കോട്ടയം: ചാനല്‍ ചര്‍ച്ചയിലെ മത വിദ്വേഷ പരാമര്‍ശ കേസില്‍ പിസി ജോര്‍ജ് ഇന്ന് പൊലിസില്‍ കീഴടങ്ങാന്‍ സാധ്യത. അന്വേഷണ ഉദ്യോഗസ്ഥാനായ ഈരാറ്റുപേട്ട ഇന്‍സ്‌പെക്ടര്‍ക്ക് മുന്നില്‍ ഹാജരാകുമെന്ന് കാണിച്ച് പിസി ജോര്‍ജ് നേരത്തെ കത്ത് നല്‍കിയിരുന്നു. സ്റ്റേഷനില്‍ എത്തുന്നതിന് മുന്‍പായി ജോര്‍ജിനെ അറസ്റ്റ് ചെയ്യാനും സാധ്യതയുണ്ട്.

ജനുവരി 5ന് സ്വകാര്യ മാധ്യമത്തില്‍ നടത്തിയ ചര്‍ച്ചയ്ക്കിടെയാണ് പിസി ജോര്‍ജ് മുസ് ലിങ്ങള്‍ക്കെതിരെ വര്‍ഗീയ പരാമര്‍ശം നടത്തിയത്. മുഴുവന്‍ മുസ് ലിങ്ങലും തീവ്രവാദികളാണെന്നും, അവര്‍ പാകിസ്ഥാനിലേക്ക് പോകണമെന്നുമായിരുന്നു പരാമര്‍ശം. സംഭവത്തില്‍ യൂത്ത് ലീഗ് ഈരാറ്റുപേട്ട മണ്ഡലം കമ്മിറ്റി നല്‍കിയ പരാതിയില്‍ പൊലിസ് കേസെടുത്തെങ്കിലും അറസ്റ്റ് നടന്നിരുന്നില്ല. തുടര്‍ന്ന് ഒളിവില്‍ പോയ പിസി ഹൈക്കോടതിയില്‍ മുന്‍കൂര്‍ ജാമ്യഹരജി നല്‍കിയിരുന്നു. എന്നാല്‍ കോടതി ഹരജി തള്ളിയതോടെയാണ് അറസ്റ്റിന് വഴിയൊരുങ്ങുന്നത്. കഴിഞ്ഞ ദിവസം അറസ്റ്റിന് നീക്കമുണ്ടായെങ്കിലും ഹാജരാകാന്‍ രണ്ട് ദിവസത്തെ സാവകശം തേടിയിരുന്നു. 

അതേസമയം പിസി ജോര്‍ജിന് പിന്തുണയുമായി കാസ രംഗത്തെത്തി. ഇന്ന് ബിജെപി പ്രവര്‍ത്തകര്‍ക്കൊപ്പമാകും പിസി ജോര്‍ജ് സ്‌റ്റേഷനിലെത്തുക. ഇയാളെ വീട്ടിലെത്തിച്ച ശേഷം അവിടെ നിന്നും പ്രകടനമായി സ്റ്റേഷനിലേക്ക് കൊണ്ടുപോകാനാണ് ബിജെപി തീരുമാനം. എന്നാല്‍ പ്രകടനത്തിന് പൊലിസ് അനുമതി നല്‍കിയേക്കില്ലെന്നാണ് റിപ്പോര്‍ട്ട്. സംഘര്‍ഷ സാധ്യത കണക്കിലെടുത്ത് കൂടുതല്‍ പൊലിസിനെ ഈരാറ്റുപേട്ടയില്‍ വിന്യസിച്ചിട്ടുണ്ട്. 

police may arrest pc george today on hate speech