റിയാദ്: ഈ വര്‍ഷത്തെ ഹജ്ജ് തീര്‍ത്ഥാടന വേളയില്‍ തീര്‍ത്ഥാടകരെ താമസിപ്പിക്കുന്നതിനായി മക്കയിലെ കെട്ടിടങ്ങള്‍ രജിസ്റ്റര്‍ ചെയ്യുന്നതിനുള്ള സമയപരിധി നീട്ടി സഊദി അറേബ്യ. കെട്ടിടങ്ങള്‍ രജിസ്റ്റര്‍ ചെയ്യാനുള്ള സമയപരിധി ഹിജ്‌റ കലണ്ടറിലെ ഒമ്പതാം മാസമായ റമദാന്‍ 24 വരെ നീട്ടാന്‍ മക്ക ഡെപ്യൂട്ടി ഗവര്‍ണര്‍ സഊദ് ബിന്‍ മെഷാല്‍ അംഗീകാരം നല്‍കിയതായി സഊദി ദിനപത്രമായ ഒകാസ് റിപ്പോര്‍ട്ട് ചെയ്തു.

മുമ്പ് കെട്ടിട ഉടമസ്ഥര്‍ക്ക് കെട്ടിടങ്ങള്‍ രജിസ്റ്റര്‍ ചെയ്യുന്നതിനുള്ള അവസാന തീയതിയായി 2025 ജനുവരി 30-ാണ് നിശ്ചയിച്ചിരുന്നത്. 2024 ജൂലൈയില്‍, മക്കയിലെ തീര്‍ത്ഥാടന ഭവന നിര്‍മ്മാണത്തിനായുള്ള സഊദി സ്റ്റേറ്റ് കമ്മിറ്റി പെര്‍മിറ്റ് രജിസ്‌ട്രേഷന്‍ പ്രക്രിയ ആരംഭിച്ചിരുന്നു. കെട്ടിടങ്ങളിലെ അഗ്‌നി സുരക്ഷ, ഘടനാപരമായ സമഗ്രത എന്നിവ വിലയിരുത്തുന്ന അംഗീകൃത എഞ്ചിനീയറിംഗ് കണ്‍സള്‍ട്ടന്‍സി ഓഫീസുകള്‍ വഴിയാണ് ഭൂവുടമകള്‍ പെര്‍മിറ്റിനായി അപേക്ഷിക്കേണ്ടത്.

ശഅബാന്‍ അവസാനത്തോടെ പെര്‍മിറ്റ് അംഗീകാരങ്ങള്‍ നിര്‍ബന്ധമാക്കുകയും അംഗീകൃത സ്ഥാപനങ്ങള്‍ പരിശോധനകള്‍ നടത്തുകയും കാലതാമസം ഒഴിവാക്കാന്‍ ഉടനടി നടപടി സ്വീകരിക്കണമെന്ന് അധികാരികള്‍ ആവശ്യപ്പെട്ടു.

2025 ലെ ഹജ്ജ് ജൂണ്‍ 4 ന് ആരംഭിച്ച് ജൂണ്‍ 9 ന് അവസാനിക്കുമെന്നാണ് പ്രതീക്ഷിക്കുന്നത്. 22 രാജ്യങ്ങളില്‍ നിന്നുള്ള 1.6 ദശലക്ഷത്തിലധികം പേര്‍ ഉള്‍പ്പെടെ 1.83 ദശലക്ഷത്തിലധികം തീര്‍ത്ഥാടകരാണ് 2024ല്‍ ഹജ്ജ് നിര്‍വഹിച്ചത്.

ജീവിതത്തില്‍ ഒരിക്കലെങ്കിലും ഹജ്ജ് നിര്‍വഹിക്കാന്‍ ശാരീരികമായും സാമ്പത്തികമായും പ്രാപ്തിയുള്ള മുസ്‌ലിംകള്‍ക്ക് ഹജ്ജ് തീര്‍ത്ഥാടനം നിര്‍ബന്ധിത മതപരമായ കടമയാണ്.

Saudi Arabia extends deadline for Hajj building registration to 2025