സലാല: ഒമാനില്‍ വെച്ച് മൂന്നു മാസം മുമ്പ് കാണാതായ തായ് യുവതിയെ കത്തിക്കരിഞ്ഞ നിലയില്‍ കണ്ടെത്തി. 
ബംഗ്ലാദേശി കാമുകനെ സന്ദര്‍ശിച്ചതിന് ശേഷം മൂന്ന് മാസമായി യുവതിയെ ബന്ധപ്പെടാന്‍ കഴിഞ്ഞിരുന്നില്ല. തായ്‌വാനിലെ ലാംപാങ്ങില്‍ നിന്നുള്ള സ്ത്രീയെയാണ് കാണാതായത്. അതിയ എന്നാണ് യുവതിയുടെ പേര്. 

ഒരു മലയില്‍ നിന്ന് കണ്ടെത്തിയ കത്തിക്കരിഞ്ഞ മൃതദേഹം കാണാതായ സ്ത്രീയുടേതാണെന്ന് സ്ഥിരീകരിച്ചു. ഒമാനിലെ സലാലയിലുള്ള തന്റെ ബംഗ്ലാദേശി കാമുകനെ സന്ദര്‍ശിച്ചതിന് ശേഷം മൂന്ന് മാസമായി അതിയയെ കാണാനില്ലായിരുന്നു. 
ഫെബ്രുവരി 21 ന്, യുവതിയുടെ കാമുകന്‍ അവളെ ആക്രമിച്ച് കൊലപ്പെടുത്തിയ ശേഷം മൃതദേഹം ഒരു മലയില്‍ കൊണ്ടുപോയി കത്തിക്കുകയായിരുന്നു.

ഞായറാഴ്ച ഒമാന്‍ സമയം വൈകുന്നേരം 5:24 ന് കത്തിക്കരിഞ്ഞ ശരീരവും അതിയയുടേയും ഡിഎന്‍എ പൊരുത്തപ്പെടുന്നതായി പരിശോധനാ ഫലങ്ങളില്‍ നിന്നും ഒമാനി പൊലിസ് സ്ഥിരീകരിച്ചു. കഴിഞ്ഞ വ്യാഴാഴ്ചയാണ് ലാംപാങ്ങില്‍ നിന്നുള്ള യുവതിയുടെ മാതാപിതാക്കള്‍ മൂന്ന് മാസമായി മകളെ ബന്ധപ്പെടാന്‍ കഴിയുന്നില്ലെന്നും അവളെ കണ്ടെത്തി വീട്ടിലേക്ക് കൊണ്ടുവരാന്‍ സഹായിക്കണമെന്നും പറഞ്ഞ് തായ് അധികൃതരുടെ സഹായം തേടിയത്.