മക്ക: ഹജ്ജ് സീസണിനോടനുബന്ധിച്ച് ആഭ്യന്തര തീർത്ഥാടകർക്കുള്ള പാക്കേജുകൾ അവതരിപ്പിച്ച് ഹജ്ജ്, ഉംറ മന്ത്രാലയം. സഊദി പൗരന്മാർക്കും പ്രവാസികളുൾപ്പടെയുള്ള താമസക്കാർക്കുമാണ് ഇത് ലഭ്യമാകുക. ഇത്തവണ വ്യത്യസ്തമായ നിരക്കുകളിലുള്ള നാല് പാക്കേജുകളാണ് അവതരിപ്പിച്ചിരിക്കുന്നത്. നിരക്കുകളും മുൻ​ഗണനകളും അനുസരിച്ച് തീർത്ഥാടകർക്ക് അവർക്കാവശ്യമുള്ള പാക്കേജുകൾ സ്വീകരിക്കാം. പാക്കേജുകൾ അവതരിപ്പിച്ചിരിക്കുന്നത് നുസ്ക് ആപ്ലിക്കേഷൻ വഴിയാണ്.  

ഏറ്റവും ഉയർന്ന പാക്കേജിന് 13,150 റിയാലാണ് നിരക്ക്. ഇതിൽ അത്യാധുനിക സൗകര്യങ്ങൾ ഉൾപ്പെടും. ജമാറത്ത് പാലത്തിന് അടുത്തായാണ് താമസ സൗകര്യം ഒരുക്കിയിരിക്കുന്നത്. ഏറ്റവും ചെലവ് കുറഞ്ഞ പാക്കേജിന്റെ നിരക്ക് 8,092 റിയാലാണ്. ഇതിൽ ഹോസ്പിറ്റാലിറ്റി ക്യാമ്പുകളാണ് ഉണ്ടാവുക. മിനക്ക് അടുത്തായാണ് ഈ ക്യാമ്പുകൾ ഒരുക്കിയിട്ടുള്ളത്. 12,537 റിയാൽ നിരക്ക് വരുന്ന ഹജ്ജ് പാക്കേജും ലഭ്യമാണ്. കിദാന അൽ വാദി ടവറുകളിലായാണ് ഈ പാക്കേജിൽ താമസ സൗകര്യം ഒരുക്കിയിരിക്കുന്നത്. കൂടാതെ, വ്യക്തി​ഗത സേവനങ്ങളും ഉയർന്ന നിലവാരത്തിലുള്ള സൗകര്യങ്ങളും ഈ പാക്കേജിന്റെ സവിശേഷതയാണ്. ഇതിൽ ഭക്ഷണവും ഉൾപ്പെടുന്നു. നാലാമത്തെ പാക്കേജിൽ മിനയിൽ ഒരുക്കിയിരിക്കുന്ന തമ്പുകളാണ് ഉൾപ്പെടുത്തിയിട്ടുള്ളത്. തീർത്ഥാടകർക്ക് പങ്കുവെക്കാവുന്ന താമസസൗകര്യവും ഉയർന്ന നിലവാരത്തിലുള്ള സേവനങ്ങളും ലഭിക്കും. ഈ പാക്കേജിന്റെ നിരക്ക് 10,366 റിയാൽ ആണ്.

ഈ വർഷത്തെ ആഭ്യന്തര ഹജ്ജ് രജിസ്ട്രേഷൻ നേരത്തെ ആരംഭിച്ചിരുന്നു. ‘നുസ്ക്’ ആപ്ലിക്കേഷനിലൂടെയോ ഇലക്ട്രോണിക് പോർട്ടൽ വഴിയോ ആണ് രജിസ്‌ട്രേഷൻ നടത്തേണ്ടത്. ഹജ്ജ് ആഗ്രഹിക്കുന്നവർ തങ്ങളുടെ ആരോഗ്യസ്ഥിതി, കൂടെയുള്ളവർ എന്നി വിവരങ്ങൾ പൂർണമായും രേഖപ്പെടുത്തിയിരിക്കണം. അതേസമയം, മുമ്പ് ഹജ്ജ് കർമങ്ങൾ അനുഷ്ഠിക്കാത്തവർക്കാണ് മുൻഗണന നൽകുന്നതെന്നും മന്ത്രാലയം അറിയിച്ചു.

ഈ വര്‍ഷത്തെ ഹജ്ജ് തീര്‍ത്ഥാടകര്‍ക്കുള്ള നിബന്ധനകള്‍ സഈദി നേരത്തെ പ്രഖ്യാപിച്ചിരുന്നു. തീര്‍ത്ഥാടകര്‍ പൂര്‍ണ്ണ ആരോഗ്യവാനായിരിക്കണമെന്നും, പകര്‍ച്ചവ്യാധിയോ വിട്ടുമാറാത്തതോ ആയ രോഗങ്ങളില്ലാത്തവരായിരിക്കണമെന്നും അറിയിച്ചിരുന്നു. കൂടാതെ, തീര്‍ത്ഥാടകര്‍ മെനിഞ്ചൈറ്റിസ്, സീസണല്‍ ഇന്‍ഫ്‌ലുവന്‍സ വാക്‌സിനേഷനുകള്‍ പൂര്‍ത്തിയാക്കണം. ഹജ്ജ് പെര്‍മിറ്റ് നുസുക് പോര്‍ട്ടല്‍ വഴി പ്രിന്റ് ചെയ്യുകയും ക്യുആര്‍ കോഡ് വ്യക്തമായി പ്രദര്‍ശിപ്പിക്കുകയും ചെയ്യണം. തീര്‍ത്ഥാടനം കഴിയുന്നതു വരെ ഇത് സൂക്ഷിക്കണം. ഇസ്ലാമിലെ അഞ്ച് നിര്‍ബന്ധിത കര്‍മ്മങ്ങളില്‍ ഒന്നാണ് ഹജ്ജ്. ശാരീരികമായും സാമ്പത്തികമായും ഹജ്ജ് ചെയ്യാന്‍ കഴിയുന്ന മുസ്ലിംങ്ങള്‍ ജീവിതത്തില്‍ ഒരിക്കലെങ്കിലും ഹജ്ജ് നിര്‍വഹിക്കേണ്ടതുണ്ട്. വിദേശത്തു നിന്നുള്ള 1.6 ദശലക്ഷം പേര്‍ ഉള്‍പ്പെടെ ഏകദേശം 1.8 ദശലക്ഷം കഴിഞ്ഞ വര്‍ഷം ഹജ്ജ് കര്‍മ്മം നിര്‍വഹിച്ചത്.

Saudi Arabia has announced the Hajj 2025 packages for domestic pilgrims, outlining the rules and regulations for those performing the sacred ritual