മസ്‌കത്ത്: ഒമാനില്‍ ഏറ്റവും വിലയേറിയ മൊബൈല്‍ നമ്പര്‍ ലേലത്തില്‍ പോയത് 429,500 റിയാലിന്. ഇന്ത്യന്‍ രൂപയിലേക്ക് കണ്‍വേര്‍ട്ട് ചെയ്യുകയാണെങ്കില്‍ ഏകദേശം ഒരു കോടി രൂപയ്ക്ക് അടുത്ത് വരും ഇത്. 777777777 എന്ന വോഡഫോണ്‍ മൊബൈല്‍ നമ്പര്‍ ആണ് റെക്കോര്‍ഡ് വിലയ്ക്ക് ലേലത്തിലൂടെ പോയത്. ലേലം വഴി ലഭിച്ച മുഴുവന്‍ വരുമാനവും സേവനപ്രവര്‍ത്തനങ്ങള്‍ക്ക് സംഭാവന ചെയ്യുമെന്ന് ടെലികമ്മ്യൂണിക്കേഷന്‍ സേവന ദാതാവായ ഒമാന്‍ വോഡഫോണ്‍ പ്രഖ്യാപിച്ചു.

 

 

77777777 എന്ന നമ്പര്‍ ആദ്യമായി ഉള്‍പ്പെടുത്തിയ ലേലമാണിതെന്ന് ടെലികമ്മ്യൂണിക്കേഷന്‍സ് റെഗുലേറ്ററി അതോറിറ്റി (ടി.ആര്‍.എ) അറിയിച്ചു. ലേലത്തില്‍ വോഡഫോണിന്റെ 171 ഡയമണ്ട് നമ്പറുകളും 29 ഗോള്‍ഡ് നമ്പറുകളും ഉള്‍പ്പെടെ ആകെ 200 പ്രീമിയം നമ്പറുകളാണ് ഉണ്ടായിരുന്നത്. 'ഡയമണ്ട്', 'സ്വര്‍ണ്ണ' നമ്പറുകള്‍ എന്നിങ്ങനെയായി 777777777, 777777776, 777777778, 777777755, 777770000, 777077777 തുടങ്ങിയ വിവിധ ഫാന്‍സി നമ്പറുകള്‍ ആണ് ലേലത്തില്‍ വച്ചത്. 777777777 നമ്പറിന്റെ ഉടമയെ വോഡഫോണ്‍ കമ്പനി അഭിനന്ദിച്ചു. 

تفّرد برقمك، تميز بذاتك ✨

ليلة مميزة شهدناها في المزاد الحصري للأرقام الماسية والذهبية من فئة الـ 777، بالتعاون مع @TRA_OMAN. pic.twitter.com/GTSyYidRFy

— فودافـون عُمان (@VodafoneOMN) February 20, 2025

അതേസമയം, ഇത്രയും ഭീമമായ തുക കൊടുത്ത് ഒരു നമ്പര്‍ സ്വന്തമാക്കിയതിനെതിരേ വിമര്‍ശനവും ഉയര്‍ന്നു. പലരും ഇതുസംബന്ധിച്ച സോഷ്യല്‍മീഡിയയിലെ ടിആര്‍എയുടെയും വോഡഫോണിന്റെയും അറിയിപ്പിന് താഴെ വിമര്‍ശനം ഉന്നയിച്ചു. എന്റെ എല്ലാ വായ്പകളും അടയ്ക്കാനും വീട് വാങ്ങാനും അതിന് പുറമെ ജീവിതം നയിക്കാനും ഈ തുകകൊണ്ട് കഴിയുമെന്ന് എക്‌സ് പ്ലാറ്റ്‌ഫോമില്‍ അഹമ്മദ് അല്‍ ബലൂഷി എന്നയാള്‍ പറഞ്ഞു. ഒരു ഫോണ്‍ നമ്പര്‍ വാങ്ങാന്‍ ഇത്രയും പണം പാഴാക്കുന്നതിന്റെ അര്‍ത്ഥമെന്താണെന്ന് മറ്റൊരു ഉപയോക്താവ് ചോദിച്ചു.