി.എ അംഗങ്ങള്‍ നിര്‍ദ്ദേശിച്ച വഖഫ് ബില്ലിലെ എല്ലാ ഭേദഗതികളും പാര്‍ലമെന്ററി കമ്മിറ്റി അംഗീകരിക്കുകയും ചെയ്തിട്ടുണ്ട്. പ്രതിപക്ഷ അംഗങ്ങള്‍ നിര്‍ദ്ദേശിച്ച എല്ലാ മാറ്റങ്ങളും ക്ലോസ്‌ബൈക്ലോസ് ചര്‍ച്ചയില്‍ നിരസിക്കുകയാണുണ്ടാത്.

ബി.ജെ.പിയുടെ 22 ഭേദഗതികള്‍ അംഗീകരിച്ചു. എന്നാല്‍ ജെ.പി.സി പ്രതിപക്ഷത്തിന്റെ 44 ഭേദഗതികളും തള്ളിയിരുന്നു.