കൊച്ചി: ബില്യണ്‍സ് ബീസ് നിക്ഷേപ തട്ടിപ്പില്‍ കള്ളപ്പണ ഇടപാടും. ഉടമകള്‍ ഇടപാടുകാരോട് കള്ളപ്പണം വരുന്നതായി വെളിപ്പെടുത്തിയെന്ന തരത്തിലുള്ള വിവരമാണ് പുറത്ത് വരുന്നത്. 

ഉടമയായ സുബിന്‍ ,പണം വരുന്നുണ്ട്, ഒരാഴ്ചക്കുള്ളില്‍ എത്തിക്കാനാകും. പരിശോധന നടക്കുന്നതിനാല്‍ ശ്രദ്ധിച്ച് മാത്രമേ കൈകാര്യം ചെയ്യാനാകൂവെന്ന് ഓഡിയോ സന്ദേശത്തില്‍ പറയുന്നുണ്ട്.

അതേസമയം ഇരിങ്ങാലക്കുടയില്‍ ഷെയര്‍ ട്രേഡിങിന്റെ പേരില്‍ 150 കോടി തട്ടിയ പരാതിയില്‍ പൊലിസ് അന്വേഷണം ഊര്‍ജ്ജിതമാക്കിയിരിക്കുകയാണ്. 32 പേരുടെ പരാതിയില്‍ സ്ഥാപനത്തിന്റെ നടത്തിപ്പുകാരായ ബിബിന്‍ കെ.ബാബു, ഭാര്യ ജയ്ത വിജയന്‍, സഹോദരന്‍ സുബിന്‍ കെ.ബാബു, ലിബിന്‍ എന്നിവരുടെ പേരില്‍ പൊലീസ് കേസുകള്‍ റജിസ്റ്റര്‍ ചെയ്തു. 

ട്രേഡിങിലൂടെ അമിതമായ പലിശ നല്‍കാമെന്ന് വിശ്വസിപ്പിച്ചുകൊണ്ട് വലിയ സാമ്പത്തിക നിക്ഷേപം സ്വീകരിക്കുകയായിരുന്നു ബില്യണ്‍ ബീസ് എന്ന സ്ഥാപനം. 2020മുതലാണ് തട്ടിപ്പ് ആരംഭിച്ചത്. ഇവരുടെ വാഗ്ദാനത്തില്‍ വീണ് നിരവധിപേര്‍ നിക്ഷേപം നടത്തി. ഇവര്‍ക്ക് ആദ്യത്തെ അഞ്ച് മാസത്തോളം സ്ഥാപനം നല്‍കാമെന്ന് പറഞ്ഞ പലിശ ലഭിച്ചിരുന്നു. പിന്നീട് ലാഭവിഹിതം മുടങ്ങിയതോടെ നിക്ഷേപകര്‍ പണം തിരികെ ചോദിച്ചു എത്തിയപ്പോള്‍ ഉടമകള്‍ ഭീഷണിപ്പെടുത്തിയെന്നും പിന്നീട് ഇവര്‍ വിദേശത്തേക്ക് കടന്നെന്നും പരാതിക്കാര്‍ പറയുന്നു.