കോഴിക്കോട്: വില കുറയുമെന്ന എല്ലാ പ്രതീക്ഷകളും തകർത്ത് വീണ്ടും കുതിച്ച് കുതിച്ച് മുന്നേറുകയാണ് സ്വർണ വില.തുടർച്ചയായ മൂന്നാം ദിനമാണ് വിലയിൽ വർധനവ് രേഖപ്പെടുത്തുന്നത്. ഈ വില വർധന വിവാഹ സീസൺ കൂടി ആണെന്നത് കൊണ്ടു തന്നെ ആവശ്യക്കാരെ വല്ലാതെ ആശങ്കപ്പെടുത്തുന്നുണ്ട്.  ഡോളറിനെതിരെ രൂപ ദുർബലപ്പെടുന്നതും അന്താരാഷ്ട്ര വിപണിയിലെ വർധനവും ആഭ്യന്തര വിപണിയിലെ സ്വർണവിലയെ കാര്യമായി ബാധിക്കുന്നുണ്ട് എന്നാണ് വിദ​ഗ്ധർ വിലയിരുത്തുന്നത്. അമേരിക്കയുടെ താരിഫ് ഭീഷണിയും അതിനെ ചെറുക്കാനുള്ള ചൈനയടക്കമുള്ള രാജ്യങ്ങളുടെ നടപടികളും വ്യാപാരയുദ്ധത്തിലേക്ക് നയിച്ചേക്കും എന്ന ആശങ്കയും സ്വർണവില വർധനയെ സ്വാധീനിക്കുന്നുണ്ട്. 

65 രൂപയാണ് ഇന്ന് ഒരു ഗ്രാം സ്വർണത്തിന് കൂടിയിരിക്കുന്നത്. ഇതോടെ ഒരു ഗ്രാം സ്വർണം വാങ്ങിക്കാൻ തന്നെ 8000 രൂപയിൽ അധികം ചെലവാകുന്ന സ്ഥിതിയാണ്. ഇന്നലെ 7970 രൂപയുള്ള ​ഗ്രാമിന് ഇന്ന് വില 8035 ആയി.  ഇത് മൂന്നാം തവണയാണ് സ്വർണവിലയുടെ ചരിത്രത്തിൽ ഗ്രാം വില 8000 കടക്കുന്നത്. 

ആദ്യമായി ഗ്രാമിന് 8000 എന്ന നിരക്ക് സ്വർണം മറികടക്കുന്നത് ഫെബ്രുവരി 11 നാണ്. 8060 ൽ ആയിരുന്നു സ്വർണം അന്ന് വ്യാപാരം നടത്തിയിരുന്നത്. ചരിത്രത്തിലെ എക്കാലത്തേയും ഉയർന്ന നിരക്കായിരുന്നു അത്. ഫെബ്രുവരി 10 ന് 8010 ആയിരുന്നു ഒരു ഗ്രാം സ്വർണത്തിന്റെ വില. 

520 രൂപ കൂടി  64000 എന്ന മാന്ത്രികസംഖ്യയിലേക്ക് തിരികെ കയറിയിരിക്കുകയാണ് പവൻവില. ഒരു പവന് സ്വർണം  64280 രൂപയാണ് ഇന്ന് വില. ഫെബ്രുവരി 11 ന് രേഖപ്പെടുത്തിയ പവന് 64480 എന്ന എക്കാലത്തേയും ഉയർന്ന നിരക്ക്. വില വർധന തുടരുകയാണെങ്കിൽ വൈകാതെ സർവകാല റെക്കോർഡ് തകർത്ത് വില മുന്നേറുമെന്നാണ് വിദ​ഗ്ധർ ചൂണ്ടിക്കാട്ടുന്നത്. ആഭരണമായാണ് സ്വർണം വാങ്ങുന്നതെങ്കിൽ ചുരുങ്ങിയത് 70000ത്തിനടുത്ത് വേണ്ടി വരും ഒരു പവൻ വാങ്ങാൻ.