കൊച്ചി: സ്വകാര്യ ബസിന് പെര്‍മിറ്റ് അനുവദിക്കുവാന്‍ കൈക്കൂലി ആവശ്യപ്പെട്ടെന്ന പരാതിയില്‍ എറണാകുളം ആര്‍.ടി.ഒ ടി.എം ജേര്‍സനെതിരെ കൂടുതല്‍ അന്വേഷണം നടത്താന്‍ വിജിലന്‍സ്.ജെര്‍സന്റെയും കുടുംബാംഗങ്ങളുടേയും ബാങ്ക് അക്കൗണ്ടുകള്‍ വിശദമായി പരിശോധിക്കാനാണ് വിജിലന്‍സിന്റെ തീരുമാനം. 

മുന്‍പും നിരവധി തവണ ജെര്‍സന്‍ കൈക്കൂലി വാങ്ങിയതായി ചോദ്യം ചെയ്യലില്‍ ബോധ്യപ്പെട്ടിട്ടുണ്ട്. പിടിക്കപ്പെടാതിരിക്കാന്‍ ഏജന്റുമാര്‍ വഴിയാണ് ഇയാള്‍ കൈക്കൂലി വാങ്ങിക്കൊണ്ടിരുന്നത്. ജെര്‍സനെ വൈകീട്ടോടെ കോടതിയില്‍ ഹാജരാക്കും. 

അതേസമയം, ജെര്‍സന്‍ കൈക്കൂലി വാങ്ങിയതുമായി ബന്ധപ്പെട്ട റിപ്പോര്‍ട്ട് ഇന്ന് വിജിലന്‍സ് മോട്ടോര്‍ വാഹന വകുപ്പിന് കൈമാറും. ജെര്‍സനെതിരെ ഗതാഗത വകുപ്പ് നടപടിയെടുക്കും. ജെര്‍സനെ സര്‍വീസില്‍ നിന്ന് സസ്‌പെന്‍ഡ് ചെയ്‌തേക്കും. 

ജെര്‍സനൊപ്പം വാഹന ഏജന്റുമാരായ സജി, രാമപടിയാര്‍ എന്നിവരെയും വിജിലന്‍സ് ഇന്നലെ അറസ്റ്റ് ചെയ്തിരുന്നു. എറണാകുളം ചെല്ലാനം-ഫോര്‍ട്ട് കൊച്ചി റൂട്ടില്‍ സര്‍വിസ് നടത്തുന്ന സ്വകാര്യ ബസുടമയോട് പെര്‍മിറ്റിന് ഏജന്റ് മുഖേന കൈക്കൂലി ആവശ്യപ്പെട്ടന്നാണ് പരാതി. ആര്‍.ടി.ഒയുടെ നിര്‍ദേശപ്രകാരം ഏജന്റായ രാമപടിയാര്‍ പരാതിക്കാരനെ കണ്ട് പെര്‍മിറ്റ് അനുവദിക്കുന്നതിന് മറ്റൊരു ഏജന്റായ സജിയുടെ കൈവശം 5,000 രൂപ കൈക്കൂലി നല്‍കണമെന്ന് അറിയിച്ചു. തുടര്‍ന്ന് പരാതിക്കാരന്‍ ഈ വിവരം വിജിലന്‍സിനെ അറിയിച്ചു. ഇന്നലെ ഉച്ചക്ക് ഒരുമണിക്ക് ആര്‍.ടി ഓഫിസിന് മുന്നില്‍ വച്ച് പരാതിക്കാരനില്‍ നിന്നും ഏജന്റായ സജി 5,000 രൂപയും ഒരു കുപ്പി വിദേശ മദ്യവും കൈക്കൂലിയായി വാങ്ങുന്നതിനിടെ മറ്റൊരു ഏജന്റായ രാമപടിയാറോടൊപ്പം ഇരുവരേയും വിജിലന്‍സ് സംഘം പിടികൂടുകയായിരുന്നു. 

കുറ്റസമ്മത മൊഴികളുടെയും മറ്റ് തെളിവുകളുടെയും അടിസ്ഥാനത്തില്‍ ആര്‍.ടി.ഒ ജെര്‍സണെയും അറസ്റ്റ് ചെയ്തു. 

ആര്‍.ടി.ഒയുടെ ഇടപ്പള്ളിയിലെ വീട്ടിലും വിജിലന്‍സ് പരിശോധന നടത്തി. വീട്ടില്‍ നിന്നും 50ലധികം വിലകൂടിയ വിദേശ മദ്യക്കുപ്പികളും 60,000 രൂപയും കണ്ടെത്തിയെന്ന് എറണാകുളം വിജിലന്‍സ് എസ്.പി ശശിധരന്‍ പറഞ്ഞു.