ന്യൂഡല്‍ഹി: കുംഭമേള നടക്കുന്ന നദിയിലെ വെള്ളം മലിനമാണെന്ന റിപ്പോര്‍ട്ടുകള്‍ തള്ളിയ ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിനെ വെല്ലുവിളിച്ച് ഗായകനും സംഗീതസംവിധായകനുമായ വിശാല്‍ ദദ്‌ലാനി. പ്രയാഗ്‌രാജിലെ നദിയില്‍ നിന്ന് ഒരുകവിള്‍ വെള്ളം കുടിച്ച് കാണിക്കാനാണ് വെല്ലുവിളി. 

കുംഭമേള നടക്കുന്ന സ്ഥലങ്ങളിലെ ജലം കുളിക്കാന്‍ മാത്രമല്ല കുടിക്കാനും ഉപയോഗിക്കാമെന്ന യോഗി ആദിത്യനാഥിന്റെ അവകാശവാദത്തിന് പിന്നാലെയാണ് വിശാലിന്റെ  വെല്ലുവിളി.

'വിദ്വേഷപ്രചാരകരെ ആലോചിച്ച് താങ്കള്‍ വിഷമിക്കേണ്ട, സര്‍. ഞങ്ങള്‍ താങ്കളെ വിശ്വസിക്കുന്നു. താങ്കള്‍ ധൈര്യമായി മുന്നോട്ട് പോവുക, കാമറയെ സാക്ഷി നിര്‍ത്തി നദിയില്‍ നിന്ന് നേരിട്ട് ഒരു കവിള്‍ വെള്ളം കുടിച്ചു കാണിക്കൂ.' വിശാല്‍ ദദ്‌ലാനി ഇന്‍സ്റ്റാഗ്രാം സ്റ്റോറിയില്‍ കുറിച്ചു. 

നാഷനല്‍ ഗ്രീന്‍ ട്രൈബ്യൂണലിന്റെ റിപ്പോര്‍ട്ട് പങ്കുവെച്ചുള്ള ഒരു പോസ്റ്റും അദ്ദേഹത്തിന്റേതായുണ്ട്. 
'വയറിളക്കം, കോളറ, അമീബിയോസിസ് തുടങ്ങി ദശലക്ഷക്കണക്കിന് കേസുകള്‍ വരുന്നത് നിങ്ങള്‍ക്ക് കാണാന്‍ കഴിയുന്നില്ലെങ്കില്‍, ഉറപ്പായിട്ടും നിങ്ങള്‍ പ്രത്യേകതയുള്ള വ്യക്തിയാണ്. ദയവായി മുന്നോട്ട് പോയി നിങ്ങളെയും നിങ്ങളുടെ കുടുംബത്തെയും മാലിന്യത്തില്‍ മുക്കുക. നിങ്ങള്‍ക്ക് കൂടുതല്‍ ശക്തി കിട്ടട്ടെ'

ഗംഗ നദിയടക്കമുള്ള ത്രിവേണി സംഗമത്തിലെ ജലത്തില്‍ മനുഷ്യവിസര്‍ജ്യത്തില്‍ കാണപ്പെടുന്ന കോളിഫോം ബാക്ടീരിയ അടക്കമുള്ളവയുടെ അളവ് അപകടകരമാം വിധം ഉയര്‍ന്നതാണെന്ന് യു.പി മലിനീകരണ നിയന്ത്രണബോര്‍ഡ് കണ്ടെത്തിയിരുന്നു. അനുവദനീയമായതിന്റെ 2000 ശതമാനം വരെ കോളിഫോം ബാക്ടീരിയ അധികമാണെന്നായിരുന്നു പരിശോധന റിപ്പോര്‍ട്ട്. 100 മില്ലി ലിറ്റര്‍ വെള്ളത്തില്‍ പരമാവധി 2500 എം.പി.എന്‍ എന്നതാണ് കോളിഫോം ബാക്ടീരിയയുടെ അനുവദനീയ അളവ്. എന്നാല്‍, 49,000 ആയിരുന്നു കുംഭമേള നടക്കുന്ന ജനുവരി 20ന് കോളിഫോം ബാക്ടീരിയയുടെ അളവ്. അനുവദനീയമായതിന്റെ 300 ശതമാനം അധികമാണ് ഫെബ്രുവരി 4ന് ത്രിവേണി സംഗമ ജലത്തിലെ കോളിഫോമിന്റെ അളവ്. കുംഭമേളക്കെത്തുന്ന ലക്ഷക്കണക്കിന് ഭക്തര്‍ പുണ്യസ്‌നാനം നടത്തുന്ന ഇടമാണിത്. 

മഹാ കുംഭ മേളയിലെ സ്‌നാനഘട്ടുകള്‍ക്ക് സമീപമുള്ള വെള്ളത്തില്‍ ഉയര്‍ന്ന അളവില്‍ കോളിഫോം ബാക്ടീരിയ കണ്ടെത്തിയതായി ദേശീയ ഹരിത ട്രൈബ്യൂണല്‍ (എന്‍ജിടി) റിപ്പോര്‍ട്ടും പുറത്തു വന്നിരുന്നു.  ഫെബ്രുവരി 17 നാണ് റിപ്പോര്‍ട്ട് പുറത്തിറക്കിയത്. രാജ്യവ്യാപകമായി കോളിളക്കം സൃഷ്ടിച്ചിട്ടും യു.പി മുഖ്യമന്ത്രി യോഗി ആദിത്യനാഥ് റിപ്പോര്‍ട്ട് തള്ളിക്കളയുകയാണുണ്ടായത്.

ഗംഗാജലത്തെ കുറിച്ച് വ്യാജ പ്രചാരണമാണ് പ്രതിപക്ഷ പാര്‍ട്ടികള്‍ നടത്തുന്നതെന്നാണ് യോഗി പറയുന്നത്.  സനാതന ധര്‍മ്മത്തെ സംബന്ധിച്ച് വ്യാജ പ്രചാരണമാണ് ഇപ്പോള്‍ നടക്കുന്നതെന്നും യോഗി അവകാശപ്പെടുന്നു.