അതിരപ്പിള്ളി:  അതിരപ്പള്ളിയിൽ മയക്കുവെടിയേറ്റ കൊമ്പനെ ലോറിയിൽ കയറ്റി. പതുക്കെ  കോടനാട് കപ്രികോട് അഭയാരണ്യത്തിലേക്ക്.  തടിയും കയറും ഉപയോഗിച്ച് തയാറാക്കിയ കരുത്തുറ്റ കൂട്ടിലേക്കു കുങ്കിയാനകളെ സഹായത്തോടെയാണ് ആനയെ കയറ്റിയത്.തലയും ചെവിയും ചെറുതായി ഇളക്കി അനുസരണയോടെ ലോറിയിൽ നിൽക്കുന്നതിനാൽ യാത്രയ്ക്കു തടസ്സമുണ്ടാകില്ലെന്നാണ് കരുതിന്നത്.  മസ്തകത്തിൽ മുറിവേറ്റ ആനക്ക് ചികിത്സ നൽകുന്നതിന് വേണ്ടിയാണ് മയക്കുവെടി വച്ചത്.

അതിരപ്പള്ളിയിൽനിന്ന് 25 കിലോമീറ്റർ ദൂരമാണ് അഭയാരണ്യത്തിലേക്കെങ്കിലും വളരെ പതുക്കെ മാത്രമേ ആനയുമായി പോകാനാകൂ. ഒരു മണിക്കൂറിനകം അവിടെ എത്തിക്കാനാുള്ള ശ്രമത്തിലാണ് വനംവകുപ്പ്. 

കോന്നി സുരേന്ദ്രൻ, കുഞ്ചു, വിക്രം തുടങ്ങിയ കുങ്കിയാനകളുടെ സഹായത്തോടെയാണ്  വെടിയേറ്റു മയങ്ങിവീണ ആനയെ എഴുന്നേൽപ്പിച്ചത്. മയങ്ങിക്കിടന്ന ആനയുടെ മുറിവ് വൃത്തിയാക്കി പ്രാഥമിക ചികിത്സ നൽകിയിട്ടുണ്ട്. 

വെടിയേൽക്കും മുൻപ് കൂടെയുണ്ടായിരുന്ന ഏഴാറ്റുമുഖം ഗണപതി എന്ന മറ്റൊരു കാട്ടാന ഈ കൊമ്പനെ കുത്തിയിരുന്നു. ഇതാണു കൊമ്പൻ പെട്ടെന്നു വീഴാൻ കാരണം.പിന്നീട് വെടിവച്ച് ഭയപ്പെടുത്തിയാണു ഗണപതിയെ തുരത്തിയത്. ചികിത്സിക്കുന്നതിനുള്ള രണ്ടാംഘട്ട ദൗത്യത്തിന്റെ ഭാഗമായി ഇന്ന് രാവിലെ വെറ്റിലപ്പാറയ്ക്കു സമീപം എണ്ണപ്പനത്തോട്ടത്തിലെ പുഴയിലേക്കിറങ്ങിയ ആന തുരുത്തിലേക്കു നീങ്ങുമ്പോൾ ഡോ.അരുൺ സഖറിയയുടെ നേതൃത്വത്തിൽ വെടിവയ്ക്കുകയായിരുന്നു.

കൊമ്പന്റെ മസ്തകത്തിലെ മുറിവ് മൂലമുള്ള വേദന കുറയ്ക്കുന്നതിനാണു പ്രഥമ പരിഗണന. ജനുവരി 15 മുതലാണ് മുറിവേറ്റ കൊമ്പനെ പ്ലാന്റേഷൻ എസ്റ്റേറ്റിൽകാണാൻ തുടങ്ങിയത്. പിന്നീട് 24ന് ആനയെ പിടികൂടി ചികിത്സ നൽകി. എന്നാൽ അതിന് ശേഷം  മുറിവിൽ പുഴുവരിച്ച നിലയിൽ കാണപ്പെട്ടു.  തുടർന്നാണ് ചികിത്സ തുടരാൻ തീരുമാനിച്ചത്.