ദുബൈ: ഈ വർഷം റമദാനിൽ പീരങ്കി വെടിമുഴങ്ങുന്ന കേന്ദ്രങ്ങൾ പ്രഖ്യാപിച്ച് ദുബൈ പൊലിസ്. എട്ട് സ്‌ഥിരം കേന്ദ്രങ്ങളിലായിരിക്കും പീരങ്കിവെടിയുതിർക്കുക. ഇതിന് പുറമേ, 17 വ്യത്യസ്‌ത പാർപ്പിടകേന്ദ്രങ്ങളിലും പീരങ്കിവണ്ടികൾ ചുറ്റിത്തിരിഞ്ഞ് വെടിയുതിർക്കും.

ഇഫ്താറിന്റെ ആരംഭം സൂചിപ്പിക്കുന്നതിന് എല്ലാ ദിവസങ്ങളിലും വൈകിട്ട് സൂര്യാസ്‌തമയ സമയത്താണ് നിശ്ചല പീരങ്കികൾ വെടിയുതിർക്കുക. എന്നാൽ, ഓരോ രണ്ട് ദിവസത്തിലും റോമിങ്ങ് പീരങ്കികൾ പുതിയ സ്ഥലത്തേക്ക് മാറും. അതേസമയം, പൊതുജനങ്ങളുടെ ആവശ്യപ്രകാരമാണ് ഈ വർഷത്തെ ലൊക്കേഷനുകളുടെ എണ്ണം വർധിപ്പിച്ചിരിക്കുന്നത്.

റമസാനിൽ പീരങ്കിവെടിയുതിർക്കുന്ന കേന്ദ്രങ്ങൾ

എക്സ്പോ സിറ്റി ദുബൈ
ബുർജ് ഖലീഫ
ഫെസ്റ്റിവൽ സിറ്റി
ഡമാക് ഹിൽസ്
മിർദിഫ്
വാസൽ (ദുബൈ റിയൽ എസ്‌റ്റേറ്റ്‌ കോർപറേഷൻ)
ഹത്ത ഫോർട്ട് ഹോട്ടൽ
കൈറ്റ് ബീച്ചിലെ സാൾട്ട് ക്യാംപ്

ഫലഖ് അൽ മൈദാനിൽ നിന്ന് പുറപ്പെട്ട് സത്‌വ വലിയ പള്ളി, അൽ മർമൂം, വാസ്ൽ 1 കമ്മ്യൂണിറ്റി, മദീനത്ത് ജുമൈറ, സബീൽ പാർക്ക്, അൽ ഖവാനീജ് മജ്‌ലിസ്, ഫെസ്‌റ്റിവൽ സിറ്റി, നാദ് അൽ ഷെബ പാർക്ക്, ബുർജ് ഖലീഫ, അൽ ബർഷ പാർക്ക്, അൽ ഹബാബ്, നാദ് അൽ ഷെബ 1, അൽ ഗാഫ് വോക്, അയ് ടൺ മിർദിഫ്, മർഗാം,  ജുമൈറ കൈറ്റ് ബീച്ച് തുടങ്ങിയ ഇടങ്ങളിൽ റോമിങ് പീരങ്കി പര്യടനം നടത്തും. ഇതിനായി ഉപയോഗിക്കുന്നത് 1960കളിൽ നിർമിച്ച രണ്ട് ഫ്രഞ്ച് പീരങ്കികളാണ്. 25 പൗണ്ട് ഭാരമുള്ള ഈ പീരങ്കികൾ 10 കിലോമീറ്റർ ദൂരത്തിൽ 170 ഡെസിബെൽ ശബ്ദം പുറപ്പെടുവിക്കുന്നു.

റമദാൻ പീരങ്കികൾ കൂടാതെ, എക്സ്പോ സിറ്റിയുടെ റമദാൻ ഡിസ്ട്രിക്ടിൽ ശിൽപശാലകളും തത്സമയ പ്രകടനങ്ങളും ഉൾപ്പെടെ നിരവധി പരിപാടികൾ അവതരിപ്പിക്കും. എല്ലാ ദിവസവും വൈകിട്ട് 5 മുതൽ പുലർച്ചെ 1 വരെയാണ് പരിപാടികൾ നടക്കുന്നത്. അതേസമയം ഇത് കുടുംബങ്ങൾക്കും സന്ദർശകർക്കും റമദാനിൽ ഒരു ഉത്സവ അന്തരീക്ഷം പ്രദാനം ചെയ്യും.

Dubai Police have revealed the locations where Ramadan cannons will be fired to mark the end of fasting hours during the holy month.