ദുബൈ: ആഡംബര ബോട്ടുകളിലെ ജീവനക്കാർക്ക് ദുബൈലേക്കുള്ള മൾട്ടിപ്പിൾ എൻട്രി വിസക്ക് ഇപ്പോൾ അപേക്ഷിക്കാമെന്ന് ജനറൽ ഡയറക്‌ടറേറ്റ് ഓഫ് റസിഡൻസി ആൻഡ് ഫോറിനേഴ്‌സ് അഫയേഴ്‌സ് (ജിഡിആർഎഫ്എ) വ്യക്തമാക്കി. ആറ് മാസമായിരിക്കും പുതിയ മൾട്ടിപ്പിൾ എൻട്രി വിസയുടെ കാലാവധി. ദുബൈയിൽ നടക്കുന്ന രാജ്യാന്തര ബോട്ടു ഷോയുടെ ഭാഗമായാണ് പുതിയ പ്രഖ്യാപനം.

അബൂദബിയിലെ ആഡംബര ബോട്ട് ഉടമകൾക്ക് ഗോൾഡൻ വിസ അനുവദിക്കുന്നതിനായി കഴിഞ്ഞ വർഷം ഡിസംബറിൽ പുതിയ പദ്ധതി ആരംഭിച്ചിരുന്നു. അബൂദബിയിലേക്ക് സമ്പന്നരായ വ്യക്തികളെ ആകർഷിക്കുന്നതിനായി രൂപകൽപന ചെയ്‌തിരിക്കുന്ന ഈ പദ്ധതി, ആഡംബര സൗകര്യങ്ങൾ, ബിസിനസ് അവസരങ്ങൾ, കുടുംബത്തിന് ദീർഘകാല താമസം എന്നിങ്ങനെയുള്ള പ്രത്യേക ആനുകൂല്യങ്ങളും വാഗ്ദാനം ചെയ്യുന്നതാണ്.

ഫെബ്രുവരി 19 ന് ദുബൈ ഹാർബറിൽ ആരംഭിച്ച 31-ാമത് രാജ്യാന്തര ബോട്ട് പ്രദർശനം ഇന്ന് സമാപിച്ചു. ആഡംബര ബോട്ട് മേഖലക്കും നാവിക സമൂഹത്തിനും പ്രത്യേക സേവനങ്ങളുടെ ഒരു ശ്രേണി ജിഡിആർഎഫ്എ പ്രദർശിപ്പിക്കുന്നു. മൊബൈൽ മറീന, വർക്ക് ബണ്ടിൽ, പ്ലാറ്റ്ഫോം 04, ദുബൈ റസിഡൻസി കമ്മ്യൂണിറ്റി നെറ്റ്‌വർക്ക് തുടങ്ങിയവയും ഇതിൽ ഉൾപ്പെടുന്നു.

Dubai announces a new multiple-entry visa policy for crew members of luxury yachts, allowing them to stay for up to six months.