ദുബായ്: ഐസിസി ചാമ്പ്യൻസ് ട്രോഫിയിലെ ആവേശകരമായ മത്സരത്തിൽ ഇന്ത്യ പാകിസ്താനെ നേരിട്ടുകൊണ്ടിരിക്കുകയാണ്. ദുബായ് ഇന്റർനാഷണൽ ക്രിക്കറ്റ് സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ പാകിസ്താൻ ബാറ്റിംഗ് തെരഞ്ഞെടുക്കുകയായിരുന്നു. ആദ്യം ചെയ്ത മുഹമ്മദ് റിസ്വാനും സംഘവും 241 റൺസിനാണ് പുറത്തായത്. ഇന്ത്യൻ ബൗളിങ്ങിൽ  കുൽദീപ് യാദവ് മൂന്ന് വിക്കറ്റുകൾ വീഴ്ത്തി മിന്നും പ്രകടനം നടത്തിയപ്പോൾ ഹർദിക് പാണ്ഡ്യ രണ്ട് വിക്കറ്റുകളും നേടി നിർണായകമായി. ഹർഷിത് റാണ, രവീന്ദ്ര ജഡേജ, അക്‌സർ പട്ടേൽ എന്നിവരായിരുന്നു ബാക്കിയുള്ള ഓരോ വിക്കറ്റുകളും നേടിയത്. 

മത്സരത്തിൽ നേടിയ ഈ രണ്ട് വിക്കറ്റുകൾക്ക് പിന്നാലെ തന്റെ ക്രിക്കറ്റ് കരിയറിൽ ഒരു അവിസ്മരണീയമായ നേട്ടവും ഹർദിക് പാണ്ഡ്യ സ്വന്തമാക്കി. ഇന്റർനാഷണൽ ക്രിക്കറ്റിൽ 200 വിക്കറ്റുകൾ പൂർത്തിയാക്കാനാണ് ഹർദിക്കിന് സാധിച്ചത്. ഏകദിനത്തിൽ 89 വിക്കറ്റുകളും, ടി-20യിൽ 94 വിക്കറ്റുകളും, ടെസ്റ്റ് ക്രിക്കറ്റിൽ 17 വിക്കറ്റുകളും ആണ് ഹർദിക്ക് നേടിയത്. മത്സരത്തിൽ പാക്കിസ്ഥാന്റെ ബാറ്റിംഗ് കഴിഞ്ഞപ്പോഴേക്കും പന്തുകൊണ്ട് ഡബിൾ സെഞ്ച്വറി നേടി തിളങ്ങിയിരിക്കുകയാണ് താരം.

പാക്കിസ്താന് വേണ്ടി അർദ്ധ സെഞ്ച്വറി നേടി സൗത് സക്കീൽ മികച്ച പ്രകടനം നടത്തി. 76 പന്തിൽ 62 റൺസ് ആണ് താരം നേടിയത്. 5 ഫോറുകൾ ആയിരുന്നു താരത്തിന്റെ ബാറ്റിൽ നിന്നും പിറന്നത്. 77 പന്തിൽ 46 റൺസ് നേടി ക്യാപ്റ്റൻ മുഹമ്മദ് റിസ്വാനും 39 പന്തിൽ 38 റൺസ് നേടി കുഷ്ദിൽ ഷായും പാകിസ്താനെ മാന്യമായ സ്കോറിൽ എത്തിക്കുന്നതിൽ നിർണായക പങ്കുവഹിച്ചു.

ഇന്ത്യ പ്ലെയിങ് ഇലവൻ

രോഹിത് ശർമ (ക്യാപ്റ്റൻ), ശുഭ്മാൻ ഗിൽ, വിരാട് കോഹ്‌ലി, ശ്രേയസ് അയ്യർ, അക്സർ പട്ടേൽ, കെഎൽ രാഹുൽ വിക്കറ്റ് കീപ്പർ), ഹർദിക് പാണ്ഡ്യ, രവീന്ദ്ര ജഡേജ, ഹർഷിത് റാണ, മുഹമ്മദ് ഷമി, കുൽദീപ് യാദവ്.

പാകിസ്താൻ പ്ലെയിങ് ഇലവൻ

ഇമാം ഉൾ ഹഖ്, ബാബർ അസം, സൗദ് ഷക്കീൽ, മുഹമ്മദ് റിസ്വാൻ(വിക്കറ്റ് കീപ്പർ/ക്യാപ്റ്റൻ), സൽമാൻ ആഘ, തയ്യബ് താഹിർ, ഖുശ്ദിൽ ഷാ, ഷഹീൻ അഫ്രീദി, നസീം ഷാ, ഹാരിസ് റൗഫ്, അബ്രാർ അഹമ്മദ്.