ലണ്ടൻ: ഇംഗ്ലീഷ് പ്രീമിയർ തകർപ്പൻ ഫോം തുടർന്ന് ലിവർപൂളിന്റെ ഈജിപ്ഷ്യൻ സൂപ്പർതാരം മുഹമ്മദ് സലാഹ്. ആസ്റ്റൺ വില്ലക്കെതിരായ മത്സരത്തിൽ ഒരു ഗോളും ഒരു അസിസ്റ്റും നേടിയാണ് സലാഹ് തിളങ്ങിയത്. ഈ സീസണിൽ ഇംഗ്ലീഷ് പ്രീമിയർ ലീഗിൽ ഇതുവരെ സലാഹ് 24 ഗോളുകളും 15 അസിസ്റ്റുകളുമാണ് നേടിയിട്ടുള്ളത്. ഇതിനു പിന്നാലെ മറ്റൊരു തകർപ്പൻ നേട്ടവും സലാഹ് സ്വന്തമാക്കി. ഒരു ലീഗ് സീസണിൽ 10 വ്യത്യസ്ത മത്സരങ്ങളിൽ ഗോളും അസിസ്റ്റും നേടുന്ന താരമായാണ് സലാഹ് മാറിയത്. 

അർജന്റൈൻ ഇതിഹാസം ലയണൽ മെസിക്ക് ശേഷം ഈ നേട്ടം സ്വന്തമാക്കുന്ന ആദ്യ താരം കൂടിയാണ് സലാഹ്. മെസി 2014-15 സീസണിൽ സ്പാനിഷ് വമ്പന്മാരായ ബാഴ്‌സലോണയ്ക്ക് വേണ്ടിയാണ് 10 വ്യത്യസ്ത മത്സരങ്ങളിൽ ഗോളും അസിസ്റ്റും നേടിയത്. ആ സീസണിൽ നെയ്മറിനും സുവാരസിനും ഒപ്പം ബാഴ്സയുടെ മുന്നേറ്റ നിരയിൽ മിന്നും പ്രകടനമായിരുന്നു മെസി നടത്തിയിരുന്നത്. 

നിലവിലെ ഫോം സലാഹ് തുടരുകയാണെങ്കിൽ 10 മത്സരങ്ങളിൽ മാത്രമല്ല ഇനിയുള്ള മത്സരങ്ങളിലും സലാഹിന് ഗോളുകൾ നേടാൻ സാധിക്കും. ലീഗിൽ ഇനി ലിവർപൂളിന് 12 മത്സരങ്ങൾ കൂടിയാണ് ബാക്കിയുള്ളത്. അതുകൊണ്ട് തന്നെ സലാഹ് ഇനിയും ഈ നേട്ടങ്ങൾ ആവർത്തിക്കുമെന്ന് ഉറപ്പാണ്. 

അതേസമയം മത്സരത്തിൽ ഇരു ടീമുകളും രണ്ട് ഗോൾ വീതം നേടി സമനിലയിൽ പിരിയുകയായിരുന്നു. ലിവർപൂളിനായി സലാഹിന് പുറമെ ട്രെന്റ് അലക്സാണ്ടർ അർനോൾഡ് ആണ് ബാക്കിയുള്ള ഒരു ഗോൾ നേടിയത്. യൂറി ടൈൽമാൻസ് (38) ഒല്ലി വാട്ട്കിൻസ് (45+ 3) എന്നിവരാണ് ആസ്റ്റൺ വില്ലക്ക് വേണ്ടി ഗോളുകൾ നേടിയത്. 

നിലവിൽ ഇപിഎൽ പോയിന്റ് പട്ടികയിൽ 61 പോയിന്റുമായി ബഹുദൂരം മുന്നിലാണ് ലിവർപൂൾ. 26 മത്സരങ്ങളിൽ നിന്നും 18 ജയവും ഏഴ് സമനിലയും ഒരു തോൽവിയും അടക്കമാണ് ലിവർപൂളിന് 61 പോയിന്റുള്ളത്. ഫെബ്രുവരി 23ന് മാഞ്ചസ്റ്റർ സിറ്റിക്കെതിരെയാണ് ലിവർപൂളിന്റെ അടുത്ത മത്സരം.