അബൂദബി: ഇന്ത്യൻ പൗരന്മാർക്കുള്ള ഓൺ അറൈവൽ വിസ പ്രോഗ്രാം ഫെബ്രുവരി 13 മുതൽ കൂടുതൽ രാജ്യങ്ങളിൽ താമസിക്കുന്ന ഇന്ത്യൻ പൗരന്മാർക്ക് കൂടി യുഎഇ വിപുലീകരിച്ചിരുന്നു. ആറ് പുതിയ രാജ്യങ്ങളിൽ നിന്നുള്ള അംഗീകൃത വിസ, റെസിഡൻസി പെർമിറ്റുകൾ അല്ലെങ്കിൽ ഗ്രീൻ കാർഡുകൾ ഉള്ളവർക്ക് ഈ സൗകര്യം ഉപയോഗപ്പെടുത്താം.

സാധാരണ പാസ്‌പോർട്ടും സിംഗപ്പൂർ, ജപ്പാൻ, ദക്ഷിണ കൊറിയ, ഓസ്‌ട്രേലിയ, ന്യൂസിലാൻഡ്, കാനഡ എന്നിവിടങ്ങളിൽ നിന്നുള്ള അംഗീകൃത വിസയും, റെസിഡൻസി പെർമിറ്റും, ഗ്രീൻ കാർഡും കൈവശമുള്ള ഇന്ത്യൻ പൗരന്മാർക്ക് യുഎഇയിലെ എല്ലാ പ്രവേശന പോയിന്റുകളിൽ വെച്ചും വിസ ലഭിക്കും. 

ആരാണ് ഓൺ അറൈവൽ വിസക്ക് യോഗ്യർ?

മുകളിൽപ്പറഞ്ഞ രാജ്യങ്ങളിൽ നിന്നുള്ള വ്യക്തികൾക്ക് യുഎഇയിൽ ഓൺ അറൈവൽ വിസ ലഭിക്കും, അവരുടെ പാസ്‌പോർട്ടിന് കുറഞ്ഞത് ആറ് മാസമെങ്കിലും സാധുതയുണ്ടാകണം. കൂടാതെ, യുഎഇ ചട്ടങ്ങൾക്കനുസൃതമായി ഓൺ അറൈവൽ വിസക്കാവശ്യമായ ഫീസ് ഇവർ അടയ്ക്കുകയും ചെയ്യണം.

എത്രയാണ് ഫീസ്?

14 ദിവസത്തെ താമസത്തിനുള്ള പ്രവേശന വിസ ഫീസ് 100 ദിർഹമാണ്. ഇത് 250 ദിർഹം ചിലവിൽ 14 ദിവസത്തേക്ക് കൂടി നീട്ടാനുള്ള ഓപ്ഷനുമുണ്ട്. 60 ദിവസത്തെ വിസ 250 ദിർഹത്തിന് ലഭ്യമാണ്.

യുഎഇ വിസ ഓൺ അറൈവൽ എങ്ങനെ അപേക്ഷിക്കാം

ജിഡിആർഎഫ്എ ദുബൈ വഴി അപേക്ഷിക്കേണ്ട വിധം

1. gdrfad.gov.ae എന്ന വെബ്സൈറ്റ് സന്ദർശിച്ച് 'ലോഗിൻ' ക്ലിക്ക് ചെയ്യുക. ഒരു അക്കൗണ്ട് നിർമിക്കാൻ 'ഇമെയിൽ ഉപയോഗിച്ച് രജിസ്റ്റർ ചെയ്യുക' തിരഞ്ഞെടുക്കുക.

2. നിങ്ങളുടെ മുഴുവൻ പേര്, ജനനത്തീയതി, ഇമെയിൽ വിലാസം, പാസ്‌വേഡ് എന്നിങ്ങനെയുള്ള നിങ്ങളുടെ വിശദാംശങ്ങൾ നൽകുക. തുടർന്ന് നിങ്ങളുടെ ഇമെയിലിലേക്ക് ഒരു OTP (വൺടൈം പാസ്‌വേഡ്) അയക്കും. OTP നൽകി, നിബന്ധനകൾ അംഗീകരിച്ചുകൊണ്ട് രജിസ്റ്റർ ചെയ്യുക.

3. നിങ്ങളുടെ പുതിയ ക്രെഡൻഷ്യലുകൾ ഉപയോഗിച്ച് ലോഗിൻ ചെയ്ത്, നിങ്ങളുടെ ഡാഷ്‌ബോർഡിൽ, 'പുതിയ ആപ്ലിക്കേഷൻ' ക്ലിക്ക് ചെയ്ത് '(അമേരിക്ക, ബ്രിട്ടൻ, യൂറോപ്യൻ യൂണിയൻ രാജ്യങ്ങൾ) താമസിക്കുന്ന റിപ്പബ്ലിക് ഓഫ് ഇന്ത്യയുടെ പൗരന്മാർക്കായുള്ള വിസ ഓൺ അറൈവൽ' തിരഞ്ഞെടുക്കുക.

4. മുഴുവൻ പേര്, പാസ്‌പോർട്ട് വിശദാംശങ്ങൾ, വിസ അല്ലെങ്കിൽ റെസിഡൻസ് പെർമിറ്റ് വിവരങ്ങൾ എന്നിങ്ങനെ ആവശ്യമായ വിശദാംശങ്ങൾ പൂരിപ്പിക്കുക.

5. അപേക്ഷയും പേയ്‌മെന്റും സമർപ്പിക്കുന്നതിന് മുമ്പായി നിങ്ങളുടെ രേഖകൾ അപ്‌ലോഡ് ചെയ്ത് വിശദാംശങ്ങൾ പരിശോധിച്ച് സ്ഥിരീകരിക്കുക. തുടർന്ന്, ഇമെയിൽ വഴി 48 മണിക്കൂറിനുള്ളിൽ നിങ്ങൾക്ക് വിസ ലഭിക്കും.

ഐസിപി വഴി അപേക്ഷിക്കാനുള്ള വിധം

1. smartservices.icp.gov.ae എന്ന വെബ്സൈറ്റ് സന്ദർശിച്ച് 'പബ്ലിക് വിസ സർവിസസ്' ക്ലിക്ക് ചെയ്യുക.

2. 'ഇഷ്യൂ എൻട്രി പെർമിറ്റ് ഫോർ ഹോൾഡേഴ്‌സ് ഓഫ് സ്‌പെഷ്യൽ വിസസ്' എന്ന സേവനം കണ്ടെത്തിയ ശേഷം 'സ്റ്റാർട്ട് സർവിസ്' ക്ലിക്ക് ചെയ്യുക.

3. നിങ്ങളുടെ വ്യക്തിഗത വിവരങ്ങൾ എന്നുള്ളതിൽ നിങ്ങളുടെ പേര്, പാസ്‌പോർട്ട് നമ്പർ, ദേശീയത, വിസ വിവരങ്ങൾ തുടങ്ങിയ വിവരങ്ങൾ നൽകി അപേക്ഷ പൂരിപ്പിക്കുക.

4. നിങ്ങളുടെ യുഎഇ വിലാസം (ഹോട്ടൽ അല്ലെങ്കിൽ റെസിഡൻഷ്യൽ വിലാസം) നൽകുക.

5. ആവശ്യമായ രേഖകൾ (പാസ്‌പോർട്ട് പകർപ്പ്, വിസ/റെസിഡൻസ് പെർമിറ്റ്) അപ്‌ലോഡ് ചെയ്‌ത് അപേക്ഷ സമർപ്പിക്കുക.

അപേക്ഷ പ്രോസസ്സ് ചെയ്തുകഴിഞ്ഞാൽ, 48 മണിക്കൂറിനുള്ളിൽ ഇമെയിൽ വഴി നിങ്ങൾക്ക് വിസ ലഭിക്കും.

എമിറേറ്റ്‌സ് യാത്രക്കാർക്കുള്ള മുൻകൂർ അനുമതി

നിങ്ങൾ എമിറേറ്റ്‌സ് എയർലൈനിൽ യാത്ര ചെയ്യുകയാണെങ്കിൽ, ഈ വർഷം ആദ്യം ആരംഭിച്ച അവരുടെ പ്രീ-അപ്രൂവ്ഡ് വിസ-ഓൺ-അറൈവൽ സേവനം നിങ്ങൾക്ക് ഉപയോഗിക്കാം. ഇത് യോഗ്യരായ ഇന്ത്യൻ പൗരന്മാരെ ദുബൈയിലെ ഇമിഗ്രേഷൻ ക്യൂകൾ മറികടക്കാൻ സഹായിക്കുന്നു. emirates.com-ലെ 'Manage Your Booking' വിഭാഗത്തിലൂടെ നിങ്ങൾക്ക് വിസ-ഓൺ-അറൈവൽ എൻട്രി പെർമിറ്റിന് അപേക്ഷിക്കാൻ സാധിക്കും. ഇത് നിങ്ങളെ ദുബൈ വിസ പ്രോസസ്സിംഗ് സെന്ററിലേക്ക് (DVPC) നയിക്കും.

Discover the simplified process for Indian citizens to obtain an on-arrival visa in the UAE, making travel to the Emirates more convenient than ever.