ജിദ്ദ: സഊദി അറേബ്യയുടെ കറൻസിയായ റിയാലിന് ഏകീകൃത ചിഹ്നമായി. ഭരണാധികാരി സൽമാൻ രാജാവ് പുതിയ ചിഹ്നത്തിന് അംഗീകാരം നൽകി. രാജ്യത്തിൻ്റെ ദേശീയ കറൻസിയുടെ ഐഡന്റിറ്റിയെ ശക്തിപ്പെടുത്തുന്ന ഒരു തീരുമാനമാണിതെന്നും, പുതിയ ചിഹ്നത്തിന് അംഗീകാരം നൽകുന്നതിന് നേതൃത്വം നൽകിയ സൽമാൻ രാജാവിനും കിരീടാവകാശിയും പ്രധാനമന്ത്രിയുമായ അമീർ മുഹമ്മദ് ബിൻ സൽമാനും സഊദി സെൻട്രൽ ബാങ്ക് (സാമ) ഗവർണർ അയ്‌മൻ അൽ സയാരി നന്ദി അറിയിച്ചു.

ഈ തീരുമാനം പ്രാദേശിക, അന്തർദേശീയ തലങ്ങളിൽ സഊദി അറേബ്യയുടെ സാമ്പത്തിക സ്വത്വം ഉയർത്തിക്കാട്ടാൻ സഹായിക്കുമെന്ന് അദ്ദേഹം പറഞ്ഞു. വിവിധ വകുപ്പുകളുമായി ചേർന്ന് സാമ്പത്തിക, വാണിജ്യ ഇടപാടുകളിൽ റിയാലിൻ്റെ ഔദ്യോഗിക ചിഹ്നം ക്രമേണ പ്രയോഗത്തിൽ വരുത്തുമെന്നും അദ്ദേഹം കൂട്ടിച്ചേർത്തു.  

ഔദ്യോഗിക ചിഹ്നം രൂപകൽപ്പന ചെയ്തിരിക്കുന്നത് ദേശീയ സ്വത്വം പ്രോത്സാഹിപ്പിക്കുന്നതിനും സാംസ്‌കാരികമായ പങ്കാളിത്തം ശക്തിപ്പെടുത്തുന്നതിനും പ്രധാന ആഗോള കറൻസികളിൽ, പ്രത്യേകിച്ച് ജി20 രാജ്യങ്ങളുടെ സാമ്പത്തിക ചട്ടക്കൂടിനുള്ളിൽ സഊദി റിയാലിനെ പ്രധാനമായി സ്ഥാപിക്കുന്നതിനുമാണെതെന്ന് അദ്ദേഹം ചൂണ്ടിക്കാട്ടി.

സാംസ്കാരിക മന്ത്രാലയം, മാധ്യമ മന്ത്രാലയം, സഊദി സ്‌റ്റാൻഡേർഡ്‌സ് ആൻഡ് മെട്രോളജി ഓർഗനൈസേഷൻ തുടങ്ങി ചിഹ്നം വികസിപ്പിക്കുന്നതിൽ പങ്കുവഹിച്ച എല്ലാ സ്ഥാപനങ്ങൾക്കും ഗവർണർ നന്ദി പറഞ്ഞു. ഏറ്റവും ഉയർന്ന സാങ്കേതിക മാനദണ്ഡങ്ങൾക്കനുസൃതമായി വികസിപ്പിച്ചെടുത്തതാണ് സഊദി റിയാൽ ചിഹ്നം. കൂടാതെ, ഇത് രാജ്യത്തിന്റെ സമ്പന്നമായ സാംസ്കാരിക പൈതൃകത്തെയും പ്രതിഫലിപ്പിക്കുന്നു. അറബിക് കാലിഗ്രാഫിയിൽ നിന്ന് ഉരുത്തിരിഞ്ഞ രൂപകൽപ്പനയിൽ ദേശീയ കറൻസിയായ 'റിയാൽ' എന്ന് വായിച്ചെടുക്കാൻ കഴിയുന്ന രീതിയിലാണ് ചിഹ്നം രൂപകൽപന ചെയ്തിരിക്കുന്നത്. ആഭ്യന്തര അന്തർദേശീയ സാമ്പത്തിക, വാണിജ്യ ഇടപാടുകളിൽ സഊദി റിയാലിന്റെ പ്രതിനിധാനം പുതിയ ചിഹ്നം കാര്യക്ഷമമാക്കുമെന്നാണ് പ്രതീക്ഷിക്കുന്നത്.

Discover the significance of Saudi Arabia's official emblem, featuring two crossed swords and a palm tree, representing the country's rich history, justice, and prosperity.